TTA: షార్లెట్ టీటీఏ మెగా కన్వెన్షన్‌కు ముఖ్య అతిథిగా మంత్రి శ్రీధర్ బాబు

తెలంగాణ అమెరికన్ తెలుగు అసోసియేషన్ (TTA) ప్రతిష్టాత్మకంగా నిర్వహించ తలపెట్టిన టీటీఏ మెగా కన్వెన్షన్‌కు ఒక విశిష్ట అతిథి తోడయ్యారు. నార్త్ కరోలినాలోని షార్లెట్ నగరంలో జరగనున్న ఈ మహాసభలకు హాజరుకావాల్సిందిగా టీటీఏ నాయకత్వ బృందం తెలంగాణ రాష్ట్ర ఐటీ, పరిశ్రమల శాఖ మంత్రి గౌరవనీయులు దుద్దిళ్ళ శ్రీధర్ బాబును మర్యాదపూర్వకంగా ఆహ్వానించింది. టీటీఏ ప్రతినిధుల ఆహ్వానాన్ని మంత్రి గారు సాదరంగా అంగీకరించారు.

మరింత ప్రాముఖ్యత..
అమెరికాలో నివసిస్తున్న తెలుగు వారందరినీ ఒకే వేదికపైకి తెచ్చే ఈ మెగా కన్వెన్షన్‌కు మంత్రి శ్రీధర్ బాబు గారు రావడం పట్ల ప్రవాస తెలుగు వారు హర్షం వ్యక్తం చేస్తున్నారు. మంత్రి గారి రాకతో ఈ వేడుకలు మరింత ప్రాముఖ్యతను సంతరించుకోనున్నాయి. ఈ పర్యటనలో భాగంగా ఆయన తెలంగాణలో ఐటీ రంగ అభివృద్ధి, భవిష్యత్తు పెట్టుబడుల గురించి ప్రవాసులతో చర్చించే అవకాశం ఉంది. ఈ కన్వెన్షన్‌కు సంబంధించిన మరిన్ని వివరాలను టీటీఏ బృందం త్వరలోనే అధికారికంగా ప్రకటించనుంది.