Dear Uma Review ‘డియర్ ఉమ’ మంచి సందేశాన్నిచ్చే చిత్రం

తెలుగు టైమ్స్.నెట్ రేటింగ్ : 2.5/5
నిర్మాణ సంస్థ : సుమ చిత్ర ఆర్ట్స్
నటీనటులు : సుమయ రెడ్డి, పృథ్వీ అంబర్, కమల్ కామరాజు, సప్త గిరి,
అజయ్ ఘోష్, ఆమని, రాజీవ్ కనకాల, పృథ్వీరాజ్, రూప లక్ష్మీ తదితరులు
సినిమాటోగ్రఫీ : రాజ్ తోట, సంగీతం : రధన్
ఎడిటర్ : సత్య గిడుతూరి, లైన్ ప్రొడ్యూసర్ : నగేష్ యూ.జీ
ఎగ్జిక్యూటివ్ ప్రొడ్యూసర్ : నితిన్ రెడ్డి
నిర్మాత : సుమయ రెడ్డి, దర్శకుడు : సాయి రాజేష్ మహాదేవ్
విడుదల తేది : 18.04.2025

తెలుగమ్మాయి అయిన సుమయ రెడ్డి ( Heroine, Producer, and Writer Sumaya Reddy) హీరోయిన్‌గా, నిర్మాతగా, రచయితగా సుమ చిత్ర ఆర్ట్స్ బ్యానర్ లో ‘డియర్ ఉమ’ అనే సందేశాత్మక చిత్రం ఈ రోజు థియేటర్ లలో విడుదల అయ్యింది. కమల్ కామరాజు, సప్త గిరి, అజయ్ ఘోష్, ఆమని, రాజీవ్ కనకాల, పృథ్వీరాజ్, రూప లక్ష్మీ ప్రదాన తారాగణంగా పృథ్వీ అంబర్(Hero Pridhiv Ambar) హీరోగా నటించిన ఈ చిత్రానికి సాయి రాజేష్ మహాదేవ్ (Sai Rajesh Mahadev) స్క్రీన్ ప్లే, మాటలు, దర్శకత్వ బాధ్యతలు నిర్వర్తించారు. చిత్రం ఏ మేరకు ప్రేక్షకుడిని అలరించిందో సమీక్షలో చూద్దాం!

కథ:
ప్రాణాలు కాపాడే డాక్టర్ అవ్వాలని ఉమా (సుమయ రెడ్డి) పల్లెటూరు నుంచి సిటీకి వస్తుంది. ఆయుష్ మెడికల్ కాలేజ్‌లో జాయిన్ అవుతుంది. మరోవైపు దేవ్ (పృథ్వీ అంబర్) రాక్ స్టార్ అవ్వాలని ప్రయత్నాలు చేస్తుంటాడు. ప్రేమలో విఫలం అవ్వడంతో తాగుడుకు బానిసై దేని మీదా కాన్సర్టేట్ చేయలేక పోతాడు దేవ్. అతను చెడిపోతోన్నాడని ఆగ్రహం వ్యక్తి చేసి అతని తండ్రి ఇంట్లోంచి గెంటేస్తాడు. అక్కడా ఇక్కడా కష్టపడుతున్న దేవ్‌కి ఓ అమ్మాయిని కాపాడే ప్రయత్నంలో గుండెకు గాయం అవుతుంది. ట్రైనీ డాక్టర్‌గా ఉమ చదువుతున్న ఆయుష్ హాస్పిటల్లోనే దేవ్‌ని జాయిన్ చేస్తారు. అక్కడే దేవ్ అన్నయ్య సూర్య (కమల్ కామరాజ్)(Kamal Kama Raju) కూడా అడ్మినేస్ట్రటర్ గా పని చేస్తాడు. అయితే ఆ హాస్పిటల్ నుంచి దేవ్ డిశ్చార్జ్ అయిన తరువాత ఆర్ట్ గ్యాలరీలో పని చేస్తుంటాడు. ఆ టైంలోనే ఉమతో దేవ్‌కి పరిచయం ఏర్పడుతుంది. ఉమతో కొన్ని రోజుల ప్రయాణం తర్వాత దేవ్ ఓ నిజాన్ని తెలుసుకుంటాడు. దేవ్ తెలుసుకున్న ఆ నిజం ఏంటి?.. అసలు ఉమకి ఏమైంది?.. ఉమ కోసం దేవ్ ఏం చేశాడు? అన్నది కథ.

నటీనటుల హవాబావాలు:
ఉమ పాత్రలో సుమయ రెడ్డి చక్కగా నటించింది. ఇక నిర్మాతగా, రచయితగా, నటిగా సుమయ రెడ్డి తన వంతు న్యాయం చేసింది. అందరి హృదయాలను కదిలించి, అవగాహన కల్పించి, మనసును మేల్కొపే కథను రాయడంలో సుమయ సక్సెస్ అయింది. ఎమోషన్స్ పలికించడంలో, తెరపై అందంగా కనిపించడంలోనూ సుమయ రెడ్డి తన మార్క్ వేసింది. హీరోగా పృథ్వీ అంబర్ యాక్షన్, ఎమోషన్ ఇలా అన్ని రకాల ఎమోషన్స్‌ను పలికించాడు. కమల్ కామరాజ్ యాక్టింగ్ బాగుంటుంది. అజయ్ ఘోష్ పాత్ర మెప్పిస్తుంది. ఫైమా, లోబో, సప్తగిరి, భద్రం పోషించిన పాత్రలు పర్వాలేదనిపిస్తాయి.

సాంకేతికవర్గం పనితీరు:
“డియర్ ఉమర్” సినిమా చూసిన తర్వాత వైద్య రంగంపై ఒక రకమైన ఆలోచన కలుగుతుంది. సినిమాలో చూపించిన అన్యాయాలు నిజంగా కలచివేసేలా ఉన్నాయి. దర్శకుడు సాయి రాజేష్ ఈ కథను చాలా బాగా తెరకెక్కించారు. ముఖ్యంగా ప్రస్తుత పరిస్థితులకు అద్దం పట్టేలా ఉండటం మెచ్చుకోదగ్గ విషయం. రధన్ సంగీతం సినిమా యొక్క భావోద్వేగాలను మరింత పెంచింది. రాజ్ తోట కెమెరా పనితనం చాలా సహజంగా అనిపించింది, సినిమా చూస్తున్నంతసేపు ఒక వాస్తవిక ప్రపంచంలో ఉన్నట్టు అనిపించింది. ‘గుడిలో దేవుడి వద్ద చేసే ప్రార్థనల కన్నా.. హాస్పిటల్‌లో నాలుగు గోడల మధ్య చేసే ప్రార్థనేలా ఎక్కువ’ ‘రెండు జీవితాలు.. రెండు ప్రపంచాలు.. రెండు భావోద్వేగాలు.. ఇద్దరి ప్రేమలు.. ఒక హృదయం.. ఒక యుద్దం’, ‘పేషెంట్స్‌కి, డాక్టర్లకు మధ్య మీలాంటి కమిషన్స్ ఏజెన్సీ, బ్రోకర్లు ఉండకూడదు సర్.. దీని కోసం నేను ఎంత దూరమైనా వెళ్తాను’ అనే డైలాగ్స్ ఎంతో ఎమోషనల్‌గా అనిపించాయి. స్క్రీన్ ప్లే అయితే అద్భుతం! ఇంటర్వెల్ మరియు క్లైమాక్స్ సీన్స్ నన్ను షాక్‌కు గురిచేశాయి. క్లైమాక్స్‌లోని పాట సినిమా యొక్క ముఖ్య ఉద్దేశాన్ని చాలా స్పష్టంగా చెప్పింది.

విశ్లేషణ :
సినిమా చూసిన తర్వాత ఒక మంచి సందేశాన్ని అందుకున్నాననే భావన కలిగింది. సమాజాన్ని మేల్కొలిపే చక్కటి సందేశాన్ని ఇవ్వడానికి ప్రయత్నం చేసారు సుమయ రెడ్డి. లవ్, ఫ్యామిలీ, యాక్షన్ డ్రామా ఇలా అన్ని వర్గాల ప్రేక్షకులను ఆకట్టుకునేలా సినిమా వుంది. తప్పకుండా చూడాల్సిన సినిమా ఇది. సుమ చిత్ర ఆర్ట్స్ బ్యానర్ మీద నిర్మాతగా తొలి ప్రాజెక్టునే గొప్పగా నిర్మించి మన తెలుగమ్మాయి సుమయ రెడ్డి సక్సెస్ అయిందని చెప్పొచ్చు.