భారీ ప్లాన్ తో ముందుకెళ్తున్న నిర్మాణ సంస్థ
- Published By: Sravani
- May 14, 2026 / 02:03 PM IST
తమిళ స్టార్ హీరో విజయ్(Vijay) నటిస్తున్న జన నాయగన్(Jana Nayagan), కన్నడ స్టార్ యష్(Yash) ప్రధాన పాత్రలో రూపొందుతున్న టాక్సిక్(Toxic) సినిమాలపై భారీ అంచనాలు నెలకొన్నాయి. ఈ రెండు సినిమాలను ప్రతిష్టాత్మక నిర్మాణ సంస్థ కెవిఎన్ ప్రొడక్షన్స్(KVN Productions) అత్యంత భారీ బడ్జెట్తో నిర్మిస్తోంది. అయితే షూటింగ్ ఆలస్యం, ప్రొడక్షన్ సంబంధిత సమస్యలు, మార్కెట్ పరిస్థితులు వంటి కారణాలతో ఈ రెండు ప్రాజెక్టులు అనుకున్న సమయానికి పూర్తి కాలేకపోయాయి. దీంతో నిర్మాతలపై భారీ ఆర్థిక భారం పడినట్టు సినీ వర్గాల్లో చర్చ జరుగుతోంది. ముఖ్యంగా ఈ రెండు సినిమాలపై పెట్టుబడులు భారీగా ఉండటంతో డిజిటల్ రైట్స్ డీల్స్ ఇప్పుడు కీలకంగా మారాయి.
ఇటీవల తమిళనాడు రాజకీయాల్లో విజయ్ ప్రభావం పెరగడం, అసెంబ్లీ ఎన్నికల్లో ఆయన పార్టీకి వచ్చిన విజయంతో జన నాయగన్ పై ట్రేడ్ వర్గాల్లో ఆసక్తి మరింత పెరిగిందని సమాచారం. ఈ క్రేజ్ను క్యాష్ చేసుకునేందుకు నిర్మాతలు ప్రముఖ ఓటీటీ సంస్థలతో చర్చలు ప్రారంభించినట్టు తెలుస్తోంది. ఇప్పటికే పలు డిజిటల్ ప్లాట్ఫాంలు జన నాయగన్ స్ట్రీమింగ్ హక్కుల కోసం ఆసక్తి చూపుతున్నాయని టాక్ వినిపిస్తోంది. మరోవైపు టాక్సిక్ డిజిటల్ రైట్స్ను కూడా అదే ప్లాట్ఫామ్కు విక్రయించే దిశగా ప్రయత్నాలు జరుగుతున్నాయని సమాచారం.
ముఖ్యంగా అమెజాన్ ప్రైమ్ వీడియో(Amazon Prime Video) మరోసారి ఈ రెండు సినిమాల డిజిటల్ హక్కుల కోసం చర్చల్లోకి వచ్చినట్టు ఇండస్ట్రీ వర్గాలు చెబుతున్నాయి. తొలుత టాక్సిక్కు నిర్మాతలు చెప్పిన భారీ ధరకు ఓటీటీ సంస్థలు వెనక్కి తగ్గినప్పటికీ, ఇప్పుడు పరిస్థితులు మారుతున్నాయని అంటున్నారు. రెండు సినిమాల డీల్స్ను ఒకేసారి క్లోజ్ చేసి రికార్డు స్థాయి ఒప్పందం కుదుర్చుకోవాలన్న టార్గెట్తో కెవిఎన్ ప్రొడక్షన్స్ ముందుకు సాగుతోందట. ఈ డీల్స్ పూర్తయితే జన నాయగన్, టాక్సిక్ రిలీజులపై కూడా స్పష్టత వచ్చే అవకాశాలు కనిపిస్తున్నాయి.
