Nirmala Sitharaman: మధ్యతరగతి ప్రజలకు ఊరట కలిగించిన నిర్మలా సీతారామన్..

కేంద్ర ఆర్థిక శాఖ మంత్రి నిర్మలా సీతారామన్ (Nirmala Sitharaman) తాజాగా 2025-26 వార్షిక బడ్జెట్‌ను (Annual Budget) ప్రవేశపెట్టారు. ఈ సందర్భంగా, మధ్య తరగతి మరియు నిరుపేద ప్రజలకు ఊరట కలిగించే కీలక ప్రకటన చేశారు. ముఖ్యంగా, సంవత్సరానికి రూ.12 లక్షల ఆదాయం కలిగిన వారికి ట్యాక్స్ మినహాయింపు (Tax exemption) ఇచ్చినట్లు ప్రకటించారు. ఈ నిర్ణయం వల్ల మిడిల్ క్లాస్ ప్రజలకు రూ.80 వేలు పన్ను ఆదా కానుంది.

అలాగే, రూ.16 లక్షల నుంచి రూ.20 లక్షల వరకు ఆదాయం గలవారిపై 20 శాతం పన్ను, రూ.20 లక్షల నుంచి రూ.24 లక్షల వరకు ఆదాయంపై 25 శాతం పన్ను విధించనున్నట్లు తెలిపారు. కొత్త ఇన్‌కం ట్యాక్స్ బిల్లు త్వరలోనే ప్రవేశపెట్టనున్నామని, ఇది పన్ను చెల్లింపుదారులకు మరింత అనుకూలంగా ఉంటుందని మంత్రి వెల్లడించారు. ఇందులో లిటిగేషన్ సమస్యలను తగ్గించేందుకు అవసరమైన మార్పులు చేయనున్నట్లు పేర్కొన్నారు.

ఇంకా, చిన్న స్థాయి పన్ను చెల్లింపుదారులకు ఊరట కలిగేలా టీడీఎస్ విధించబోమని స్పష్టంగా తెలిపారు. దీని ద్వారా చిన్న వ్యాపారదారులు, స్వయం ఉపాధికి నడుస్తున్న వ్యక్తులకు మరింత సహాయం అందనుంది. ఆదాయపు పన్ను వ్యవస్థను మరింత సరళతరం చేయడానికి కేంద్రం కీలక నిర్ణయాలు తీసుకుంటుందని మంత్రి వెల్లడించారు.  భీమా రంగంలో కూడా ప్రభుత్వం కీలక నిర్ణయాలు తీసుకుంది. వంద శాతం విదేశీ ప్రత్యక్ష పెట్టుబడులకు (FDI) ఆమోదం తెలిపినట్లు ప్రకటించారు. దీనివల్ల భీమా రంగంలో మరిన్ని పెట్టుబడులు రావచ్చని, ఉద్యోగావకాశాలు పెరిగే అవకాశం ఉందని భావిస్తున్నారు. అంతేగాక, ఇన్‌కం టాక్స్ చట్టంలోని అనవసర సెక్షన్లను తొలగించేందుకు కేంద్రం సిద్ధమవుతోంది.

వచ్చే వారం కొత్త వ్యక్తిగత ఆదాయపు పన్ను బిల్లును సభలో ప్రవేశపెట్టనున్నట్లు మంత్రి తెలిపారు. ప్రస్తుతం బడ్జెట్‌లో దీని గురించి ప్రస్తావించనప్పటికీ, దీనికి ప్రత్యేకంగా ఒక బిల్లు రూపొందించి చట్టసభ ముందుకు తీసుకురాబోతున్నట్లు పేర్కొన్నారు. ఈ నిర్ణయాలన్నీ మిడిల్ క్లాస్, చిన్న వ్యాపారులు, నిరుపేద ప్రజలకు ప్రయోజనకరంగా మారనున్నాయి. పన్ను మినహాయింపులు, కొత్త బిల్లుతో పన్ను చెల్లింపుదారులకు తక్కువ భారం పడేలా చూడటమే కేంద్ర ప్రభుత్వ లక్ష్యమని ఆర్థిక మంత్రి స్పష్టం చేశారు.