23 లక్షల ట్విటర్ ఖాతాలు బ్లాక్ .. ఎందుకో తెలుసా?

నిబంధనలను ఉల్లంఘించిన యూజర్లపై ట్విటర్‌ కఠిన చర్యలకు దిగుతోంది. జూన్‌-జులై నెలల్లో రికార్డు స్థాయిలో 23,95,495 ఖాతాలను బ్లాక్‌ చేసినట్లు ట్విటర్‌ వెల్లడించింది. చిన్నారులపై లైంగిక దోపిడీ, అశ్లీలతను ప్రోత్సహించేలా పోస్టులు చేసిన ఖాతాలే ఇందులో ఎక్కువగా ఉన్నట్లు పేర్కొంది. అంతకుముందు మే 26 నుంచి జూన్‌ 25 మధ్య నెల రోజుల వ్యవధిలో 5,44,473 ఖాతాలను ట్విటర్‌ బ్లాక్‌ చేసిన విషయం తెలిసిందే. అంతేకాకుండా ఉగ్రవాద చర్యలను ప్రోత్సహిస్తున్న 1,772 అకౌంట్లను నిషేధించినట్లు వెల్లడిరచింది. భారత్‌ తీసుకొచ్చిన నూతన ఐటీ చట్టాలకు అనుగుణంగా ట్విటర్‌ ప్రతి నెలా సమ్మతి నివేదికలను విడుదల చేస్తోంది. ఇందులో భాగంగానే అనైతిక చర్యలకు పాల్పడుతున్న వినియోగాదారులపై తీసుకున్న చర్యలను, వినియోగదారుల ఫిర్యాదులకు తాము చూపించిన పరిష్కారాలను వివరిస్తూ ప్రతి నెలా నివేదికను విడుదల చేస్తోంది.  గతేడాది ఇదే  సమయంలో జూన్‌ 26 నుంచి జులై 25 మధ్య కాలంలోనే 18,51,022 ఖాతాలను బ్లాక్‌ చేసినట్లు ట్విటర్‌ అప్పట్లో పేర్కొంది.