Nellore: నెల్లూరులో కనుమరుగవుతున్న వైసీపీ. దూసుకుపోతున్న టీడీపీ..
- Published By: techteam
- November 24, 2025 / 04:56 PM IST
ఆంధ్రప్రదేశ్ రాజకీయాల్లో పరిస్థితులు ఎంత వేగంగా మారుతాయి అనడానికి నెల్లూరు (Nellore) జిల్లానే నిదర్శనం. రాజకీయాల్లో గెలుపు–ఓటములు సహజమే కానీ, కొన్ని సందర్భాల్లో పార్టీలు అంచనా వేయలేని మార్పులను ఎదుర్కొంటాయి. ఒకప్పుడు రాష్ట్రాన్ని బలంగా పాలించిన కాంగ్రెస్ (Congress Party) ఇప్పుడంటే చరిత్రలోనే మిగిలిపోయింది. అదే పరిస్థితి వైఎస్సార్ కాంగ్రెస్ పార్టీ (YSR Congress) కు కూడా మెల్లగా దూసుకువస్తున్నట్లు కనిపిస్తోంది. 2024 ఎన్నికల తర్వాత ఆ పార్టీ అనేక జిల్లాల్లో ఎదురుదెబ్బలు తగుల్కొంటూ సంస్థాగతంగా బలహీనపడుతోంది. రాయలసీమతో పాటు నెల్లూరు, ప్రకాశం జిల్లాలు ఆ పార్టీకి అత్యంత బలమైన కోటలు కాగా, ఇప్పుడు ఆ కోటలే ఒక్కొక్కటిగా కూలిపోతున్నాయి.
నెల్లూరు జిల్లా వైఎస్సార్ కాంగ్రెస్‌కు అత్యంత విశ్వసనీయ ప్రాంతం. 2014, 2019 ఎన్నికల్లో అక్కడ పార్టీ తిరుగులేని విజయాలు సాధించింది. కానీ 2024లో పరిస్థితి పూర్తిగా మారిపోయింది. ఆ ఎన్నికల ఫలితాలు మొదలై అనేక స్థానిక నేతలు వరుసగా పార్టీని వీడటం వల్ల అక్కడ వైసీపీ తరఫున నిలబడే గట్టి నేతలు కొరవయ్యారు. అసంతృప్తి, నేతల అంతర్గత విభేదాలు, నాయకత్వంపై ఉన్న అసంతృప్తి—ఇలా అన్ని కలిసి ఆ పార్టీ అక్కడ నిలబడే అవకాశం లేకుండా చేశాయి. ఈ పరిస్థితే అక్కడ తెలుగు దేశం పార్టీ (TDP)కి పెద్ద అవకాశం కల్పించింది. ఇప్పటివరకు వైసీపీకి ఏకపక్షంగా ఉన్న ప్రాంతంలో పట్టు బిగించేందుకు కూటమి వేగంగా కదులుతోంది.
ఈ సమయంలో నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి (Kotamreddy Sridhar Reddy), సిటీ ఎమ్మెల్యే ,మంత్రి డా. నారాయణ (Dr. Narayana) ముందంజలో ఉన్నారు. వారి నేతృత్వంలో కార్పొరేషన్ రాజకీయాలు వేడెక్కుతున్నాయి. 56 డివిజన్లున్న నెల్లూరు మున్సిపల్ కార్పొరేషన్ (Nellore Municipal Corporation) ఒకప్పుడు పూర్తిగా వైసీపీ చేతిలో ఉండేది. కానీ కూటమి అధికారంలోకి వచ్చిన తర్వాత అటు వైసీపీ కార్పొరేటర్లు పెద్ద ఎత్తున టిడిపిలో చేరారు. ఇప్పుడు టిడిపి బలం స్పష్టంగా పెరగడంతో వైసీపీ మేయర్‌పై అవిశ్వాస తీర్మానం తీసుకొచ్చే ప్రయత్నాలు జరుగుతున్నాయి. తద్వారా నెల్లూరులో వైసీపీ ప్రభావాన్ని పూర్తిగా ముగించాలని కూటమి లక్ష్యంగా పెట్టుకుంది.
జగన్మోహన్ రెడ్డి (Y. S. Jagan Mohan Reddy) నెల్లూరు విషయంలో నాయకత్వ నిర్ణయాల్లో తప్పిదాలు చేసినట్లు విశ్లేషకులు భావిస్తున్నారు. పార్టీకి బలంగా పనిచేసిన ప్రభాకర్ రెడ్డి, కోటంరెడ్డి వంటి నేతలను దూరం చేసుకోవడం ఆ పార్టీకి పెద్ద నష్టమైంది. అవమానించబడ్డామనే భావనతో ఆ నేతలే ఇప్పుడు వైఎస్సార్ కాంగ్రెస్‌కు ప్రధాన ప్రత్యర్థులయ్యారు. అసెంబ్లీ ఎన్నికల్లో ప్రారంభమైన వైసీపీ పరాభవం, కార్పొరేషన్ పీఠం కోల్పోవడం ద్వారా పూర్తిస్థాయిలో నెరవేరుతుందని వారు భావిస్తున్నారు. ఈ పరిణామాలు చూస్తుంటే నెల్లూరులో వైసీపీ పునరుద్ధరణ ఇప్పటికైతే కష్టసాధ్యమే. కనీసం 2029 ఎన్నికల్లోపు డ్యామేజీ కంట్రోల్ జరగకపోతే నెల్లూరు వైసీపీ చేతుల్లోంచి పూర్తిగా జారిపోతుంది.
