Pawan Kalyan: గోదావరి జిల్లాల్లో జనసేన బలం పెంచే దిశగా పవన్ మాస్టర్ ప్లాన్..

ఇటీవలి రోజుల్లో జనసేన (Janasena) అధినేత, ఉప ముఖ్యమంత్రి పవన్ కళ్యాణ్ (Pawan Kalyan) భవిష్యత్ రాజకీయ యత్నాలు ఏ దిశగా సాగుతున్నాయన్నది పెద్ద చర్చకు దారితీసింది. ప్రస్తుతం కాకినాడ జిల్లా (Kakinada District) లోని పిఠాపురం (Pithapuram) నుంచి శాసనసభ్యుడిగా పని చేస్తున్న ఆయన, ఈ ప్రాంతాన్ని తన కీలక రాజకీయ కేంద్రంగా మార్చే ప్రయత్నాలు చేస్తున్నారని రాజకీయ వర్గాల్లో టాక్ నడుస్తోంది. గోదావరి పరిసర జిల్లాలు జనసేనకు బలమైన అడ్డాగా ఉన్న నేపథ్యంలో, పవన్ ఈ ప్రాంతంలో పార్టీ బలం మరింత పెంచాలని భావిస్తున్నారని విశ్లేషకుల అభిప్రాయం.

ఎన్నికల తర్వాత పిఠాపురంలో శాశ్వతంగా ఉండాలన్న తన నిర్ణయాన్ని పవన్ వెల్లడించినప్పటికీ, ఇప్పటివరకు ఆయన ఎక్కువ సమయం అమరావతి (Amaravati), హైదరాబాద్ (Hyderabad) మధ్యే గడుపుతున్నారు. అయితే, ఇటీవల ఆయన చర్యలు గమనిస్తే పిఠాపురంలో ఎక్కువ సమయం గడపాలన్న భావన బలపడుతున్నట్టు కనిపిస్తోంది. ఇప్పుడు పిఠాపురంలో ఆయన కొనుగోలు చేసిన సుమారు 18 ఎకరాల భూమిలో ఇల్లు, అలాగే ప్రత్యేకంగా జనసేన పార్టీ కార్యాలయం నిర్మాణం కొనసాగుతోంది. అక్కడ సౌకర్యాలు పూర్తికాగానే ఆయన తరచూ పిఠాపురంలోనే ఉండే అవకాశం ఉందని స్థానిక నేతలు చెబుతున్నారు.

తాజాగా ఈ భూమికి ఆనుకుని ఉన్న మరో 3 ఎకరాల స్థలాన్ని కూడా పవన్ కొనుగోలు చేసే ఆలోచనలో ఉన్నారని సమాచారం. పార్టీ కార్యకర్తలు, నాయకులు ఆయనను కలిసేందుకు వచ్చే సందర్భాల్లో ఎలాంటి ఇబ్బంది లేకుండా ఉండేందుకు వసతి గదులు, మీటింగ్ హాల్స్, పార్కింగ్ స్థలాలు వంటి సదుపాయాలను కూడా ఏర్పాటు చేయాలని పవన్ నిర్ణయించారని అంటున్నారు. ఇది కేవలం నివాసం కోసం మాత్రమే కాకుండా, పార్టీ కార్యకలాపాలకు శాశ్వత కేంద్రం ఏర్పాటు చేయాలనే సంకల్పంగానే భావిస్తున్నారు.

గోదావరి జిల్లాల్లో జనసేనకు ఉన్న మద్దతు పార్టీ భవిష్యత్తుకు ఎంతో కీలకమని పవన్ అర్థం చేసుకున్నారని రాజకీయ వర్గాలు చెబుతున్నాయి. ఈ ప్రాంతాల్లో పార్టీ బలం స్థిరంగా ఉంటేనే కూటమి ప్రభుత్వం వివిధ టర్ముల్లో కొనసాగగలదనే భావన ఆయనలో ఉన్నట్టు తెలుస్తోంది. అందుకే ఇక్కడి 32 నియోజకవర్గాల్లో జనసేన ప్రభావాన్ని మరింత పెంచే కార్యక్రమాలకు రూపకల్పన జరుగుతోంది. పిఠాపురం ఈ కార్యకలాపాలన్నింటికి కేంద్ర బిందువుగా మారబోతుందని స్థానిక నాయకుల అభిప్రాయం.

మొత్తంగా చూస్తే, పవన్ కళ్యాణ్ రాజకీయ ప్రణాళికలో పిఠాపురం ఒక కీలక స్థానం సంపాదిస్తున్నది. ఇక్కడ కార్యాలయాలు, వసతి గదులు, సమావేశాల కోసం ప్రత్యేక స్థలాలు అభివృద్ధి చేయడం ఆయన భవిష్యత్ రాజకీయ వ్యూహానికి సంకేతం అని విశేషకులు పేర్కొంటున్నారు. రాబోయే ఎన్నికల దృష్ట్యా గోదావరి జిల్లాల్లో జనసేనను మరింత పటిష్టం చేయడం, పిఠాపురాన్ని శక్తివంతమైన రాజకీయ కేంద్రంగా మార్చడమే పవన్ లక్ష్యమని తెలుస్తోంది.