Amaravathi: అమరావతి పరిసరాల్లో మావోయిస్టుల అరెస్టులు.. వారి టార్గెట్ ఎవరు?

ఆంధ్రప్రదేశ్‌లో ఇటీవల మావోయిస్టుల సంచలన చలనం ప్రజల్లో ఆందోళన కలిగిస్తోంది. కొన్ని సంవత్సరాలుగా పెద్దగా ఎలాంటి కదలికలు లేకుండా ఉన్న మావోయిస్టులు ఒక్కసారిగా రాష్ట్రంలోని ముఖ్య ప్రాంతాలకు చేరుకోవడం, పట్టణాల్లో ఆశ్రయం తీసుకోవడం పోలీసులు అప్రమత్తం అయ్యేలా చేసింది. అల్లూరి జిల్లా మారేడుమిల్లి అటవీ ప్రాంతంలో అగ్రనేత హిడ్మా (Hidma) ఎన్‌కౌంటర్ జరిగిన కొద్ది గంటల్లోనే విజయవాడ (Vijayawada), ఏలూరు (Eluru), కాకినాడ (Kakinada), అమలాపురం (Amalapuram) వంటి నగరాల్లో దాక్కున్న 50 మందికి పైగా మావోయిస్టులను పోలీసులు అదుపులోకి తీసుకోవడం పరిస్థితిని మరింత ఉద్రిక్తం చేసింది. ప్రత్యేకంగా విజయవాడలోనే 30 మంది పట్టుబడటంతో వారు ఏదో పెద్ద ప్రణాళికతో వచ్చారని ఆందోళనలు వ్యక్తమవుతున్నాయి.

ముఖ్యంగా అమరావతి (Amaravati) రాజధాని పరిసర ప్రాంతాల్లో మావోయిస్టుల కదలికలుండటం ఆశ్చర్యానికి గురిచేస్తోంది. అధికార యంత్రాంగం, రాజకీయ నాయకుల రాకపోకలు ఎక్కువగా జరిగే పట్టణం విజయవాడ కావడంతో అక్కడ మావోయిస్టుల తలదాచుకోవడం అనేక ప్రశ్నలు లేవనెత్తుతోంది. గవర్నర్ (Governor) , ముఖ్యమంత్రి చంద్రబాబు (N. Chandrababu Naidu), ఉప ముఖ్యమంత్రి, మంత్రులు, ప్రధాన కార్యదర్శులు, ఉన్నతాధికారులంతా తరచూ ఈ ప్రాంతం మీదుగానే ప్రయాణిస్తుండటంతో ఇది వారికి లక్ష్యంగా మారి ఉండొచ్చని పోలీసుల అభిప్రాయం.

దండకారణ్యంలో ఒత్తిడికి గురైన మావోయిస్టులు తమ ఉనికిని సూచించడానికి రాష్ట్రంలో ఏదైనా దాడికి ప్రయత్నిస్తున్నారా అన్న అనుమానాలు వ్యక్తమవుతున్నాయి. ముఖ్యంగా అగ్రనేత దేవ్ జీ (Dev Ji), హిడ్మా అనుచరులు విజయవాడలోనే కనిపించడం పోలీసులు పరిశీలిస్తున్న అంశం. పట్టుబడిన మావోయిస్టులు న్యూ ఆటోనగర్ (New Autonagar) పక్కనే ఉన్న ప్రాంతంలో దాగి ఉన్నారు. ఆ ప్రాంతంలో ఉన్న ఓ కన్వెన్షన్ హాల్‌లో ముఖ్యమంత్రి చంద్రబాబు తరచూ హాజరవుతారని తెలియడంతో మావోయిస్టుల ఆ ప్రాంతంపైనే దృష్టి ఉందా అనే కోణంలో విచారణ జరుగుతోంది.

పోలీసుల దర్యాప్తులో బయటపడిన వివరాల ప్రకారం, పదిరోజుల క్రితమే మావోయిస్టులు కూలీల వేషంలో న్యూ ఆటోనగర్‌కు వచ్చి అక్కడి ఒక కమర్షియల్ భవనంలోని మూడో అంతస్తును అద్దెకు తీసుకున్నారు. ఆ భవనంలో షట్టర్లు ఉన్నప్పటికీ వారు అద్దెకు తీసుకున్న స్థలానికి నిరంతరం ఆహారం కారులో పంపిణీ చేయబడటం స్థానికులకు అనుమానం కలిగించింది. పదిరోజుల పాటు బయటకు ఒక్కరూ రాకపోవడం కూడా ఆ అనుమానాలను మరింత బలపరిచింది.

స్థానికులు అనుమానంతో ఆ కారులో భోజనం తీసుకొచ్చే వ్యక్తిని ప్రశ్నించినప్పుడు వారు కూలీలుగా కొత్త కంపెనీ ప్రారంభానికి సిద్ధమవుతున్నారని చెప్పాడని సమాచారం. అయితే పోలీసులు అరెస్టు చేసిన తర్వాతే వారు మావోయిస్టులని తెలిసి ప్రజలు షాక్‌కు గురయ్యారు. వారికి ఆహారం సరఫరా చేసిన వ్యక్తి ఎవరు? అన్నది ఇప్పుడంతటా చర్చనీయాంశమైంది. నగరానికి చెందిన ఒక మహిళ మావోయిస్టు సానుభూతిపరురాలు (sympathiser) గా వ్యవహరించి వారికి సహాయం చేసిందని అనుమానాలు వ్యక్తమవుతున్నాయి. ఆ మహిళ ఎవరో తెలుసుకోవాలని విజయవాడ ప్రజలు ఉత్కంఠగా ఎదురుచూస్తున్నారు. ఈ నేపథ్యంలో మునుముందు పరిస్థితులు ఎటువంటి మలుపు తీసుకుంటాయి అన్న విషయం కూడా ఆసక్తిగా మారింది.