Chandrababu: పింఛన్ పంపిణీ నుంచి రోజువారీ షెడ్యూళ్ల వరకు… ఎమ్మెల్యేల పనితీరులో మార్పు

ఏపీలో (Andhra Pradesh) కూటమి పాలన కొనసాగుతున్న నేపథ్యంలో ప్రభుత్వం చేపడుతున్న కార్యక్రమాలకు ఎమ్మెల్యేల హాజరు, వారి బాధ్యతలు ఇప్పుడు పెద్ద చర్చగా మారాయి. ప్రస్తుతం కూటమి ప్రభుత్వంలో మొత్తం 164 మంది ఎమ్మెల్యేలు ఉండగా, వారిలో 134 మంది తెలుగుదేశం పార్టీ (TDP)కి చెందినవారే. ముఖ్యమంత్రి చంద్రబాబు నాయుడు (N. Chandrababu Naidu) ,మంత్రి నారా లోకేష్ (Nara Lokesh) విషయాన్ని పక్కన పెడితే, మిగిలిన శాసన సభ్యులు రోజువారీ కార్యాచరణను స్వయంగా పర్యవేక్షిస్తూ మరింత అప్రమత్తంగా మారడం గమనార్హం.

ఇటీవల వరకు ఎమ్మెల్యేల కార్యక్రమాలకు సంబంధించిన ప్రణాళికలు, షెడ్యూళ్లు వారి వ్యక్తిగత సహాయకులు (PAs) చూసుకునేవారు. అయితే గత నెల నుంచి పరిస్థితి మారింది. చాలా మంది ఎమ్మెల్యేలు తమ డైరీలను తామే రాసుకుంటూ, ఏ రోజున ఏ కార్యక్రమానికి హాజరవ్వాలి, ఏ పనికి ప్రాధాన్యం ఇవ్వాలి అనే విషయాలపై స్వయంగా నిర్ణయాలు తీసుకుంటున్నారు. ఈ విషయాన్ని కొంతమంది ఎమ్మెల్యేలు స్వయంగా సీఎం చంద్రబాబు నాయుడుకు వివరించినట్లు తెలిసింది.

దీనికి ప్రధాన కారణం— ముఖ్యమైన ప్రభుత్వ కార్యక్రమాలు జరిగే రోజుల్లో ఎమ్మెల్యేల హాజరు తప్పనిసరి అని సీఎం స్పష్టం చేయడమే. ప్రతి నెల 1వ తేదీన పింఛన్ల పంపిణీ కార్యక్రమం జరుగుతుందని, ఆ రోజు ఏ నియోజకవర్గంలో అయినా శాసన సభ్యులు ఉండాల్సిందే అని ఆయన స్పష్టం చేసినట్లు సమాచారం. “మీరు ఏ కార్యక్రమాలు చేస్తున్నారో నాకు పూర్తిగా తెలుసు. కనీసం ప్రజలకు నేరుగా చేరే కార్యక్రమాల్లో తప్పకుండా ఉండాలి” అని సీఎం చెప్పినట్లు పార్టీ వర్గాలు చెబుతున్నాయి.

గత నెలలో చంద్రబాబు ఇచ్చిన ఈ స్పష్టమైన సూచన నేపథ్యంలో కూడా , ఈ నెల 1వ తేదీన కూడా కొందరు ఎమ్మెల్యేలు పింఛన్ పంపిణీ కార్యక్రమానికి హాజరుకాలేదు. దీంతో పార్టీ కార్యాలయం నుండి వెంటనే సమాచారాన్ని సేకరించి, ఎవరు హాజరయ్యారు, ఎవరు హాజరుకాలేదో పూర్తి వివరాలను నమోదు చేశారు.

ఈ పరిణామాల తర్వాత ఎమ్మెల్యేల్లో కొత్త శ్రద్ధ పెరిగింది. వారు తమ డైరీల్లో ముఖ్యమైన తేదీలను స్పష్టంగా నమోదు చేసి, మరికొందరు మొబైల్ ఫోన్లలో రిమైండర్ యాప్‌లు డౌన్‌లోడ్ చేసి, ఏ కార్యక్రమం మిస్ కాకుండా జాగ్రత్త పడుతున్నారు. ప్రజలతో నేరుగా కలిసే ఈ కార్యక్రమాలకు తమ హాజరు ఎంతో కీలకమని ఇప్పుడు వారికి స్పష్టమైంది. మొత్తానికి, సీఎం సూచనలతో పాటు పార్టీ నుంచి వచ్చిన హెచ్చరికలు కూడా ఎమ్మెల్యేల పనితీరులో క్రమశిక్షణ పెంచుతున్నాయి. బాధ్యతలు గుర్తించిన నాయకులు ఇకపై ప్రజా కార్యక్రమాల్లో మరింత చురుకుగా వ్యవహరించే అవకాశం కనిపిస్తోంది.