Chandrababu: తొలిసారి పొత్తులపై స్పష్టత ఇచ్చిన బాబు..
- Published By: techteam
- November 20, 2025 / 01:20 PM IST
ఆంధ్రప్రదేశ్ ముఖ్యమంత్రి నారా చంద్రబాబు నాయుడు (Chandrababu Naidu) ఇటీవల కడప జిల్లా కమలాపురం (Kamalapuram) లో జరిగిన పర్యటనలో ప్రజలతో అనేక అంశాలు పంచుకున్నారు. రాజకీయ విమర్శలకు లాజిక్‌తో జవాబు ఇస్తూ, అభివృద్ధి కోసం తాను తీసుకుంటున్న నిర్ణయాల వెనుక ఉన్న ఉద్దేశాన్ని స్పష్టంగా వివరించారు. ప్రతిపక్షాలు ఎప్పటి నుంచో “బాబు పొత్తులు పెట్టుకుంటారు, ఒంటరిగా పోటీ చేయలేరు” అని విమర్శిస్తుంటే, ఈ సభలో బాబు ఆ విమర్శలకు స్పష్టమైన సమాధానం ఇచ్చారు.
అభివృద్ధి వేగంగా జరిగేలా కేంద్రం–రాష్ట్రం కలిసి పనిచేయాల్సిన అవసరం ఉందని ఆయన తెలిపారు. అందుకే తాను రాజకీయ పొత్తులను ఏర్పరిచానని చెప్పారు. డబుల్ ఇంజిన్ ప్రభుత్వం ఉంటే రాష్ట్రానికి మేలు జరుగుతుందని, తీసుకున్న నిర్ణయాలన్నీ ప్రజల ప్రయోజనాల కోసమే అని చంద్రబాబు వివరించారు. అభివృద్ధి కోసం అవసరమైతే ఏ నిర్ణయం అయినా తీసుకుంటానని ఆయన స్పష్టం చేశారు.
ఈ సందర్బంగా బాబు తన వ్యక్తిగత జీవితంలోని కొన్ని విషయాలను కూడా పంచుకున్నారు. తాను రైతు బిడ్డనని, చిన్నతనంలో తన తండ్రికి వ్యవసాయం పనుల్లో చేయూతనిచ్చిన రోజుల్ని గుర్తుచేశారు. రైతుల బాధలు, కష్టాలు, అవసరాలు తనకు బాగా తెలుసని, అందుకే వ్యవసాయ రంగం అభివృద్ధికి ప్రత్యేక ప్రాధాన్యత ఇస్తున్నానని అన్నారు. రైతులు ఎదగాలంటే పాత పద్ధతుల దగ్గర ఆగిపోకుండా ఆధునిక వ్యవసాయ సాంకేతికతలు, కొత్త పంట పద్ధతులు అలవర్చుకోవాలని సూచించారు. ఏ ప్రాంతంలో ఏ పంటకు డిమాండ్ ఎక్కువుందో తెలుసుకుని పంటలు సాగు చేస్తే లాభాలు పెరుగుతాయని చెప్పారు.
అంతేకాకుండా, ఏపీలో పండే పంటలను అంతర్జాతీయ మార్కెట్లకు ఎగుమతి చేసే స్థాయికి రాష్ట్ర రైతులు ఎదగాలని ఆయన ఆకాంక్ష వ్యక్తం చేశారు. కూటమి ప్రభుత్వం రైతుల కోసం రూపొందించిన పంచసూత్రాలు పాటిస్తే సమస్యలు తక్షణమే తగ్గుతాయని తెలిపారు. జల వనరుల అభివృద్ధి గురించి మాట్లాడుతూ, ఏపీని పూర్తిగా కరవురహిత రాష్ట్రంగా మార్చడమే తన ప్రధాన లక్ష్యమని చంద్రబాబు నాయుడు చెప్పారు. కృష్ణా (Krishna River) , గోదావరి (Godavari River) నదులను అనుసంధానించడం ద్వారా నీటి నిల్వలు పెంచగలిగితే, ఒక సంవత్సరం వర్షాలు తక్కువగా వచ్చినా రైతులు కష్టాల్లో పడరని తెలిపారు. అన్ని చెరువులను నింపడం, భూగర్భ జలాలను పెంచడం, రాష్ట్రాన్ని ఒక పెద్ద జలాశయంలా రూపొందించడం తన దార్శనికతలో భాగమని వివరించారు. ఎలాంటి అడ్డంకులు వచ్చినా నదుల అనుసంధాన పనులను పూర్తి చేస్తామని ఆయన ధృడంగా ప్రకటించారు. కమలాపురంలో జరిగిన ఈ సభలో బాబు చెప్పిన విజన్ ప్రజల్లో విశ్వాసాన్ని కలిగించేలా ఉండటమే కాకుండా, రాష్ట్ర భవిష్యత్తు దిశను కూడా స్పష్టంగా చూపించిందని అక్కడ హాజరైన వారు అభిప్రాయపడ్డారు.
