Washington: అంతరిక్షంలో 9 నెలలు.. సునీత ప్రయాణం సాగిందిలా…?
- Published By: techteam
- March 22, 2025 / 05:10 PM IST
ఓ మిషన్ కోసం అంతరిక్షానికి వెళ్లిన సునీత విలియమ్స్(williams)…. అనుకోని పరిస్థితుల్లో అక్కడ 9 నెలల పాటు చిక్కుకుపోయారు. సునీతా (‘సుని’) విలియమ్స్, బ్యారీ ‘బుచ్’ విల్మోర్ 2024 జూన్లో బోయింగ్ స్టార్లైనర్ అంతరిక్షనౌకలో ఐఎస్ఎస్కి వెళ్లారు.అయితే, అంతరిక్ష నౌకలో తలెత్తిన సమస్యల కారణంగా ప్లాన్ ప్రకారం తిరిగి రాలేకపోయారు.అలా తొమ్మిది నెలలు గడిచాయి. అయితే, ఎనిమిది రోజుల మిషన్పై వెళ్లిన ఈ ఇద్దరు వ్యోమగాములు ఇన్ని రోజులు అక్కడ ఏం చేశారు? వారి కుటుంబ సభ్యులతో మాట్లాడారా? వారికి ఆహారం ఎలా? ఇంతకీ ఈ అంతర్జాతీయ అంతరిక్ష కేంద్రం (ఐఎస్ఎస్) ఎలా ఉంటుంది?
ఐఎస్ఎస్లో వారి దినచర్య ఏంటి?
అంతర్జాతీయ అంతరిక్ష కేంద్రం (ఐఎస్ఎస్) బకింగ్హామ్ ప్యాలెస్ పరిమాణంలో ఉంటుంది, వ్యోమగాములు ఉండే ప్రదేశం ఆరు పడక గదుల ఇల్లు లాంటిది. సునీతా విలియమ్స్, విల్మోర్లు ఐఎస్ఎస్లో మరో 10 మందితో కలిసి ఉన్నారు. అందులో నలుగురు అమెరికా వ్యోమగాములు, ముగ్గురు రష్యన్ వ్యోమగాములు, ముగ్గురు చైనీస్ టైకోనాట్స్ ఉన్నారు.ఈ ఇద్దరు వ్యోమగాములకు పడుకోవడానికి స్థలం ఉంటుంది. అక్కడి నుంచే ఈమెయిల్లు, కాల్ల ద్వారా వారి కుటుంబాలతో మాట్లాడటానికి రెండు ల్యాప్టాప్లు అందుబాటులో ఉన్నాయి.
సునీత, విల్మోర్ ఊహించిన దానికంటే ఎక్కువ సమయం అంతరిక్షంలో ఉన్నప్పటికీ, వారు అక్కడ రోజువారీ కార్యక్రమాలను నిర్వహించారు. బుచ్ విల్మోర్ 04:30 గంటలకు, సునీతా విలియమ్స్ 06:30 గంటలకు మేల్కొనేవారు. వారు సెలవులో కూడా లేరు, అక్కడ వారు చేయాల్సిన పని షెడ్యూల్ వారికి ఉంది. ఈ పనులలో ఐఎస్ఎస్ భాగాలను సరిచేయడం, సైన్స్ ప్రయోగాలు చేయడం కూడా ఉన్నాయి.
అంతరిక్షంలో గురుత్వాకర్షణ లేకపోవడంతో వారి కండరాలు, ఎముకలు బలహీనపడతాయి. అందువల్ల వ్యోమగాములు ఆరోగ్యంగా ఉండేందుకు వ్యాయామం చాలా ముఖ్యం. నాసా(NASA) రూపొందించిన పరికరాలతో ఐఎస్ఎస్లో ప్రత్యేక జిమ్ ఉంది. ఇందులో వెయిట్ లిఫ్టింగ్ కోసం అడ్వాన్స్డ్ రెసిస్టివ్ ఎక్సర్సైజ్ డివైస్ (ARED) అనే యంత్రం, వ్యోమగాములు పరిగెడుతున్నప్పుడు గాల్లోకి లేవకుండా పట్టీలతో కూడిన ట్రెడ్మిల్లు ఉన్నాయి. రోజూ రెండు లేదా అంతకంటే ఎక్కువ గంటలు వ్యాయామం చేయడాన్ని ఆస్వాదిస్తామని సునీతా విలియమ్స్, బుచ్ విల్మోర్ తెలిపారు.గురుత్వాకర్షణ లేకపోవడం వల్ల ఒక ప్రయోజనం కూడా ఉందన్నారు వ్యోమగాములు.
మూత్రాన్ని రీసైకిల్ చేసి తాగునీటిగా..
సాధారణంగా వ్యోమగాముల చెమట, మూత్రాన్ని రీసైకిల్ చేసి తాగునీరుగా మారుస్తారు. కానీ, ఒక సమస్య కారణంగా సిబ్బంది మూత్రాన్ని నిల్వ చేయాల్సి వచ్చింది. సునీ, బుచ్లు ఐఎస్ఎస్కు వెళ్లేటపుడు ప్లంబింగ్ వ్యవస్థను సరిచేయడానికి కొత్త పరికరాలను తీసుకెళ్లారు. వ్యోమగాముల దగ్గర తగినంత ఆహారం, నీరు ఉన్నాయి. ఇటీవలి సరఫరా మిషన్ ద్వారా ఇంకా ఆహారం వెళ్లింది. ఇద్దరు వ్యోమగాములకు అమెరికా ఎన్నికల్లో ఓటు వేసే అవకాశం కూడా కల్పించారు. ‘అంతరిక్షం నుంచి ఓటు వేయడం చాలా బాగుంది’ అని సునీత అన్నారు.
కుటుంబసభ్యులకు దూరంగా…
సునీత విలియమ్స్ తన కుటుంబాన్ని, స్నేహితులను, తన రెండు పెంపుడు కుక్కలనూ మిస్ అయినట్లు చెప్పారు.”వారు అర్థం చేసుకున్నారన్నారు. అది వారికి కష్టమనీ నాకు తెలుసు” అని ఆమె అన్నారు. “కానీ అందరూ మమ్మల్ని సపోర్ట్ చేశారు అని చెప్పారు. అంతరిక్షంలో ఉన్నప్పుడు మనం చూసే దృక్కోణం వేరుగా ఉంటుందన్నారు సునీత. మనకు ఒకే ఒక గ్రహం ఉంది. దానిని జాగ్రత్తగా చూసుకోవాలి” అని ఆమె చెప్పారు.
