Meena: రెండోపెళ్లి వార్త‌ల‌పై మండిప‌డ్డ మీనా

సీనియర్ నటి మీనా(meena) మరోసారి సోషల్ మీడియా పుకార్లపై ఘాటుగా స్పందించారు. రీసెంట్ గా ఆమె రెండో పెళ్లికి రెడీ అయ్యారంటూ కొన్ని యూట్యూబ్ ఛానళ్లలో, సోషల్ మీడియా పేజీలలో వార్తలు చక్కర్లు కొట్టాయి. సెలబ్రిటీల వ్యక్తిగత జీవితాలపై నిరాధార కథనాలు సృష్టించడం ఎక్కువ‌వుతున్న‌ నేపథ్యంలో, ఈసారి టార్గెట్ గా మారారు మీనా. గతంలో కూడా ఇలాంటి రూమర్స్‌పై ఆమె స్పందించినప్పటికీ, అవే కథనాలు మళ్లీ మళ్లీ వెలుగులోకి రావడం ఆమెను తీవ్ర అసహనానికి గురి చేశాయి. తాను ఎలాంటి నిర్ణయం తీసుకున్నా అది తన వ్యక్తిగత విషయ‌మ‌ని స్పష్టం చేస్తూనే, ఆధారంలేని వార్తలను ప్రచారం చేయడం బాధాకరమని పేర్కొన్నారు.

తన భర్త విద్యాసాగర్(Vidya Sagar) 2022లో ఊపిరితిత్తుల సంబంధిత సమస్యలతో కన్నుమూశారని గుర్తుచేసుకున్న మీనా, ఆ ఘటన తన జీవితంలో పెద్ద దెబ్బ అని భావోద్వేగంతో తెలిపారు. అప్పటి నుంచి తన కూతురు నైనీకను కంటికి రెప్పలా చూసుకుంటూ ముందుకు సాగుతున్నానని చెప్పారు. భర్త మరణించిన కొన్ని రోజులకే తనపై రెండో పెళ్లి వార్తలు రాయడం ఎంతవరకు సమంజసమని ప్రశ్నించారు. చాలాసార్లు అలాంటి కథనాలను పట్టించుకోకుండా వదిలేశానని, కానీ స్పందించకపోతే మరింతగా అవాస్తవాలు ప్రచారం అవుతున్నాయని ఆవేదన వ్యక్తం చేశారు. ఒక మహిళగా, భర్తను కోల్పోయిన వ్యక్తిగా తన పరిస్థితిని లెక్క‌లోకి తీసుకోకుండా ఇలా రాయడం బాధాకరమన్నారు.

సోషల్ మీడియా విస్తరణతో పుకార్లు క్షణాల్లో వైరల్ అవుతున్నాయని, దీనివల్ల వ్యక్తిగత ప్రతిష్ట దెబ్బతింటోందని మీనా ఆందోళన వ్యక్తం చేశారు. సన్నిహితులు, మిత్రులు ఫోన్ చేసి ఆ వార్తల గురించి అడగడం మరింత మానసిక ఒత్తిడిని కలిగిస్తోందని చెప్పారు. ఇప్పటికే పలు మార్లు ఖండించిన విషయాన్ని మళ్లీ మళ్లీ రాయడం వెనుక ఉద్దేశ్యం ఏమిటని ప్రశ్నించారు. నిరాధార వార్తలపై బాధ్యతాయుతమైన వ్యవహారం అవసరమని సూచిస్తూ, తన వ్యాఖ్యల ద్వారా సోషల్ మీడియా వేదికల బాధ్యతను మరోసారి చర్చకు తీసుకొచ్చారు. మీనా చేసిన ఈ వ్యాఖ్య‌లు ప్ర‌స్తుతం నెట్టింట వైర‌ల్ అవుతున్నాయి.