Elon Musk: ట్రంప్‌ సర్కారుకు సేవలను తగ్గించుకోనున్న ఎలాన్‌ మస్క్‌

అమెరికా అధ్యక్షుడు డొనాల్డ్‌ ట్రంప్‌ (Donald Trump) సన్నిహితుడు ఎలాన్‌ మస్క్‌ (Elon Musk)కు చెందిన విద్యుత్‌ కార్ల కంపెనీ టెస్లా (Tesla) పనితీరు బాగా క్షీణించింది. జనవరి-మార్చి త్రైమాసికంలో కంపెనీ నికర లాభం వార్షిక ప్రాతిపదికన 71 శాతం పతనమై 40.9 కోట్ల డాలర్లకు పడిపోయింది. ఆదాయం 9 శాతం క్షీణించి 1,930 కోట్ల డాలర్లకు తగ్గింది. అంతేకాదు, గడిచిన మూడు నెలల్లో కంపెనీ వాహన విక్రయాలు సైతం 13 శాతం తగ్గాయి. సంస్థ పేలవ పనితీరు నేపథ్యంలో ట్రంప్‌(Trump) సర్కారుకు తన సేవలను గణనీయంగా తగ్గించుకోవడంతో పాటు టెస్లా కార్యకలాపాలపై దృష్టి పెంచాలని మస్క్‌ గట్టి నిర్ణయం తీసుకున్నారు.

వచ్చే నెల నుంచి ట్రంప్‌ సర్కారు కోసం కేవలం ఒకటి లేదా రెండ్రోజులు మాత్రమే కేటాయిస్తానని టెస్లా ఇన్వెస్టర్ల (Tesla investors)తో అన్నారు. అమెరికా అధ్యక్షుడిగా ట్రంప్‌ బాధ్యతలు చేపట్టాక ప్రభుత్వ వ్యయాల్ని, ఉద్యోగుల్ని తగ్గించే బాధ్యతల్ని మస్క్‌కు అప్పగించారు.  ఇందుకోసం డిపార్ట్‌మెంట్‌ ఆఫ్‌ గవర్నమెంట్‌ ఎఫిషియెన్సీ (డోజే) పేరుతో ఏర్పాటు చేసిన శాఖకు ప్రస్తుతం మస్క్‌ సారథ్యం వహిస్తున్నారు. అయితే సర్కారు కోసం మస్క్‌  పని చేయడంపై తీవ్ర వ్యతిరేకత వ్యక్తమైంది. ఇది టెస్లా కార్ల అమ్మకాలతో పాటు పనితీరుపైనా తీవ్ర ప్రభావం చూపింది. ఈ ఏడాదిలో ఇప్పటి వరకు టెస్లా షేర్లు 41 శాతం క్షీణించాయి.