Chandrabbabu: ఫిర్యాదుల విత్‌డ్రాతో.. చంద్రబాబు పాత కేసుల్లో కొత్త ట్విస్ట్..

వైసీపీ (YSR Congress Party) పాలనలో జరిగిన అత్యంత ప్రాధాన్యమైన రాజకీయ సంఘటనల్లో మాజీ ముఖ్యమంత్రి నారా చంద్రబాబు నాయుడు (Chandrababu Naidu) అరెస్టు ఒకటి. ఆ సమయంలో ఆయనపై నమోదైన కేసులు తీవ్ర చర్చకు దారి తీశాయి. టీడీపీ వాటిని పూర్తిగా రాజకీయ ప్రేరేపితమైనవి, అసత్య ఆరోపణల ఆధారంగా పెట్టినవని పేర్కొంది. అయితే వైసీపీ (YCP) మాత్రం అవినీతి, అధికార దుర్వినియోగం జరిగినట్టే అని వాదించింది. ఈ వివాదం ఎన్నో నెలలు కొనసాగింది.

ఇప్పుడు ప్రభుత్వం మారిన నేపథ్యంలో, ఆ కేసుల పరిస్థితి మళ్లీ కీలకంగా మారింది. తాజాగా బయటపడుతున్న సమాచారం ప్రకారం, అప్పట్లో నమోదైన కేసులను ఎత్తివేయడానికి ఏపీ సీఐడీ (CID Andhra Pradesh) చర్యలు ప్రారంభించినట్టు తెలుస్తోంది. చట్టపరమైన అడ్డంకులను ఎలా అధిగమించాలన్న దానిపై కూడా అధికార వర్గాలు చర్చలు జరిపినట్టు తెలుస్తోంది.

2023లో అమరావతి (Amaravati capital) ప్రాంతంలో అసైన్డ్ ల్యాండ్స్ (Assigned lands) , ఇన్నర్ రింగ్ రోడ్ (Inner Ring Road) , ఔటర్ రింగ్ రోడ్ (Outer ring road) మార్పులతో చంద్రబాబుకు ఆర్థిక లబ్ధి కలిగిందన్న అభియోగాలపై కేసులు నమోదయ్యాయి. ఇన్నర్ రింగ్ రోడ్ అలైన్మెంట్‌ను మార్చి ప్రైవేట్ ప్రయోజనాలు పొందేలా నిర్ణయాలు తీసుకున్నారన్న ఆరోపణలతో అప్పటి ప్రభుత్వం కఠిన చర్యలు చేపట్టింది. కానీ రోడ్డు నిర్మాణం జరుగకముందే అవినీతి ఆరోపణలు ఎలా వస్తాయని చంద్రబాబు తరఫు న్యాయవాదులు అప్పట్లో ప్రశ్నించారు. అయినప్పటికీ కేసులు ముందుకు తీసుకెళ్లి, ఆయనను సుమారు 52 రోజులపాటు రాజమండ్రి (Rajamahendravaram) సెంట్రల్ జైల్లో రిమాండ్‌లో ఉంచారు. ఈ వ్యవహారంపై న్యాయ నిపుణులు కూడా అనేక సందేహాలు వ్యక్తం చేశారు.

ఇప్పుడు పరిస్థితి పూర్తిగా మారిపోయినట్టు కనిపిస్తోంది. కేసుల ఆధారమైన ఫిర్యాదులు చేసిన ఇద్దరు వ్యక్తులు తాజాగా తమ ఫిర్యాదులను ఉపసంహరించుకున్నారని సమాచారం. దీంతో కేసులు కొనసాగించే అవసరం లేదని సీఐడీ హైకోర్టుకు తెలిపింది. అయితే ఈ ఉపసంహరణపై ఒక జర్నలిస్టు హైకోర్టులో పిటిషన్ వేసి, ఫిర్యాదు చేసినవారు ఇప్పుడు వెనక్కి ఎందుకు తగ్గుతున్నారో ప్రశ్నించారు. దీనికి సీఐడీ స్పందిస్తూ, అసలు కేసుతో సంబంధం లేని వ్యక్తి ఇలా పిటిషన్ వేయడం ఎలా సరైందని ప్రతిప్రశ్నించింది. ఫిర్యాదుదారులే వెనక్కి తగ్గినందున కేసులు మూసేయడం సహజమేనని కోర్టుకు తెలిపింది. ఈ పరిణామాలన్నింటితో చంద్రబాబు అరెస్ట్‌కు దారితీసిన కేసులు ఇప్పుడు పూర్తిగా ముగింపు దశకు చేరుకున్నట్టు స్పష్టమవుతోంది. మొత్తానికి గతంలో ఎలా రాజకీయ అంశంగా మలచబడిందో, ఇప్పుడు ఎలా ముగింపుకువస్తోందో గమనిస్తే ఏపీలో రాజకీయాలు ఎలా మారుతున్నాయో అర్థం అవుతుంది.