Chandrababu: చంద్రబాబు కి తననొప్పిగా మారిన జిల్లా స్థాయి కమిటీల ఏర్పాటు..

ఇటీవల తెలుగుదేశం పార్టీ (TDP) లో జిల్లా స్థాయి కమిటీల ఏర్పాటు పెద్ద సవాలుగా మారింది. ఎన్నికలు ముగిసిన తర్వాత నెలలు గడిచినా, ఇంకా జిల్లావారి కమిటీలు పూర్తిగా ఖరారు కాని పరిస్థితి కనిపిస్తోంది. అసలు ఆగస్టులోనే ఈ ప్రక్రియ పూర్తవ్వాల్సి ఉన్నా, నేతల మధ్య ఉన్న పోటీ, పదవులపై పెరిగిన ఆసక్తి కారణంగా ఎంపికలు ముందుకు కదలడంలేదు. దీనివల్ల పార్టీ అధినేత నారా చంద్రబాబు నాయుడు ( Chandra Babu Naidu) వ్యక్తిగతంగా జోక్యం చేసుకోవాల్సిన పరిస్థితి ఏర్పడిందని పార్టీ వర్గాలు చెబుతున్నాయి.

సాధారణంగా ప్రతి ఏడాది మహానాడు (Mahanadu) ముందు జిల్లా కమిటీలు, ఆ తర్వాత రాష్ట్ర , జాతీయ కమిటీల నియామకం జరగడం ఆనవాయితీ. అయితే ఈసారి ఎన్నికల్లో సత్తా చూపిన తర్వాత, ప్రభుత్వంలో అధికారాన్ని దక్కించుకున్న టీడీపీ నేతల్లో పదవులపై ఆసక్తి మరింత పెరిగింది. ముఖ్యంగా నామినేటెడ్ పదవులు (Nominated Posts) ఎక్కువగా భర్తీ చేసిన తర్వాత, ఇప్పుడు పార్టీ పదవులపై ప్రాంతీయ నాయకులు తమ హక్కు కోరుతున్నారు. అందుకే జిల్లా అధ్యక్ష పదవి నుంచి కార్యవర్గ సభ్యత్వం వరకు భారీ పోటీ నెలకొంది.

చంద్రబాబు ఈ బాధ్యతను కొంతమంది సీనియర్ నాయకులకు అప్పగించారు. త్రిసభ్య కమిటీలు ప్రతి పార్లమెంటు నియోజకవర్గానికి 34 మంది సభ్యులతో కూడిన పార్లమెంటు కమిటీ ఏర్పాటు చేయాలనే లక్ష్యంతో పనిచేసినా, కొన్ని జిల్లాల్లో తీవ్ర అంతర్గత పోటీ కారణంగా ఎంపికలు నిలిచిపోయాయి. కొందరు సీనియర్లు ఈ వివాదాలను పరిష్కరించలేక చివరికి బాధ్యతను తిరిగి అధినేతకు అప్పగించారు. దీంతో చంద్రబాబు స్వయంగా వారానికి ఒకరోజు పార్టీ కార్యాలయంలో కూర్చొని నాయకులతో చర్చలు జరుపుతున్నా, అందరికీ న్యాయం చేసే విధంగా నిర్ణయం తీసుకోవడం కష్టంగా మారిందనే మాటలు వినిపిస్తున్నాయి.

ముఖ్యంగా రాబోయే మూడు నుండి నాలుగు నెలల్లో స్థానిక సంస్థల ఎన్నికలు (Local Body Elections) జరగనున్నాయి. ఈ నేపథ్యంలో పార్టీ పదవులు పొందితే ప్రాంతంలో ప్రభావం ఎక్కువగా ఉంటుందని భావిస్తూ, జిల్లా అధ్యక్ష పదవిపై నేతలలో పెద్ద ఎత్తున ఆసక్తి పెరిగింది. ప్రభుత్వ పదవి దక్కకపోయినా, పార్టీ హోదా ఉన్నట్లయితే కేడర్‌లో తమ ప్రాభవం కొనసాగుతుందని భావిస్తున్నారని పార్టీ అంతర్గత వర్గాలు చెబుతున్నాయి.

గత ప్రభుత్వ కాలంలో ఎన్నో ఒత్తిడులు ఎదుర్కొన్న టీడీపీ కేడర్‌ను బాధ పెట్టకూడదన్న ఉద్దేశ్యం కూడా చంద్రబాబుకు ఉంది. అందుకే ఎవరినీ తగ్గకుండా, అందరికీ అవకాశాలు కల్పించేలా సరైన సమతుల్య నిర్ణయం తీసుకోవడానికి ఆయన సమయం తీసుకుంటున్నారని చెబుతున్నారు. ఈ నేపథ్యంలో త్వరలోనే పార్టీ జిల్లా కమిటీల నియామకం పూర్తి చేసే దిశగా మరోసారి కీలక సమావేశాలు జరగనున్నాయని సమాచారం.