Pawan Kalyan: న్యాయమూర్తిపై అభిశంసన డిమాండ్.. ఇండియా బ్లాక్ తీరును ఆక్షేపించిన పవన్..

తమిళనాడులో (Tamil Nadu) కార్తిక దీపం వెలిగించే సంప్రదాయం చుట్టూ నెలకొన్న వివాదం ఇప్పుడు జాతీయ స్థాయిలో పెద్ద చర్చకు దారితీసింది. తీరుప్పరకుండ్రం (Thirupparankundram) కొండపై ఉన్న దీపస్తంభం వద్ద దీపాన్ని వెలిగించే హక్కు దర్గా కమిటీకి దా? లేక సుబ్రహ్మణ్య స్వామి దేవాలయ కమిటీదా? అనే ప్రశ్నపై అక్కడ రెండు వర్గాలు సంవత్సరాలుగా విభేదాలు కొనసాగిస్తున్నాయి. ఈ నేపథ్యంలో మద్రాస్ హైకోర్టు మదురై బెంచ్ న్యాయమూర్తి జస్టిస్ జి.ఆర్. స్వామినాథన్ (Justice G.R. Swaminathan) ఇటీవల కీలక తీర్పు ఇచ్చి, పరిమిత సంఖ్యలో భక్తులు అక్కడికి వెళ్లి దీపం వెలిగించేందుకు అనుమతి ఇవ్వాలని ఆదేశించారు.

అయితే, ఈ తీర్పు రాజకీయ రంగు పులుముకుంది. డీఎంకే (DMK) ఆధ్వర్యంలోని ఇండియా కూటమికి చెందిన ఎంపీలు హైకోర్టు న్యాయమూర్తిపై అభిశంసన (impeachment) తీర్మానం ప్రవేశపెట్టాలని లోక్‌సభ స్పీకర్ ఓం బిర్లా (Om Birla) ను కలిసి లేఖ అందించడం చర్చనీయాంశమైంది. ఈ పరిణామాలపై ఆంధ్రప్రదేశ్ ఉప ముఖ్యమంత్రి పవన్ కళ్యాణ్ (Pawan Kalyan) తీవ్ర ఆందోళన వ్యక్తం చేస్తూ తనదైన శైలిలో స్పందించారు.

పవన్ అభిప్రాయం ప్రకారం, హిందూ సమాజం విశ్వాసాలు, సంప్రదాయాలు రాజ్యాంగం ఇచ్చిన మౌలిక హక్కులు. ఆ హక్కులను గౌరవిస్తూ నిర్ణయం తీసుకున్న న్యాయమూర్తిపై అభిశంసన డిమాండ్ చేయడం న్యాయ వ్యవస్థను భయపెట్టే ప్రయత్నం అని ఆయన పేర్కొన్నారు. హిందూ ఆచారాలకు అనుకూలంగా ఉన్న తీర్పు ఇచ్చినందుకు ఒక న్యాయమూర్తిని టార్గెట్ చేయడం తీవ్రమైందని అన్నారు.

ఈ సందర్భంలో పవన్ గతంలోని కొన్ని ఉదాహరణలను కూడా ప్రస్తావించారు. ముఖ్యంగా, శబరిమల (Sabarimala) కేసులో సుప్రీంకోర్టు రాజ్యాంగ ధర్మాసనం ఇచ్చిన తీర్పు హిందూ ఆచారాలకు వ్యతిరేకంగా ఉన్నప్పటికీ, ఆ సమయంలో ఏ రాజకీయ పార్టీ న్యాయమూర్తులపై అభిశంసన తీర్మానాలు కోరలేదని గుర్తు చేశారు. అలాగే, ఒక మాజీ ప్రధాన న్యాయమూర్తి హిందూ దేవతలపై వ్యాఖ్యలు చేసినప్పుడు ఆ వ్యవహారాన్ని రాజకీయపరంగా వాడుకోకుండా అన్ని పార్టీలూ సున్నితంగా వ్యవహరించాయని అన్నారు.

కానీ తమిళనాడులో జరుగుతున్న ఈ వివాదంలో రాజకీయ పార్టీలు అసహనంతో వ్యవహరిస్తున్నాయని పవన్ అభిప్రాయపడ్డారు. ఒక సీనియర్ జడ్జి హిందూ భక్తుల విశ్వాసం కాపాడుకునే తీర్పు ఇచ్చారన్న కారణంతో ఆయనను అభిశంసించాలని కోరడం సమాజంలో అసహనం పెంచే పని అని అన్నారు. ఈ సంఘటనలను దృష్టిలో ఉంచుకొని, సనాతన ధర్మ పరిరక్షణ బోర్డు ఏర్పాటు అత్యవసరమని పవన్ కళ్యాణ్ పునరుద్ఘాటించారు. భవిష్యత్తులో హిందూ సంప్రదాయాలను రక్షించాలంటే అన్ని వర్గాలు కలిసి స్పందించడం అవసరమని ఆయన సూచించారు.