Rahul Gandhi: ఢిల్లీ వాయుకాలుష్యం నేషనల్ ఎమర్జెన్సీయే: రాహుల్

దేశ రాజధాని ఢిల్లీలో వాయు కాలుష్యం తీవ్రత మరింత భయానక స్టేజ్ చేరింది. వరుసగా 15వ రోజు కూడా గాలి నాణ్యత ‘వెరీ పూర్’ (చాలా తక్కువ) కేటగిరీలోనే నమోదైంది. కేంద్ర కాలుష్య నియంత్రణ మండలి (సీపీసీబీ) శనివారం ఉదయం 7 గంటలకు విడుదల చేసిన డేటా ప్రకారం, ఢిల్లీ ఎయిర్ క్వాలిటీ ఇండెక్స్ (ఏక్యూఐ) 338గా రికార్డయింది.

శుక్రవారం నమోదైన 385 ఏక్యూఐతో పోలిస్తే ఇది స్వల్పంగా మెరుగుపడినప్పటికీ, పరిస్థితి ఆందోళనకరంగానే ఉంది. నవంబర్ నెలలో దాదాపు ప్రతీరోజూ గాలి నాణ్యత ప్రమాదకర స్థాయిలోనే కొనసాగుతోంది. వాతావరణ పరిస్థితులు కాలుష్య కారకాలు చెదిరిపోవడానికి అనుకూలంగా లేనందున, రానున్న వారంలో కూడా పరిస్థితిలో పెద్దగా మార్పు ఉండకపోవచ్చని వాతావరణ ఏజెన్సీలు అంచనా వేస్తున్నాయి.

దేశ రాజధాని ఢిల్లీలో నానాటికి క్షీణిస్తున్న వాయు నాణ్యతపై ప్రధాని మోడీ ఎందుకు మౌనంగా ఉన్నారంటూ లోక్‌సభలో విపక్షనేత, కాంగ్రెస్‌ అగ్రనేత రాహుల్‌ గాంధీ ప్రశ్నించారు. ఈ ‘అత్యవసర ఆరోగ్య పరిస్థితి’ పై త్వరలో ప్రారంభం కానున్న పార్లమెంటు శీతాకాల సమావేశాల్లో చర్చించాలని డిమాండ్‌ చేశారు. వాయుకాలుష్యం కారణంగా చిన్నారులు ఎదుర్కొంటున్న ఇబ్బందుల గురించి ఆయన కొంతమంది తల్లులతో తన నివాసంలో ముచ్చటించారు. ఇందుకు సంబంధించిన వీడియోను ఆయన శుక్రవారం ‘ఎక్స్‌’ వేదికగా పంచుకున్నారు. ‘‘నేను కలిసిన ప్రతి మాతృమూర్తి ఒకే విషయం గురించి మాట్లాడుతున్నారు. పిల్లలు విషపూరిత గాలిని పీలుస్తూ పెరుగుతున్నారని చెబుతున్నారు. దేశంలోని చిన్నారులు మన ముందే ఇబ్బందులకు గురవుతున్నారు. అయినా ప్రధాని ఎలా మౌనంగా ఉండగలుగుతున్నారు? అని ప్రశ్నించారు.

అసలు ప్రభుత్వం ఎందుకు అప్రమత్తత, ప్రణాళిక, జవాబుదారీతనం చూపడం లేదు? గాలి కాలుష్యంపై పార్లమెంటులో చర్చ జరగాలి. ఈ అత్యవసర ఆరోగ్య పరిస్థితిని కట్టడి చేయడానికి కఠిన చర్యలు తీసుకోవాలి. మన పిల్లలకు సాకులు కాదు… స్వచ్ఛమైన గాలి కావాలి’’ అని రాహుల్‌ గాంధీ అన్నారు. మరోవైపు పార్లమెంట్‌లో అనుసరించాల్సిన వ్యూహాలపై చర్చించేందుకు ఆదివారం సోనియాగాంధీ నివాసంలో కాంగ్రెస్‌ కీలక సమావేశాన్ని ఏర్పాటు చేయనుంది.