G7: జీ7లో భారత్ పాల్గొనడం చాలా ముఖ్యం.. ఆ దేశం లేకపోతే ఎలా?

జీ7 శిఖరాగ్ర సమావేశంలో భారత్ భాగస్వామ్యం కీలకమని కెనడా (Canada) ప్రధాని మార్క్ కార్నీ పేర్కొన్నారు. ఇటీవల భారత ప్రధాని నరేంద్ర మోదీకి (Modi) ఫోన్ చేసి జీ7 సమ్మిట్‌కు ఆయనను ఆహ్వానించిన కార్నీ.. భారత్ లాంటి దేశం ఈ అంతర్జాతీయ వేదికపై ఉండడం సమకాలీన ప్రపంచానికి ఎంత అవసరమో వివరించారు. ‘‘కెనడా ఈసారి జీ7 సమ్మిట్‌కు అధ్యక్షత వహిస్తున్నందున, ప్రపంచవ్యాప్తంగా ప్రాధాన్యం పొందిన అంశాలపై సభ్య దేశాలతో చర్చలు జరపాలని భావిస్తున్నాం. ఇందులో ఎనర్జీ భద్రత, డిజిటల్ యుగం భవిష్యత్తు, ముఖ్యమైన ఖనిజ వనరులు, అభివృద్ధి చెందుతున్న దేశాల్లో మౌలిక వసతుల నిర్మాణం వంటి అంశాలపై భారత్ వంటి దేశం పాత్ర కీలకం’’ అని కార్నీ స్పష్టం చేశారు. ప్రపంచంలోని కీలకమైన సరఫరా చైన్లకు కేంద్రంగా భారత్ కొనసాగుతోందని ఆయన అభిప్రాయపడ్డారు. ‘‘ఇంత ప్రధానమైన దేశాన్ని చర్చలకు ఆహ్వానించకపోతే, అంతర్జాతీయ సమస్యలకు పరిష్కారం ఎలా కనిపెడతాం?’’ అని ఆయన ప్రస్తావించారు.

జీ7 చైర్‌గా ఎవెవరు ఈ చర్చల్లో ఉండాలో తానే నిర్ణయిస్తానని, భారత్ లాంటి ఐదో అతిపెద్ద ఆర్థిక వ్యవస్థను ఆ చర్చల నుంచి తప్పించడం సరికాదని కార్నీ స్పష్టంచేశారు. ‘‘భారత్ అత్యధిక జనాభా కలిగిన దేశం మాత్రమే కాదు, వ్యూహాత్మకంగా ముఖ్యమైన భాగస్వామి కూడా. మోడీతో లా ఎన్‌ఫోర్స్‌మెంట్, గ్లోబల్ కోఆర్డినేషన్ వంటి విషయాలపై కూడా మాట్లాడతాం’’ అని చెప్పారు. ఇదిలా ఉండగా, గతంలో ఖలిస్తాన్ వేర్పాటువాది హర్దీప్ సింగ్ నిజ్జర్ హత్యకు భారత గూఢచారులే కారణమని కెనడా ఆరోపించగా, భారత్ ఆ ఆరోపణలను తీవ్రంగా ఖండించింది. దాంతో ఇరుదేశాల మధ్య దౌత్య సంబంధాల్లో గందరగోళం నెలకొంది. అయితే ఇప్పుడు ఈ పరిణామాల క్రమంలో మళ్లీ భారత్–కెనడా సంబంధాల్లో ఒడిదుడుకులు తగ్గేందుకు ఈ సమావేశం ఓ మంచి వేదిక కావొచ్చని భావిస్తున్నారు. కార్నీ ఆహ్వానాన్ని ప్రధాని మోదీ స్వీకరించారని పేర్కొనడం, ఈ దిశగా పాజిటివ్ సంకేతంగా చూస్తున్నారు.