Nuclear Sites: ఇరాన్ అణు కేంద్రాలే లక్ష్యంగా అమెరికా-ఇజ్రాయెల్ దాడులు?

పశ్చిమాసియాలో యుద్ధ వాతావరణం క్షణక్షణం తీవ్రంగా మారుతోంది. ఈ క్రమంలో ఇరాన్ చేసిన తాజా ఆరోపణలు ప్రపంచ దేశాలను తీవ్ర ఉలికిపాటుకు గురిచేస్తున్నాయి. తమ దేశంలోని అత్యంత కీలకమైన అణు కేంద్రాలను (Nuclear Sites) లక్ష్యంగా చేసుకుని అమెరికా, ఇజ్రాయెల్ వైమానిక దాడులకు (Airstrikes) పాల్పడ్డాయని అంతర్జాతీయ అణు ఇంధన సంస్థ (IAEA)లో ఇరాన్ రాయబారి రెజా నజాఫీ సంచలన ప్రకటన చేశారు. ఇరాన్‌ను సమూలంగా నాశనం చేసేందుకే ఈ కుట్రలకు తెరతీశారని ఆయన తీవ్రస్థాయిలో మండిపడ్డారు.

ఆధారాలు లేవన్న ఐఏఈఏ..
ఇరాన్ ఆరోపణలపై ఐక్యరాజ్యసమితి (UN) అణు నిఘా సంస్థ అధిపతి రాఫెల్ గ్రాసీ వెంటనే స్పందించారు. ఇరాన్‌ అణు కేంద్రాలపై (Nuclear Sites) దాడులు జరిగినట్లు తమకు ఇప్పటికైతే ఎలాంటి స్పష్టమైన ఆధారాలు లభించలేదని ఆయన వెల్లడించారు. టెహ్రాన్ పరిసరాల్లో రేడియేషన్ స్థాయిలను నిరంతరం పర్యవేక్షిస్తున్నామని, ప్రస్తుతం అవి సాధారణంగానే ఉన్నాయని స్పష్టం చేశారు. అయినప్పటికీ ఆ ప్రాంతంలో భీకర దాడులు కొనసాగుతున్నందున భవిష్యత్తులో రేడియేషన్ లీకేజీ ప్రమాదాన్ని పూర్తిగా తోసిపుచ్చలేమని రాఫెల్ హెచ్చరించారు.

ప్రజలను తరలించక తప్పదా?
ఒకవేళ అణు కేంద్రాలపై (Nuclear Sites) దాడులు జరిగి రేడియేషన్ లీక్ అయితే.. ఆ పరిసర ప్రాంతాల్లో నివసిస్తున్న ప్రజలను తక్షణమే సురక్షిత ప్రాంతాలకు తరలించాల్సి ఉంటుందని ఐఏఈఏ హెచ్చరించింది. ఇరాన్‌లో ప్రస్తుత పరిస్థితులు అత్యంత ఆందోళనకరంగా ఉన్నాయని రాఫెల్ ఆవేదన వ్యక్తం చేశారు. అణు కేంద్రాల తాజా పరిస్థితి, భద్రత గురించి ఆరా తీసేందుకు ఇరాన్ అణు నియంత్రణ అధికారులను సంప్రదించడానికి తాము తీవ్రంగా ప్రయత్నిస్తున్నామని తెలిపారు. కానీ ఇరాన్ అధికారుల నుంచి ఇప్పటివరకు ఎలాంటి స్పందన లేకపోవడం మరింత గందరగోళానికి దారితీస్తోంది.