Microsoft :హైదరాబాద్‌లో మైక్రోసాఫ్ట్‌ మెగా డీల్‌

అమెరికా టెక్నాలజీ దిగ్గజం మైక్రోసాఫ్ట్‌ (Microsoft) హైదరాబాద్‌లో వ్యాపార కార్యకలాపాలను మరింత విస్తరిస్తోంది. ఇందుకోసం ఫైనాన్షియల్‌ డిస్ట్రిక్ట్‌లోని ఫీనిక్స్‌ (Phoenix) సెంటారస్‌ బిల్డింగ్‌లో 2.65 లక్షల చదరపు అడుగుల కార్యాలయ స్థలాన్ని (ఆఫీస్‌ స్పేస్‌) లీజుకు తీసుకుంది. హైదరాబాద్‌ (Hyderabad) లోని ఆఫీస్‌ స్పేస్‌ మార్కెట్లో ఇప్పటివరకు కుదిరిన అతిపెద్ద లీజు ఒప్పందాల్లో ఇదొకటి. వర్క్‌స్పేస్‌ నిర్వహణదారు టేబుల్‌ స్పేస్‌ టెక్నాలజీస్‌ నుంచి ఫీనిక్స్‌ సెంటార్‌సలోని 3,4 అంతస్థులను మైక్రోసాఫ్ట్‌ ఇండియా ఐదేళ్ల కాలానికి లీజుకు తీసుకుంది. ఈ జూలై 1 నుంచి ఒప్పందం అమలులోకి వచ్చింది. చదరపు అడుగుకు రూ.67 చొప్పున మొత్తం స్థలానికి మైక్రోసాఫ్ట్‌ నెలకు రూ.1.77 కోట్ల కనీస అద్దె, నిర్వహణ వ్యయాలు, ఇతర చార్జీలు కలిపి మొత్తం రూ.5.4 కోట్లు చెల్లించనుంది. ఏటా అద్దె 4.8 శాతం పెరగనుంది. అంతేకాదు, సెక్యూరిటీ డిపాజిట్‌ కింద మైక్రోసాఫ్ట్‌ రూ.42.15 కోట్లు జమ చేసినట్లు ప్రాప్‌స్టాక్‌ (Propstock) తెలిపింది. వాస్తవానికి టేబుల్‌ స్పేస్‌ టెక్నాలజీస్‌ ఈ స్థలాన్ని బిల్డింగ్‌ యజమాన్య సంస్థ ఫీనిక్స్‌ టెక్‌ జోన్‌ నుంచి లీజుకు తీసుకుంది.