జైపూర్‌లో హై-వోల్టేజ్ పోరు..!

ఐపీఎల్ 2026 లీగ్ దశ కీలక ఘట్టానికి చేరుకుంది. శనివారం రాత్రి జైపూర్‌లోని సవాయ్ మాన్‌సింగ్ స్టేడియం వేదికగా రాజస్థాన్ రాయల్స్(RR) మరియు గుజరాత్ టైటాన్స్(GT) జట్లు తలపడనున్నాయి. ప్లేఆఫ్స్ రేసులో నిలవాలంటే ఇరు జట్లకు ఈ విజయం చాలా అవసరం. ప్రస్తుతం పాయింట్ల పట్టికలో ఈ రెండు జట్లు తల 10 మ్యాచ్‌లు ఆడి, 6 విజయాలు మరియు 12 పాయింట్లతో సమానంగా ఉన్నాయి. ఈ మ్యాచ్‌లో గెలిచిన జట్టు ప్లేఆఫ్స్ బెర్త్‌కు మరింత చేరువవుతుంది.

ఈ మ్యాచ్ రాజస్థాన్ రాయల్స్ జట్టుకు చాలా ప్రత్యేకం. తమ సామాజిక బాధ్యతలో భాగంగా ‘పింక్ ప్రామిస్’ (Pink Promise) పేరుతో రాయల్స్ ఈ మ్యాచ్ ఆడుతున్నారు. ఈ మ్యాచ్‌లో ఆటగాళ్లు ప్రత్యేకమైన ‘ఆల్-పింక్’ జెర్సీని ధరించనున్నారు. అంతేకాకుండా, ఈ మ్యాచ్‌లో బాదిన ప్రతి సిక్సర్‌కు రాజస్థాన్‌లోని గ్రామాల్లో ఆరు ఇళ్లకు సౌర శక్తి (Solar Energy) అందిస్తామని రాయల్ రాజస్థాన్ ఫౌండేషన్ ప్రకటించింది. ఈ గొప్ప లక్ష్యం కోసం రాయల్స్ వీలైనన్ని ఎక్కువ సిక్సర్లు బాదాలని అభిమానులు కోరుకుంటున్నారు.

ఐపీఎల్ చరిత్రలో ఈ రెండు జట్ల మధ్య రికార్డులను పరిశీలిస్తే గుజరాత్ టైటాన్స్ హవా ఎక్కువగా కనిపిస్తోంది. ఇప్పటివరకు జరిగిన 9 మ్యాచుల్లో గుజరాత్ 6 సార్లు విజయం సాధించగా, రాజస్థాన్ 3 సార్లు గెలిచింది. అయితే, ఈ సీజన్‌లో అహ్మదాబాద్‌లో జరిగిన గత మ్యాచులో రాజస్థాన్ రాయల్స్ 6 పరుగుల తేడాతో గుజరాత్‌ను ఓడించి మంచి ఊపులో ఉంది. జైపూర్ స్టేడియంలో గతంలో జరిగిన మూడు మ్యాచుల్లో గుజరాత్ రెండుసార్లు నెగ్గడం గమనార్హం.

రాజస్థాన్ రాయల్స్ తరపున యంగ్ సెన్సేషన్ వైభవ్ సూర్యవంశీ(Vaibhav Suryavanshi) 404 పరుగులతో టాప్ స్కోరర్‌గా ఉండగా, యశస్వి జైస్వాల్ కూడా 312 పరుగులతో మంచి ఫామ్‌లో ఉన్నాడు. బౌలింగ్‌లో జోఫ్రా ఆర్చర్ (15 వికెట్లు), రవి బిష్ణోయ్ (11 వికెట్లు) కీలకం కానున్నారు. ఇక గుజరాత్ టైటాన్స్ జట్టులో కెప్టెన్ శుభ్‌మన్ గిల్(Shubhman Gill), సాయి సుదర్శన్ మరియు జోస్ బట్లర్ ఇప్పటికే 300 పరుగుల మార్కును దాటేశారు. బౌలింగ్‌లో కగిసో రబాడ 16 వికెట్లతో అత్యంత ప్రమాదకరంగా మారాడు. రియాన్ పరాగ్(Riyan Parag) నాయకత్వంలోని రాయల్స్, గిల్ సారథ్యంలోని టైటాన్స్‌ను ఎలా ఎదుర్కొంటారో చూడాలి.