Cyber Cheating: వైద్యుడికి రూ.14.61 కోట్ల టోకరా..! అత్యాశకు పోతే మొదటికే మోసం!!

డిజిటల్ యుగంలో మనిషి ఎంత వేగంగా అభివృద్ధి చెందుతున్నాడో, అంతే వేగంగా విచక్షణను కోల్పోతున్నాడనడానికి హైదరాబాద్‌లో తాజాగా వెలుగుచూసిన సైబర్ మోసమే (Cyber cheating) నిలువెత్తు నిదర్శనం. అక్షరం ముక్క రాని అమాయకుడో, సాంకేతిక పరిజ్ఞానం లేని గ్రామీణుడో మోసపోతే అందులో ఒక అర్థముంది. కానీ, సమాజంలో అత్యున్నత హోదాలో ఉన్న ఓ వైద్యుడు, అందునా కోట్లాది రూపాయల ఆస్తి ఉన్న విద్యావంతుడు.. ఫేస్‌బుక్‌లో పరిచయమైన గుర్తు తెలియని వ్యక్తిని నమ్మి ఏకంగా రూ. 14.61 కోట్లు పోగొట్టుకున్నారంటే ఆశ్చర్యం కలగకమానదు. తెలంగాణ రాష్ట్ర చరిత్రలోనే ఒకే వ్యక్తి ఇంత భారీ మొత్తాన్ని సైబర్ నేరగాళ్లకు సమర్పించుకోవడం ఇదే తొలిసారి కావడం గమనార్హం.

ఎర్రగడ్డకు చెందిన సదరు వైద్యుడిని (Doctor) బుట్టలో వేసుకోవడానికి సైబర్ నేరగాళ్లు ఎంచుకున్న మార్గం హనీ ట్రాప్ & ఫేక్ ట్రేడింగ్. ఫేస్‌బుక్‌లో ‘మోనికా మాధవన్’ (Monika Madhavan) పేరుతో పరిచయమైన వ్యక్తి, మొదట తన వ్యక్తిగత కష్టాలు, విడాకుల డ్రామాతో వైద్యుడి సానుభూతిని గెలుచుకుంది. ఆ తర్వాత మెల్లగా మాటను ‘షేర్ ట్రేడింగ్’ (Share Trading) వైపు మళ్లించి, తాను లక్షలు సంపాదిస్తున్నానని నమ్మబలికింది. ఇక్కడే విద్యావంతులైన బాధితులు బోర్లా పడుతున్నారు. అసలు ముఖం తెలియని వ్యక్తి, సోషల్ మీడియాలో పరిచయమై, తన సంపాదన రహస్యాన్ని మనతో ఎందుకు పంచుకుంటుంది? అన్న కనీస తర్కాన్ని వైద్యుడు విస్మరించారు.

సైబర్ నేరగాళ్లు బాధితుడి బ్రెయిన్ ని కాకుండా అతడి అత్యాశని టార్గెట్ చేశారు. మొదట రూ. 30 లక్షలు పెట్టుబడి పెట్టించి, వెంటనే రూ. 8.6 లక్షల లాభం చూపించారు. అంతటితో ఆగకుండా నమ్మకం కలిగించడానికి రూ. 85 వేలు విత్‌డ్రా చేసుకునే అవకాశం ఇచ్చారు. “చేతికి డబ్బులు వచ్చాయి కదా” అనే నమ్మకమే బాధితుడి కొంపముంచింది. ఆ చిన్న మొత్తం ఎర వేసి, తిమింగలం లాంటి మొత్తాన్ని లాగాలన్నదే వారి ప్లాన్ అని డాక్టర్ గ్రహించలేకపోయారు. ఫలితంగా స్నేహితుల వద్ద అప్పులు చేసి, బ్యాంకుల నుంచి రుణాలు తీసుకుని మరీ రూ. 14 కోట్లు పెట్టుబడి పెట్టారు.

ఈ ఉదంతం మన విద్యా వ్యవస్థలోని, విద్యావంతుల ఆలోచనా విధానంలోని డొల్లతనాన్ని బయటపెడుతోంది. వైద్య వృత్తిలో ఎంతో నైపుణ్యం ఉన్న వ్యక్తికి, “రాత్రికి రాత్రే కోట్లు సంపాదించడం అసాధ్యం” అనే ప్రాథమిక ఆర్థిక సూత్రం తెలియకపోవడం విడ్డూరం. పోలీసులు, ప్రభుత్వాలు, ఆర్బీఐ నిత్యం ప్రకటనలు ఇస్తూనే ఉన్నాయి. “అధిక లాభాలు ఆశచూపే యాప్స్ నమ్మకండి,” “అపరిచితులకు డబ్బు పంపకండి” అని మొత్తుకుంటున్నా.. చదువుకున్న వారు పెడచెవిన పెడుతున్నారు. దీన్ని బట్టి చూస్తుంటే.. మోసం చేసే వారి తెలివితేటల కంటే, మోసపోయే వారి అవివేకమే నేరగాళ్లకు పెట్టుబడి అవుతోందని చెప్పక తప్పదు.

స్క్రీన్ మీద కనిపించే అంకెలు నిజమైన డబ్బు కాదని బాధితులు తెలుసుకోలేకపోతున్నారు. వైద్యుడి ఖాతాలో రూ. 34 కోట్లు బ్యాలెన్స్ ఉన్నట్లు చూపించారు. అది చూసి సంబరపడిపోయారే తప్ప, అది కేవలం ఒక గ్రాఫిక్ డిజైన్ మాత్రమేనని, ఆ డబ్బును ఎప్పటికీ తీసుకోలేమని ఆయన ఊహించలేకపోయారు. తీరా విత్‌డ్రా చేయబోతే పన్నుల పేరిట మరో రూ. 7.5 కోట్లు అడగికే కానీ ఆయనకు జ్ఞానోదయం కాలేదు.

సైబర్ నేరగాళ్లు మన అత్యాశనే ఆయుధంగా మలచుకుంటున్నారు. చదువు, హోదా, సామాజిక అనుభవం.. ఇవేవీ మోసాల నుంచి రక్షణ కవచాలు కావని ఈ ఘటన నిరూపిస్తోంది. కష్టపడకుండా వచ్చే డబ్బు కోసం ఆశపడటం, ఎవరో చెప్పారని కోట్ల రూపాయలు ఆన్‌లైన్‌లో కుమ్మరించడం అమాయకత్వం కాదు, అది ఒక రకమైన మూర్ఖత్వం. ఇప్పటికైనా విద్యావంతులు తమ డిగ్రీలకే పరిమితం కాకుండా, డిజిటల్ ప్రపంచంలోని ప్రమాదాలను గుర్తించే విజ్ఞానాన్ని పెంచుకోవాలి. లేదంటే, కష్టపడి సంపాదించిన సొమ్ము వర్చువల్ ప్రపంచంలో కరిగిపోవడానికి ఒక్క క్లిక్ చాలు. బీ కేర్ ఫుల్.!