YS Viveka Case: వివేకా హత్య కేసులో ట్విస్ట్.. దర్యాప్తుకు సీబీఐ మళ్లీ రెడీ..!

మాజీ మంత్రి వై.ఎస్.వివేకానందరెడ్డి (YS Viveka Case) హత్య కేసు సుప్రీంకోర్టులో (Supreme Court) మరో మలుపు తిరిగింది. తదుపరి దర్యాప్తు కొనసాగించేందుకు తాము సిద్ధంగా ఉన్నామని సర్వోన్నత న్యాయస్థానానికి కేంద్ర దర్యాప్తు సంస్థ (CBI) స్పష్టం చేసింది. ఈ కేసులో ఇంకా దర్యాప్తు చేయాలని పిటిషనర్లు కోరుతున్నారని, అందుకు కోర్టు తగిన ఆదేశాలు ఇస్తే.. దర్యాప్తు ముందుకు తీసుకెళ్లేందుకు సీబీఐ సిద్ధంగా ఉందని అదనపు సొలిసిటర్ జనరల్ ఎస్.వి.రాజు కోర్టు దృష్టికి తీసుకెళ్లారు. పిటిషనర్ తరఫున సీనియర్ న్యాయవాది సిద్ధార్థ్ లూథ్రా వాదనలు వినిపించారు. దీంతో ఈ కేసు మరో మలుపు తీసుకుంది.

సీబీఐ, పిటిషనర్ తరపు వాదనలు విన్న ధర్మాసనం.. సీబీఐ దర్యాప్తు విషయంలో ట్రయల్ కోర్టులో మరో పిటిషన్ వేయాలని వివేకా కుమార్తె సునీతకు (Sunitha) సూచించింది. రెండు వారాల్లో పిటిషన్ దాఖలు చేసేందుకు అనుమతించింది. పిటిషన్ వేసిన 8 వారాల్లో మెరిట్స్ ఆధారంగా నిర్ణయం ప్రకటించాలని ట్రయల్ కోర్టును ఆదేశించింది. ట్రయల్ కోర్టు నిర్ణయం వచ్చేంత వరకు అన్ని బెయిల్ రద్దు పిటిషన్లపై విచారణలను వాయిదా వేసింది. జస్టిస్ ఎం.ఎం. సుందరేశ్ నేతృత్వంలోని ధర్మాసనం ఈ మేరకు నిర్ణయం తీసుకుంది. ఆరేళ్లుగా న్యాయం కోసం పోరాడుతున్న సునీతకు ఇది ఒక ఊరటగా మారింది.

వివేకానందరెడ్డి హత్య కేసు ఆంధ్రప్రదేశ్ రాజకీయాల్లో తీవ్ర సంచలనం సృష్టించింది. మాజీ ముఖ్యమంత్రి వై.ఎస్.రాజశేఖరరెడ్డి సోదరుడు, మాజీ కాంగ్రెస్ ఎంపీ, మాజీ మంత్రి వివేకానందరెడ్డి 2019 ఏప్రిల్ 16న అసెంబ్లీ ఎన్నికలకు ముందు కడప జిల్లా పులివెందులలోని తన నివాసంలో దారుణంగా హత్యకు గురయ్యారు. మొదట ఇది హార్ట్ అటాక్‌ అని బంధువులు చెప్పారు. అయితే పోస్ట్‌మార్టం రిపోర్టులో దారుణ హత్య అని తేలింది. శరీరంపై గాయాలు, రక్తపు మడుగులు కనిపించడంతో కుట్ర ఆరోపణలు మొదలయ్యాయి. ఈ ఘటన ఎన్నికల సమయంలో జరగడంతో రాజకీయ కుట్ర అనే అనుమానాలు ఏర్పడ్డాయి. వివేకా హత్య తర్వాత వైసీపీ అధినేత వై.ఎస్. జగన్మోహన్ రెడ్డి మొదట సీబీఐ దర్యాప్తు కోరారు. కానీ అధికారంలోకి వచ్చిన తర్వాత రాష్ట్ర పోలీసుల స్పెషల్ ఇన్వెస్టిగేషన్ టీమ్ (SIT) ద్వారా దర్యాప్తు చేయించారు.

కానీ దర్యాప్తు ఆలస్యం, పక్షపాత వైఖరి అనే ఆరోపణలతో వివేకా కుమార్తె సునీత 2020లో సుప్రీంకోర్టును ఆశ్రయించారు. దీంతో కేసు సీబీఐకి వెళ్లింది. సీబీఐ 2021 అక్టోబర్‌లో చార్జ్‌షీట్ దాఖలు చేసింది. ఇందులో వైసీపీ కడప ఎంపీ వై.ఎస్. అవినాష్ రెడ్డి, అతని తండ్రి వై.ఎస్.భాస్కర్ రెడ్డి, డి.శివశంకర్ రెడ్డి, టి.గంగిరెడ్డితో పాటు మరికొందరిని నిందితులుగా చేర్చింది. అప్రూవర్‌గా మారిన దస్తగిరి స్టేట్‌మెంట్ ప్రకారం, అవినాష్ రెడ్డి, భాస్కర్ రెడ్డి కలిసి కుట్ర పన్ని వివేకానందరెడ్డిని హత్య చేయించారని సీబీఐ పేర్కొంది. భాస్కర్ రెడ్డి 2023 ఏప్రిల్‌లో అరెస్ట్ అయ్యారు. అవినాష్ రెడ్డికి తెలంగాణ హైకోర్టు ముందస్తు బెయిల్ ఇచ్చింది. దీన్ని సునీత సవాలు చేస్తూ సుప్రీంకోర్టుకు వెళ్లారు.

2022 నవంబర్‌లో ఈ కేసును ఆంధ్రప్రదేశ్ నుంచి హైదరాబాద్‌లోని స్పెషల్ సీబీఐ కోర్టుకు సుప్రీంకోర్టు బదిలీ చేసింది. దర్యాప్తు ఆలస్యంపై కోర్టు అసంతృప్తి వ్యక్తం చేసి, 2023 జూన్ 30కల్లా పూర్తి చేయాలని ఆదేశించింది. కానీ ఆలస్యం కొనసాగడంతో 2023 మార్చిలో కొత్త స్పెషల్ ఇన్వెస్టిగేషన్ టీమ్ (SIT) ఏర్పాటు చేసింది. ఈ కేసులో ఆరుగురు సాక్షులు అనుమానాస్పదంగా మరణించడం ఆందోళన కలిగించింది. ఇటీవల 2025 మార్చిలో 85 ఏళ్ల వాచ్‌మ్యాన్ రంగన్న మరణం కేసును మరింత సంక్లిష్టం చేసింది. ఈ మరణాలు కేసును కోల్డ్ కేస్‌గా మార్చే ప్రమాదం ఉందని సునీత ఆరోపించారు.

ఈ ఆగస్టులో సీబీఐ సుప్రీంకోర్టుకు దర్యాప్తు పూర్తయిందని తెలిపింది. కానీ తదుపరి దర్యాప్తు అవసరమా అనే అంశంపై అభిప్రాయం చెప్పాలని కోర్టు ఆదేశించింది. సునీత, ఆమె భర్త రాజశేఖర్ రెడ్డి, సీబీఐ అధికారి రామ్ సింగ్ మీద వేసిన కేసులపై క్లోజర్ రిపోర్టుపైనా ఏపీ ప్రభుత్వం స్పందించాలని చెప్పింది. సెప్టెంబర్ 9కి వాయిదా పడింది. అఫిడవిట్ దాఖలుకు సమయం కావాలని సీబీఐ కోరడమే ఇందుకు కారణం. ఇవాళ జరిగిన విచారణలో సీబీఐ తదుపరి దర్యాప్తుకు సిద్ధమని ప్రకటించడం కీలకంగా మారింది. ఈ కేసులో ట్రయల్, తదుపరి దర్యాప్తు ఏకకాలంలో జరగవచ్చా అనే అంశంపై కూడా కోర్టు స్పష్టత కోరింది. ఈ తీర్పు రాజకీయ వర్గాల్లో చర్చనీయాంశంగా మారింది.