Pawan Kalyan: అవనిగడ్డ ప్రజల ఆకాంక్షలకు మార్గం సుగమం చేస్తున్న పవన్ కళ్యాణ్ చర్యలు..

ఆంధ్రప్రదేశ్ (Andhra Pradesh) ఉప ముఖ్యమంత్రి పవన్ కళ్యాణ్ (Pawan Kalyan) తన దూకుడుతో ప్రభుత్వ పనితీరులో కొత్త ఉత్సాహాన్ని తెచ్చారు. ప్రజా సమస్యలను ప్రత్యక్షంగా పరిశీలించి, వాటి పరిష్కారానికి తక్షణ చర్యలు తీసుకోవడంలో ఆయన చూపిస్తున్న వేగం చర్చనీయాంశంగా మారింది. ఇటీవల మొంథా తుఫాన్ ప్రభావిత ప్రాంతాలను సందర్శించిన సందర్భంగా కృష్ణా జిల్లా (Krishna District) అవనిగడ్డ (Avanigadda)లో జరిగిన నష్టాన్ని పరిశీలించారు. ఆ పర్యటనలో తన దృష్టికి వచ్చిన సమస్యలపై వెంటనే స్పందించి అధికారులకు ఆదేశాలు ఇచ్చారు. ప్రజల ముందు ప్రదర్శన కోసం కాకుండా, వారి కష్టాలను నిజంగా అర్థం చేసుకుని చర్యలు తీసుకోవాలనే ఆవేశం పవన్ కళ్యాణ్ మాటల్లో ప్రతిఫలించింది.

మంగళగిరి (Mangalagiri) క్యాంపు కార్యాలయంలో ఎంపీ బాలశౌరి (Balashouri), ఎమ్మెల్యే బుద్ధ ప్రసాద్ (Budha Prasad)తో కలిసి జిల్లా కలెక్టర్, ఇంజినీరింగ్, ఇతర శాఖల ఉన్నతాధికారులతో ఆయన సమీక్ష నిర్వహించారు. అవనిగడ్డ పరిధిలోని ఎదురుమొండి దీవుల్లో నివసిస్తున్న ప్రజలకు చాలా ఏళ్లుగా ఉన్న కల అయిన ఏటిమొగ – ఎదురుమొండి హై లెవల్ వంతెన (High Level Bridge) నిర్మాణానికి ఆయన స్పష్టమైన ఆదేశాలు జారీ చేశారు. ఈ ప్రాజెక్టు కోసం రాష్ట్ర నిధులతో పాటు సాస్కీ పథకం (SASC Scheme) ద్వారా కూడా నిధులు సమకూర్చాలని సూచించారు.

అదేవిధంగా అవుట్ ఫాల్ స్లూయిజ్ (Outfall Sluice) ల పునరుద్ధరణ పనులను త్వరితగతిన పూర్తి చేయాలని అధికారులను ఆదేశించారు. గత ప్రభుత్వ నిర్లక్ష్యం కారణంగా ఈ స్లూయిజ్‌లు పనితీరును కోల్పోవడంతో, ప్రతి సారి సముద్రం ఉప్పొంగినప్పుడు నాగాయలంక (Nagayalanka), కోడూరు (Koduru) మండలాల్లో వేల ఎకరాలు ముంపుకు గురవుతున్నాయని ఆయన ఆవేదన వ్యక్తం చేశారు. రూ.50 కోట్లు ఖర్చుతో ఏడు స్లూయిజ్‌ల పునర్నిర్మాణం చేపట్టాల్సి వస్తోందని తెలిపారు. అవసరమైతే ఢిల్లీ (Delhi) వెళ్లి కేంద్ర ప్రభుత్వ సహకారం తీసుకువస్తానని ఆయన హామీ ఇచ్చారు.

తుఫాన్ వల్ల పంటలకు నష్టం జరిగిన రైతుల సమస్యపై కూడా పవన్ కళ్యాణ్ దృష్టి సారించారు. కౌలు రైతులు (Tenant Farmers) కూడా పరిహారం పొందేలా పంట నష్టం అంచనాలు త్వరగా పూర్తి చేయాలని ఆయన ఆదేశించారు. కృష్ణా జిల్లాలో 60 వేల మందికి పైగా సీసీఆర్సీ కార్డులు కలిగిన కౌలు రైతులు ఉన్నారని, నమోదు కాని రైతులను కూడా గుర్తించి వారికి న్యాయం చేయాలని సూచించారు.

అదనంగా, ఎదురుమొండి – గొల్లమంద రహదారి నిర్మాణానికి రూ.13.88 కోట్లు కేటాయించినట్లు పేర్కొన్నారు. టెండర్లు పూర్తయ్యాయని, కానీ అటవీ శాఖ (Forest Department) అనుమతుల సమస్యల కారణంగా కొన్ని పనులు నిలిచిపోయాయని తెలిపారు. ఆ అనుమతులను త్వరగా మంజూరు చేయాలనే దిశలో అధికారులు చర్యలు తీసుకోవాలని పవన్ సూచించారు.

అలాగే, హంసలదీవి (Hansala Dweepa) పవిత్ర సంగమ ప్రాంతంలో అటవీ శాఖ వసూలు చేస్తున్న రుసుము విషయంలో ప్రజల భావాలను గౌరవించాలని ఆయన అభిప్రాయపడ్డారు. పవన్ కళ్యాణ్ ప్రతి పర్యటన తర్వాత అక్కడి సమస్యలను స్వయంగా పరిష్కరించడానికి ముందడుగు వేస్తుండటంతో, ఆయన పాలనా శైలి ప్రజల్లో విశ్వాసాన్ని పెంచుతోందని రాజకీయ పరిశీలకులు అంటున్నారు.