Vijay Sai Reddy: ఎన్ని యాత్రలు చేసినా ఫలితం ఉండదు .. జగన్ పై విజయసాయి రెడ్డి వ్యాఖ్యలు.

వైయస్సార్ కాంగ్రెస్ పార్టీ (YSR Congress Party) భవిష్యత్తుపై తాజాగా మరోసారి చర్చ మొదలైంది. ఈ చర్చకు కారణం మాజీ ఎంపీ విజయసాయిరెడ్డి (Vijayasai Reddy) చేసిన వ్యాఖ్యలే. ఎన్ని పాదయాత్రలు చేపట్టినా జగన్ (Jagan) ముఖ్యమంత్రి కాలేరని, వైసీపీ తిరిగి అధికారంలోకి రావడం కష్టమేనని ఆయన స్పష్టంగా చెప్పారు. దీనికి ప్రధాన కారణంగా ఆయన జగన్ చుట్టూ ఉన్న కోటరీని ప్రస్తావించారు. ఆ కోటరీ నుంచి బయటపడకపోతే పార్టీకి రాజకీయంగా ప్రయోజనం ఉండదని ఆయన అభిప్రాయపడ్డారు.

లిక్కర్ స్కామ్ (Liquor Scam ) కేసులో విచారణ అనంతరం మీడియాతో మాట్లాడిన సందర్భంగా విజయసాయిరెడ్డి ఈ వ్యాఖ్యలు చేశారు. రాజకీయంగా స్పష్టమైన ప్రణాళికతో ముందుకెళ్లినప్పుడే జగన్‌కు భవిష్యత్తు ఉంటుందని ఆయన అన్నారు. భావోద్వేగాలతో లేదా కేవలం యాత్రలతో మాత్రమే ప్రజల్లో నమ్మకం పొందలేమని ఆయన సూచించారు. పార్టీ నాయకత్వం సమీక్ష చేసుకుని, నిర్ణయాలు తీసుకునే విధానంలో మార్పులు అవసరమని చెప్పినట్లుగా ఈ వ్యాఖ్యలు భావింపబడుతున్నాయి.

జగన్మోహన్ రెడ్డి (Y. S. Jagan Mohan Reddy) చుట్టూ కోటరీ ఉందని విజయసాయి విమర్శించడం ఇది తొలిసారి కాదు. పార్టీ నుంచి ఆయన వైదొలిగిన తర్వాత పలుమార్లు ఈ అంశాన్ని బహిరంగంగానే ప్రస్తావించారు. ఇటీవల ఆయన చేసిన ఒక ట్వీట్ కూడా రాజకీయంగా సంచలనంగా మారింది. కోటరీల మధ్య బందీలుగా ఉన్న ప్రజా నాయకులు ఆలోచించుకోవాలని ఆయన పరోక్ష హెచ్చరిక చేశారు. భవిష్యత్తులో పరిస్థితులు మరింత కఠినంగా మారే అవకాశముందని ఆయన వ్యాఖ్యలు తీవ్ర చర్చకు దారితీశాయి.

ఇప్పుడు మరోసారి ఆయన అదే అంశాన్ని ప్రస్తావిస్తూ, జగన్ అధికారంలోకి రావడానికి కోటరీనే ప్రధాన అడ్డంకిగా అభివర్ణించారు. అయితే తాను ఏ ఇతర పార్టీలో చేరే ఆలోచనలో లేనని కూడా విజయసాయి స్పష్టం చేశారు. ఈ నేపథ్యంలో, జగన్ తన చుట్టూ ఉన్న కోటరీని తప్పిస్తే విజయసాయి తిరిగి వైసీపీలోకి వస్తారా అనే ప్రశ్న రాజకీయ వర్గాల్లో వినిపిస్తోంది. దీనిపై ఆయన నుంచి స్పష్టమైన సమాధానం రాకపోయినా, చర్చ మాత్రం ఆగడం లేదు.

విజయసాయిరెడ్డి మాటల్లో తీవ్ర ఆవేదన కనిపిస్తోందని పరిశీలకులు అంటున్నారు. పార్టీలో లాభాలన్నీ కొంతమందికే దక్కుతున్నాయని, కేసులు మాత్రం తనపై పడుతున్నాయని ఆయన చెప్పడం ఆయనలోని అసంతృప్తిని వెల్లడిస్తోంది. ఒకప్పుడు జగన్‌కు అత్యంత నమ్మకస్తుడిగా ఉన్న విజయసాయి రెడ్డి, ఇప్పుడు జగన్ ఎందుకు అధికారంలోకి రాలేడో వివరించడం రాజకీయంగా ప్రాధాన్యం సంతరించుకుంది.

భవిష్యత్తులో జగన్ మరో పాదయాత్ర చేపడితే రాజకీయంగా ఊపు వస్తుందనే అభిప్రాయం కొంతమందిలో ఉంది. అయితే అలాంటి ఆశలపై విజయసాయి రెడ్డి చేస్తున్న వ్యాఖ్యలు అనేక మందిని ఆలోచనలో పడేస్తున్నాయి. పార్టీ అంతర్గత వ్యవస్థలో మార్పులు లేకుండా కేవలం యాత్రలతోనే అధికారంలోకి రావడం సాధ్యమా అనే ప్రశ్న ఇప్పుడు వైసీపీ శ్రేణుల్లోనూ వినిపిస్తోంది.