Nara Lokesh: అవమానాల నుంచి అద్భుత విజయం వరకు.. లోకేష్ స్ఫూర్తిదాయక ప్రయాణం!

రాజకీయాల్లో వారసత్వం అనేది ఒక మెట్టు మాత్రమే.. కానీ గమ్యం కాదు. నారా, నందమూరి వంటి రెండు భారీ వృక్షాల నీడలో పెరిగిన నారా లోకేష్, రాజకీయ అరంగేట్రం చేసినప్పుడు అనేక సందేహాలు, విమర్శలు ఎదుర్కొన్నారు. కానీ, నేడు ఆయన తెలుగుదేశం పార్టీకి భవిష్యత్ ఆశాకిరణంగా, ఒక సమర్థవంతమైన నాయకుడిగా తనను తాను నిరూపించుకున్నారు. ఈ పరిణామం వెనుక ఒక దశాబ్ద కాలపు కఠోర శ్రమ, ఓటమి నేర్పిన పాఠాలు, విమర్శలను దీటుగా ఎదుర్కొన్న ధైర్యం ఉన్నాయి.

నారా లోకేష్ రాజకీయాల్లోకి వచ్చిన కొత్తలో ఆయన భాషపై, వ్యక్తిత్వంపై ప్రత్యర్థులు విపరీతమైన ట్రోలింగ్ చేశారు. “నాయకత్వ లక్షణాలు లేవు”, “రాజకీయాలకు పనికిరారు” అంటూ సెటైర్లు వేశారు. 2014 తర్వాత ఎమ్మెల్సీగా చట్టసభల్లోకి అడుగుపెట్టినప్పుడు కూడా, “నేరుగా పోటీ చేస్తే గెలవలేరు కాబట్టే పరోక్షంగా వచ్చారు” అనే విమర్శలు ఎదురయ్యాయి. ఐటీ, పంచాయతీరాజ్ శాఖ మంత్రిగా ఆయన పనితీరును ప్రశంసించే వారికంటే, ఆయన మాటల్లో తడబాటును వెతికే వారే ఎక్కువగా ఉండేవారు. కానీ లోకేష్ వాటన్నింటినీ మౌనంగా భరించారు.

లోకేష్ రాజకీయ జీవితంలో మంగళగిరి ఓటమి ఒక మలుపు. 2019 ఎన్నికల్లో ఓటమి పాలైనప్పుడు, “లోకేష్ రాజకీయ జీవితం ముగిసిపోయింది” అని విశ్లేషకులు కూడా భావించారు. కానీ లోకేష్ మాత్రం బెదరలేదు. ఓటమిని పలాయనానికి సాకుగా తీసుకోలేదు. తాను ఓడిపోయిన మంగళగిరి నియోజకవర్గాన్నే తన చిరునామాగా మార్చుకున్నారు. “మళ్ళీ గెలిస్తే ఇక్కడే గెలవాలి” అని శపథం చేసి, ఐదేళ్ల పాటు అక్కడే ప్రజల మధ్య ఉంటూ తనకంటూ ఒక బలమైన కేడర్‌ను నిర్మించుకున్నారు.

గత ఐదేళ్ల కాలంలో లోకేష్ తనను తాను ఒక శిల్పంలా చెక్కుకున్నారు. ఆయన ఆహార్యం మారింది, ప్రసంగాల్లో స్పష్టత వచ్చింది, విమర్శలను తిప్పికొట్టే ధైర్యం వచ్చింది. అన్నింటికంటే ముఖ్యంగా, ‘యువగళం’ పాదయాత్ర ఆయనలోని నాయకుడిని ప్రజల ముంగిట నిలబెట్టింది. వేల కిలోమీటర్ల నడకలో ఆయన ఎండను, వానను, కేసులను, పోలీసుల అడ్డంకులను లెక్కచేయలేదు. ప్రజల సమస్యలను నేరుగా విని, వారికి భరోసానిచ్చారు. ఈ యాత్రే లోకేష్‌ను ఒక మాస్ లీడర్‌గా మార్చింది.

2024 ఎన్నికల్లో మంగళగిరి నుంచి భారీ మెజారిటీతో విజయం సాధించడం ద్వారా లోకేష్ తనపై వచ్చిన విమర్శలన్నింటికీ శాశ్వత తాళం వేశారు. తండ్రి చాటు బిడ్డగా కాకుండా, సొంత కష్టంతో గెలిచిన నాయకుడిగా ముద్ర వేసుకున్నారు. ఈ రోజు ఆయన కేవలం చంద్రబాబు వారసుడు మాత్రమే కాదు.. టీడీపీ క్యాడర్‌కు భరోసా ఇచ్చే ‘లోకేష్ అన్న’. మీడియా అడిగే క్లిష్టమైన ప్రశ్నలకు సైతం తడబడకుండా, ధైర్యంగా సమాధానం చెప్పగలిగే పరిణతి ఆయనలో కనిపిస్తోంది.

నేర్చుకోవాలనే తపన, ఓటమి నుంచి పాఠాలు నేర్చుకునే గుణం ఉంటే ఏ రంగంలోనైనా రాణించవచ్చని లోకేష్ నిరూపించారు. అవమానాలను పునాది రాళ్లుగా మార్చుకుని, వాటిపైనే తన విజయ శిఖరాన్ని నిర్మించుకున్నారు. పార్టీని భవిష్యత్తులో ముందుండి నడిపించగల సమర్థుడిగా ఆయన ఎదిగిన తీరు అభినందనీయం.

ఆయన ఇలాగే తన సేవా దృక్పథంతో, పట్టుదలతో రాష్ట్రాభివృద్ధిలో కీలక పాత్ర పోషించాలని కోరుకుంటూ.. నారా లోకేష్‌ కు హృదయపూర్వక జన్మదిన శుభాకాంక్షలు!