Chandra Babu: దావోస్ టూర్‌తో ఏపీకి భారీ పెట్టుబడుల వేటలో బాబు..

ఆంధ్రప్రదేశ్ ముఖ్యమంత్రి చంద్రబాబు నాయుడు (Chandrababu Naidu) రాష్ట్రానికి భారీ పెట్టుబడులు రప్పించాలనే లక్ష్యంతో నిరంతరం కృషి చేస్తున్నారు. నాలుగోసారి ముఖ్యమంత్రిగా బాధ్యతలు చేపట్టిన వెంటనే ఆయన దృష్టి పూర్తిగా పెట్టుబడులపైనే మళ్లింది. గత పద్దెనిమిది నెలలుగా ఆయన దేశ విదేశాలు సందర్శిస్తూ, పలు సంస్థలతో చర్చలు జరుపుతూ, ఏపీని పెట్టుబడులకు అనుకూల గమ్యస్థానంగా నిలపడానికి ప్రయత్నాలు కొనసాగిస్తున్నారు. ఏపీని సన్‌రైజ్ స్టేట్ (Sunrise State) గా అభివర్ణిస్తూ, పారిశ్రామిక వాతావరణం పూర్తిగా పెట్టుబడిదారులకు అనుకూలంగా మారుతోందని ఆయన చెబుతున్నారు.

ఈజ్ ఆఫ్ డూయింగ్ బిజినెస్ (Ease of Doing Business) భావనను మరింత వేగవంతం చేస్తూ స్పీడ్ ఆఫ్ డూయింగ్ బిజినెస్ అనే కొత్త విధానాన్ని ప్రభుత్వం అమలు చేస్తున్నట్లు వివరించారు. సింగిల్ విండో విధానంతో అనుమతుల జాప్యం తగ్గించడంతో పాటు, పెట్టుబడులు పెట్టే వారికి ప్రత్యేక ప్రోత్సాహకాలు అందిస్తూ ఏపీ వైపు కంపెనీల దృష్టిని ఆకర్షిస్తున్నారు.

ఇటీవల విశాఖపట్నంలో (Visakhapatnam) నవంబర్ 14, 15 తేదీల్లో జరిగిన పార్టనర్‌షిప్ సమ్మిట్ (Partnership Summit) ను చంద్రబాబు పెద్ద ఎత్తున నిర్వహించారు. ఈ కార్యక్రమంలో దాదాపు పదమూడు లక్షల కోట్ల విలువైన పెట్టుబడులపై అవగాహన ఒప్పందాలు కుదిరాయని ప్రభుత్వం వెల్లడించింది. సమ్మిట్ కోసం ముందస్తుగా మూడు నాలుగు నెలలపాటు బాబు అనేక దేశాలలో పర్యటించిన విషయం తెలిసిందే. సమ్మిట్ ముగియగానే కొద్ది రోజుల్లోనే మళ్లీ విదేశీ పర్యటనకు సిద్ధమవుతూ దావోస్ (Davos) వైపు దృష్టి సారించినట్లు తెలుస్తోంది.

కొత్త ఏడాది ప్రారంభమైన వెంటనే జనవరి 19 నుంచి 23 వరకు నాలుగు రోజులపాటు ఆయన దావోస్‌లో జరిగే వరల్డ్ ఎకనామిక్ ఫోరం (World Economic Forum) సమావేశాలకు హాజరవుతారు. ప్రపంచం నలుమూలల నుండి ప్రముఖ పారిశ్రామికవేత్తలు పాల్గొనే ఈ వేదికలో ఏపీ సామర్థ్యాలను బలంగా ప్రదర్శించేందుకు బాబు ప్రణాళికలు సిద్ధం చేశారు.

చంద్రబాబు గతంలో కూడా 2025లో దావోస్ సమావేశాలకు హాజరై మంచి గుర్తింపు పొందారు. ఆ సమయంలో ఆయనతో పాటు మంత్రి నారా లోకేష్ (Nara Lokesh)‌తో కలిసి చేసిన ప్రజెంటేషన్‌ హాజరైనవారిని ఆకట్టుకుంది. ఆ పర్యటన ఫలితంగా కొద్ది పెట్టుబడులు రాష్ట్రానికి వచ్చాయి. అయితే తర్వాత పారిశ్రామిక విధానాల్లో జరిగిన మార్పుల కారణంగా పెట్టుబడుల ఊపు తగ్గింది.

ఈసారి మాత్రం పరిస్థితి పూర్తిగా మారిందని ప్రభుత్వ వర్గాలు చెబుతున్నాయి. ముఖ్యమంత్రి ప్రయాణంలో నారా లోకేష్‌తో పాటు పరిశ్రమల శాఖ మంత్రి టీజీ భరత్ (TG Bharat) , ప్రధాన అధికారులు చేరనున్నట్లు సమాచారం. ఐదు రోజుల దావోస్ పర్యటన సందర్భంగా పలువురు ప్రముఖ పారిశ్రామికవేత్తలతో సమావేశాలు జరిగే అవకాశముంది. కొన్ని కీలక ఒప్పందాలు కుదిరే అవకాశం ఉందని ప్రభుత్వ వర్గాలు ఆశాభావం వ్యక్తం చేస్తున్నాయి. మొత్తం మీద చంద్రబాబు దావోస్ మిషన్‌కి పూర్తిగా సిద్ధమైపోయారు. రాష్ట్ర పెట్టుబడి దిశలో ఈ పర్యటన మరో కీలక అడుగుగా మారనుందని భావిస్తున్నారు.