Europe-US: మీ రక్షణకు అమెరికాయే దిక్కు… యూరప్ కు నాటో చీఫ్ హెచ్చరికలు..

యూరోపియన్ యూనియన్ దేశాలకు నాటో చీఫ్ తీవ్ర హెచ్చరికలు చేశారు. ముఖ్యంగా గ్రీన్ లాండ్ వ్యవహారంలో తీవ్ర విభేదాలు తలెత్తిన సమయంలో.. కీలక కామెంట్స్ చేశారు. అగ్రరాజ్యం మద్దతు లేకపోతే యూరప్‌కు రక్షణే లేదని హెచ్చరించారు. బెల్జియంలో ఈయూ చట్టసభ్యులతో జరిగిన సమావేశంలో నాటో (NATO) సెక్రటరీ జనరల్‌ మార్క్‌ రుట్టే ఈ విషయం గురించి ప్రస్తావించారు.

‘‘అమెరికా సాయం లేకుండానే యూరోపియన్‌ యూనియన్‌ తనను తాను రక్షించుకోగలదని ఎవరైనా అనుకుంటే.. అలాగే భ్రమపడుతూ ఉండండి. ఎందుకంటే అది సాధ్యమయ్యే పని కాదు. యూరప్ కు ఆత్మరక్షణ చేసుకునే సామర్థ్యం లేదు. ఒకవేళ ఈ విషయంలో సొంతంగా నిలబడాలనుకుంటే.. యూరప్ దేశాలు రక్షణపై వ్యయాలను పెంచాల్సి ఉంటుంది. అందుకే యూరప్, అమెరికా పరస్పరం కలిసి పనిచేయాల్సిన అవసరం ఉంది’’ అని మార్క్‌ రుట్టే (NATO Chief Mark Rutte) వెల్లడించారు.

గ్రీన్‌లాండ్‌ను స్వాధీనం చేసుకుంటామన్న ట్రంప్‌ (Donald Trump) హెచ్చరికలతో అమెరికా, యూరప్ మధ్య తీవ్ర విబేధాలు నెలకొన్నాయి. గ్రీన్‌లాండ్‌కు మద్దతిస్తున్న యూరప్ దేశాలపై సుంకాలను విధిస్తానని ట్రంప్‌ బెదిరింపులు కూడా చేశారు. ఈ బెదిరింపులపై యూరోపియన్ దేశాల నుంచి తీవ్ర స్పందనే వచ్చింది. తాము సామ్రాజ్య వాద విధానాలకు తలొగ్గే ప్రసక్తే లేదని ఫ్రాన్స్, బ్రిటన్ తదితర దేశాలు స్పష్టం చేశాయి.

ఈ పరిణామాల నేపథ్యంలో నాటో చీఫ్‌ మార్క్‌ రుట్టే.. అగ్రరాజ్య అధ్యక్షుడితో ద్వైపాక్షిక సమావేశం నిర్వహించారు. గ్రీన్‌లాండ్‌, ఆర్కిటిక్‌ ప్రాంత భవిష్యత్తు ఒప్పందానికి వీరు ఓ ఫ్రేమ్‌వర్క్‌ రూపొందించారు. దీంతో సుంకాలపై తన నిర్ణయాన్ని ట్రంప్‌ వెనక్కి తీసుకున్నారు.