Viral Video: ఒంటరి పెంగ్విన్ ప్రయాణం.. వైరల్ వీడియో వెనుక దాగున్న చేదు నిజం

గత కొన్ని రోజులుగా పెంగ్విన్‌కి సంబంధించిన ఒక వీడియో సోషల్ మీడియాలో వైరల్ అవుతోంది. సోషల్ మీడియాలో మనం చూస్తున్న ఆ పెంగ్విన్ నడక వెనుక ఒక విషాదకరమైన, శాస్త్రీయమైన నేపథ్యం ఉంది. అసలు ఆ పెంగ్విన్ ఒంటరిగా ఎందుకు నడుస్తోంది. వైరల్ వీడియో వెనక ఉన్న నిజమేంటో తెలుసుకుందాం. ఈ వైరల్ క్లిప్ ప్రఖ్యాత జర్మన్ దర్శకుడు వెర్నర్ హెర్జాగ్ తీసిన ‘ఎన్‌కౌంటర్ ఎట్ ది ఎండ్ ఆఫ్ ది వరల్డ్’ (2007) అనే డాక్యుమెంటరీలోనిది.

అంటార్కిటికాలోని మెక్‌ముర్డో స్టేషన్ సమీపంలో ఈ దృశ్యాన్ని చిత్రీకరించారు. ఒక పెంగ్విన్ తన గుంపును వదిలి, సముద్రానికి విరుద్ధ దిశలో అంటే ప్రాణాలకు ముప్పు ఉన్న మంచు కొండల వైపు నడవడం ఇందులో కనిపిస్తుంది. శాస్త్రవేత్తల ప్రకారం, పెంగ్విన్లు తమ దారిని గుర్తించడానికి కొన్ని ప్రకృతి సంకేతాలపై ఆధారపడతాయి. కొన్నిసార్లు జన్యుపరమైన లోపాలు లేదా అనారోగ్యం కారణంగా వాటి నావిగేషన్ వ్యవస్థ దెబ్బతింటుంది. అప్పుడు అవి అయోమయంలో పడి తప్పుడు దిశలో ప్రయాణిస్తాయి.

డిసోరియంటేషన్..

ఈ స్థితిలో ఉన్న పెంగ్విన్‌ను పట్టుకుని తిరిగి గుంపులో వదిలినా, అది మళ్లీ అదే తప్పుడు దిశ వైపు వెళ్తుంది. దర్శకుడు దీన్ని ‘మరణ యాత్ర’ అని పిలిచారు. ఎందుకంటే ఆ దిశలో ఆహారం, నీరు దొరకవు. ఆ పెంగ్విన్ దాదాపు 70 కిలోమీటర్ల వరకు వెనక్కి తిరిగి చూడకుండా నడిచి, చివరికి ప్రాణాలు కోల్పోతుంది.

మనుషులు ఎందుకు కనెక్ట్ అవుతున్నారు?

2026లో ఈ వీడియో మళ్లీ వైరల్ కావడానికి ప్రధాన కారణం మనుషుల్లో పెరిగిన మానసిక అలసట. అన్నీ వదిలేసి ఎక్కడికైనా వెళ్ళిపోవాలనే సగటు మనిషి కోరికకు ఈ పెంగ్విన్ ఒక చిహ్నంగా మారింది. “ఆఫీస్ ఒత్తిడి తట్టుకోలేక వెళ్తున్న నేను”, “లైఫ్ మీద క్లారిటీ లేని పెంగ్విన్” వంటి మీమ్స్ దీనిపై లక్షల సంఖ్యలో వస్తున్నాయి.

ఆ పెంగ్విన్ ప్రశాంతతలో మనుషులు తమలోని ఖాళీని (Emptiness) చూసుకుంటున్నారు. మనుషులు జంతువులకు కూడా తమలాగే ఆలోచనలు ఉంటాయని భావిస్తారు (Anthropomorphism). పెంగ్విన్ ఆత్మహత్య చేసుకుంటోందని లేదా విరక్తితో వెళ్తోందని అనుకోవడం మన ఆలోచన మాత్రమే. ప్రకృతిలో కొన్నిసార్లు జీవులు దారి తప్పుతాయి, కానీ మనం దానికి భావోద్వేగ రంగులు అద్దుతాము. ఆ పెంగ్విన్ వీడియో మనకు ఒక పాఠం చెబుతోంది. అది దారి తప్పిన పెంగ్విన్ కావచ్చు, కానీ అది చూస్తున్నప్పుడు మనం పొందుతున్న భావనలు మన ప్రస్తుత సమాజం ఎదుర్కొంటున్న మానసిక ఒత్తిడికి అద్దం పడుతున్నాయి.