Yanamala Ramakrishnudu: యనమల బాధేంటి..?

దాదాపు నాలుగు దశాబ్దాల సుదీర్ఘ రాజకీయ ప్రస్థానం, పార్టీ ఆవిర్భావం నుండి అత్యంత కీలక పదవుల్లో అధికారాన్ని చెలాయించిన సీనియర్ నేత యనమల రామకృష్ణుడు (Yanamala Ramakrishnudu) తాజాగా చేస్తున్న వ్యాఖ్యలు తెలుగుదేశం (TDP) పార్టీలో తీవ్ర చర్చకు దారితీస్తున్నాయి. ఎమ్మెల్సీ పదవీకాలం ముగిసిన తర్వాత పార్టీ అధిష్టానం నుండి ఎలాంటి పదవీ దక్కకపోవడంతో ఆయనలో పేరుకుపోయిన అసంతృప్తి క్రమంగా బహిరంగ విమర్శల రూపంలో వెలువడుతోంది. ఈ పరిణామం పార్టీ శ్రేణులకు ఆగ్రహం తెప్పిస్తుండగా, ప్రతిపక్షానికి పదునైన అస్త్రంగా మారుతోంది.

యనమల రామకృష్ణుడు తన 40 ఏళ్ల రాజకీయ జీవితంలో ఎమ్మెల్యేగా, మంత్రిగా, స్పీకర్‌గా, పీఏసీ ఛైర్మన్‌గా అనేక కీలక బాధ్యతలు నిర్వహించారు. 2013లో ఎమ్మెల్సీగా ఎన్నికై, గత టీడీపీ ప్రభుత్వంలో ఆర్థిక మంత్రిగా కొనసాగారు. అయితే ఎమ్మెల్సీ పదవీకాలం ముగిసిన తర్వాత ఆయన వయస్సు, అనుభవాన్ని దృష్టిలో ఉంచుకుని ఆయనకు పార్టీలో క్రియాశీలక పదవి గానీ, రాజ్యసభ వంటి గౌరవప్రదమైన అవకాశం గానీ దక్కుతుందని ఆయన భావించారు. కానీ, అధిష్టానం నుండి ఆ దిశగా ఎటువంటి ముందడుగు లేకపోవడంతో ఆయన ఖాళీగా ఉన్నారు. ఈ నేపథ్యంలోనే ఆయన తనకు రాజ్యసభకు వెళ్లాలనే ఆకాంక్ష ఉందని బహిరంగంగా వ్యాఖ్యానించడం ద్వారా తన పదవీకాంక్షను పరోక్షంగా బయటపెట్టారు. తన కోరిక నెరవేరుతుందో లేదో తెలీదని ఆయన వ్యాఖ్యానించడం వెనుక, అధిష్టానంపై ఆయనకున్న అపారమైన అనుభవం, నిబద్ధతకు తగిన గౌరవం దక్కలేదనే భావన స్పష్టంగా కనిపిస్తోంది.

యనమల కేవలం తన పదవీకాంక్ష గురించి మాట్లాడటానికే పరిమితం కాలేదు. అడపాదడపా ఆయన చేస్తున్న వ్యాఖ్యలు, పరోక్ష విమర్శలు పార్టీ వర్గాల్లో ప్రకంపనలు సృష్టిస్తున్నాయి. గతంలో కాకినాడ సెజ్‌ భూములకు సంబంధించి పార్టీ తీసుకున్న నిర్ణయాన్ని ఆయన తప్పుబట్టారు. పార్టీ అధికారంలో ఉన్నప్పుడు తీసుకున్న నిర్ణయాలపై సీనియర్ నేత బహిరంగంగా విమర్శలు చేయడం వెనుక, ఆయన అంతర్గత అభిప్రాయాలను పార్టీ సీరియస్‌గా తీసుకోవడం లేదనే భావన ఉంది. ఇటీవల ఆయన చేసిన ప్రతిపక్షం ఊదితే మనం ఎగిరిపోతాం అనే వ్యాఖ్య మరింత సంచలనం సృష్టించింది. ప్రతిపక్ష బలాన్ని ఎప్పుడూ తక్కువ అంచనా వేయకూడదనే అర్థంలో ఈ వ్యాఖ్య చేసినప్పటికీ, ఒక సీనియర్ నేత ఇలా మాట్లాడటం టీడీపీ శ్రేణుల ఆత్మవిశ్వాసాన్ని దెబ్బతీసేలా ఉంది. ఈ వ్యాఖ్య పార్టీ వైఖరిపై విమర్శగా, ప్రతిపక్షంపై ఉన్న అప్రమత్తత లేమిని ఎత్తిచూపేలా పార్టీ అంతర్గత వ్యవహారాలను బహిర్గతం చేసినట్లైంది.

యనమల రామకృష్ణుడు వంటి సీనియర్, అనుభవజ్ఞుడైన నేత అసంతృప్తి స్వరం వినిపించడం తెలుగుదేశం పార్టీకి అనేక రకాలుగా నష్టాన్ని కలిగిస్తోంది. సుదీర్ఘ అనుభవం ఉన్న నాయకుడు ఇలాంటి వ్యాఖ్యలు చేయడం క్షేత్రస్థాయి కార్యకర్తల్లో తీవ్ర ఆగ్రహాన్ని, అయోమయాన్ని కలిగిస్తోంది. యనమల అసంతృప్తి, విమర్శలు అధిష్టానంపై అదనపు ఒత్తిడి పెంచుతున్నాయి. పార్టీలో సీనియర్లకు తగిన గౌరవం దక్కడం లేదనే సందేశం ప్రజల్లోకి వెళ్లే ప్రమాదం ఉంది. యనమల వ్యాఖ్యలను ప్రతిపక్ష వైసీపీ తనకు అనుకూలంగా ములుచుకుంటోంది. సీనియర్‌ నేతకే సొంత పార్టీపై నమ్మకం లేదనేలా విమర్శిస్తోంది. ముఖ్యంగా ప్రతిపక్షం ఊదితే పారిపోవాల్సిందే అనే వ్యాఖ్యను వైసీపీ తమ బలం పెరిగిందనడానికి సాక్ష్యంగా చూపుతోంది.

యనమల సుదీర్ఘ రాజకీయ అనుభవం, ఆర్థిక విషయాలపై ఆయనకు ఉన్న పట్టు పార్టీకి బలం. పదవులు దక్కకపోవడం కంటే, తన సలహాలను పార్టీ పట్టించుకోవడం లేదనే భావన ఆయన అసంతృప్తికి ప్రధాన కారణంగా కనిపిస్తోంది. పార్టీ అధినేత చంద్రబాబు ఈ సమస్యను తక్షణమే నివారించాల్సిన అవసరం ఉంది.