Street Dogs: వీధి కుక్కల నియంత్రణకు ఏపీ సర్కార్ కొత్త ప్రణాళిక

మనిషికి ప్రమాదం కలిగించే కుక్క కాట్ల సమస్య రోజురోజుకూ పెరుగుతోంది. పల్లె, పట్టణం, నగరం అనే తేడా లేకుండా వీధి కుక్కల (Street dogs) సంఖ్య అధికమవుతుండటంతో ప్రజల్లో భయం పెరిగింది. కుక్క కరచి ప్రాణాలు కోల్పోయిన ఘటనలు కూడా ఎన్నో చోట్ల వెలుగుచూస్తున్నాయి. జంతు ప్రియులు వీధి కుక్కలను రక్షించాలని కోరుతున్నప్పటికీ, బాధితులు మాత్రం న్యాయం కోసం కోర్టులను ఆశ్రయిస్తున్నారు. ఈ నేపథ్యంలో సుప్రీంకోర్టు (Supreme Court) ఇటీవల కీలకమైన తీర్పు ఇచ్చి, బయట తిరిగే కుక్కలను గుర్తించి భద్రత కలిగిన షెల్టర్లకు తరలించాలని రాష్ట్ర ప్రభుత్వాలకు ఆదేశించింది.

ఈ ఆదేశాల నేపథ్యంలో ఆంధ్రప్రదేశ్ ప్రభుత్వం కూడా వీధి కుక్కల వల్ల కలిగే ప్రమాదాలను తగ్గించడానికి చర్యలు వేగవంతం చేసింది. ముఖ్యంగా మున్సిపల్ అడ్మినిస్ట్రేషన్ అండ్ అర్బన్ డెవలప్‌మెంట్ శాఖ (MA&UD) దీనిపై సమగ్ర ప్రణాళికను అమలు చేస్తోంది. పట్టణాల్లో కుక్క కాట్ల (Dog bite cases) ఘటనలు పెరుగుతుండడంతో ప్రభుత్వం జనాభా నియంత్రణ, వ్యాధి నివారణ చర్యలపై దృష్టి పెట్టింది. ఇప్పటికే జారీ చేసిన ఆదేశాల ప్రకారం అన్ని మున్సిపల్ కమిషనర్లు రేబిస్ వ్యాధి (Rabies ) వ్యాప్తిని అరికట్టే చర్యలు చేపట్టాలి.

ఆంధ్రప్రదేశ్ పట్టణ ప్రాంతాల్లో ప్రస్తుతం వీధి కుక్కల సంఖ్య 5.15 లక్షలకు పైగా ఉన్నట్లు అంచనా. ఈ సంఖ్య చిన్నది కాదు. జనాభా నియంత్రణ కోసం గత కొన్నేళ్లుగా వివిధ మున్సిపాలిటీల్లో వెటర్నరీ టీమ్‌లతో కలిసి సంతాన నిరోధక శస్త్రచికిత్సలు చేయిస్తున్నారు. ఇప్పటివరకు మూడు లక్షలకుపైగా కుక్కలకు శస్త్రచికిత్సలు పూర్తి కావడం ప్రభుత్వ ప్రయత్నాల తీవ్రతను చూపుతుంది. భవిష్యత్తులో సమస్య మరింత పెరగకుండా ముందస్తు చర్యలు కొనసాగించనున్నట్లు అధికారులు తెలిపారు.

రేబిస్ ప్రమాదం ఉన్న కుక్కలను ప్రత్యేకంగా గుర్తించి వాటిని తాత్కాలిక షెల్టర్లలో ఉంచే విధానం కూడా అమలు చేస్తున్నారు. ముఖ్య పట్టణ కార్పొరేషన్లలో దీనికి అవసరమైన ఏర్పాటు చేస్తున్నారు. అలాగే అన్ని పట్టణ స్థానిక సంస్థల్లో ఆపరేషన్ థియేటర్లు, కెన్నెల్స్, వైద్య సిబ్బంది వంటి సదుపాయాలతో ఏబీసీ సెంటర్లు ఏర్పాటు చేస్తూ ప్రభుత్వం ముందుకెళ్తోంది. రాష్ట్రవ్యాప్తంగా 197 మంది శిక్షణ పొందిన డాగ్ క్యాచర్లను నియమించడం ద్వారా వీధి కుక్కలను సురక్షితంగా పట్టుకోవడం సులభమైంది.

ఇక కొత్తగా అన్ని పట్టణాల్లో కుక్కల జనాభాపై సర్వే చేపట్టాలని కూడా ఆదేశాలు వెలువడ్డాయి. అదనంగా అంగన్‌వాడీలు, పాఠశాలలు, ఆసుపత్రులు, బస్సు డిపోలు, క్రీడా మైదానాలు వంటి ప్రదేశాలు పూర్తిగా సురక్షితం కావాలని మున్సిపల్ కమిషనర్లను హెచ్చరించారు. పిల్లలు, వృద్ధులు ఎక్కువగా వచ్చే ప్రాంతాల్లో అవగాహన కార్యక్రమాలు కూడా ప్రారంభించారు.

మొత్తానికి ప్రజల భద్రతకు ప్రథమ ప్రాధాన్యత ఇస్తూ ప్రభుత్వం సుప్రీంకోర్టు మార్గదర్శకాలకు అనుగుణంగా కట్టుదిట్టమైన చర్యలు తీసుకుంటోంది. కుక్కలతో మనుషుల సహజీవనం కొనసాగినా, ప్రజల జీవితం ప్రమాదంలో పడకూడదనే ఉద్దేశంతో ఈ చర్యలను తీసుకుంటున్నట్లు అధికారులు పేర్కొంటున్నారు.