Furniture: ఫర్నీచర్‌పైనా ట్రంప్‌ సుంకాలు!

అమెరికాలోకి దిగుమతయ్యే ఫర్నీచర్‌ (Furniture)పైనా సుంకాలు విధిస్తానని ఆ దేశ అధ్యక్షుడు డొనాల్డ్‌ ట్రంప్‌ (Donald Trump )గత వారాంతంలో సంకేతాలిచ్చారు. ప్రస్తుతం తమ దేశంలోకి ఫర్నీచర్‌ దిగుమతుల పై దర్యాప్తును ప్రారంభించడం జరిగిందని, 50 రోజుల్లో పూర్తవనున్న దర్యాప్తు అనంతరం ఎంత మేర సుంకాలు విధించాలనేది నిర్ణయిస్తామన్నారు. ఇది భారత ఫర్నీచర్‌ (Indian Furniture) ఎగుమతులపైనా గణనీయ ప్రభావం చూపే అవకాశం ఉంది. ఎందుకంటే, ప్రపంచంలో అమెరికానే అతిపెద్ద ఫర్నీచర్‌ దిగుమతిదారు. ప్రపంచ దిగుమతుల్లో 30 శాతం వాటా అమెరికాదే. గత ఏడాది యూఎస్‌ 2,896 కోట్ల డాలర్ల విలువైన ఫర్నీచర్‌ను దిగుమతి చేసుకుంది. అందులో 60 శాతం చైనా, వియత్నాం నుంచే తరలిపోయింది. కాగా, అమెరికాకు భారత్‌ ఎనిమిదో అతిపెద్ద ఫర్నీచర్‌ ఎగుమతిదారు. గత ఆర్థిక సంవత్సరం (2024-25)లో మన దేశం నుంచి 110 కోట్ల డాలర్ల విలువైన ఫర్నీచర్‌, బెడ్లు, పరుపులు అమెరికాకు ఎగుమతయ్యాయి. మన ఫర్నీచర్‌ సంబంధిత మొత్తం ఎగుమతుల్లో అమెరికాదే 45 శాతం వాటా.