Donald Trump :డొనాల్డ్‌ ట్రంప్‌ ప్రతిపాదన ..అందుకు సిద్ధమేనన్న జెలెన్‌స్కీ

రష్యన్‌ భూభాగంలోకి లోతుగా చొచ్చుకువెళ్లి దాడులు చేయాలని అమెరికా అధ్యక్షుడు డొనాల్డ్‌ ట్రంప్‌ (Donald Trump) ఉక్రెయిన్‌ను ప్రైవేట్‌గా కోరినట్టు సమాచారం. అంతేగాక సుదూర లక్ష్యాలను ఛేదించే క్షిపణులను అందచేస్తే మాస్కోపై కూడా దాడి చేయగలరా అని కూడా ఉక్రెయిన్‌ అధ్యక్షుడు జెలెన్‌స్కీ (Zelensky)ని ట్రంప్‌ ప్రశ్నించారు. ఆయుధాలిస్తే అందుకు సిద్ధమేనని జెలెన్‌స్కీ బదులిచ్చినట్టు తెలిసింది. రష్యా అధ్యక్షుడు వ్లాదిమిర్‌ పుతిన్‌ (Vladimir Putin)తో మాట్లాడిన మరుసటి రోజు జెలెన్‌స్కీతో ట్రంప్‌ టెలిఫోన్‌లో మాట్లాడిన సందర్భంగా ఈ వ్యాఖ్యలు చోటుచేసుకున్నట్లు విశ్వసనీయ వర్గాలను వెల్లడించింది. అమెరికా తయారీ ఏటీఏసీఎంఎస్‌ క్షిపణులను ఉక్రెయిన్‌కి సరఫరా చేసే విషయాన్ని కూడా ట్రంప్‌ చర్చించినట్లు తెలుస్తోంది.

పుతిన్‌తో తన సంభాషణపై ట్రంప్‌ అసంతృప్తి వ్యక్తం చేశారు. ఉక్రెయిన్‌తో యుద్ధం ముగించడం పట్ల పుతిన్‌ ఆసక్తిగా ఉన్నట్లు కనపడడం లేదంటూ ట్రంప్‌ వ్యాఖ్యానించారు. ఉక్రెయిన్‌కి ఆయుధాల సరఫరాను అమెరికా నిలిపివేసిన కొన్ని వారాల తర్వాత తాజా పరిణామం చోటుచేసుకుంది. నాటో సెక్రటరీ జనరల్‌ మార్క్‌ రూతేతో కలసి ఓవల్‌ ఆఫీసు (Oval Office) నుంచి మాట్లాడిన ట్రంప్‌ నాటో (NATO) మిత్ర దేశాలకు త్వరలో వందల కోట్ల డాలర్ల విలువైన అమెరికా తయారీ ఆయుధాలను పంపనున్నట్లు ధ్రువీకరించారు. తాము అత్యంత అధునాతన ఆయుధాలను తయారుచేయనున్నామని, అవి నాటోకు వెళతాయని ట్రంప్‌ విలేకరులకు తెలిపారు.