Big Beautiful Bill : బిగ్‌ బ్యూటిఫుల్‌ తో వీసా భారం

పన్నుల్లో కోత, వ్యయ నియంత్రణలు, వీసా ఫీజులను పెంచే లక్షంతో అమెరికా ప్రభుత్వం ప్రతిష్ఠాత్మకంగా తీసుకువచ్చిన వన్‌బిగ్ బ్యూటిఫుల్ బిల్లు  (Big Beautiful Bill)  చట్టరూపం దాల్చిన విషయం తెలిసిందే. దీని ద్వారా వీసా దరఖాస్తుదారులపై అదనపు భారం పడనున్నట్టు తెలుస్తోంది. ముఖ్యంగా నాన్ ఇమిగ్రెంట్లకు కొత్తగా వీసా ఇంటిగ్రిటీ ఫీజును డిపార్టుమెంట్ ఆఫ్ హోమ్‌ల్యాండ్ సెక్యూరిటీ తప్పనిసరి చేసింది. అంతేకాకుండా 2026 నుంచి దీన్ని మరింత పెంచేలా నిబంధనలు రూపొందించారు. ఇమ్మిగ్రేషన్ సేవల సంస్థ ఫ్రాగోమెన్ నివేదిక ప్రకారం నాన్ ఇమిగ్రెంట్ వీసా (Non-immigrant visa) జారీ చేసే సమయంలో వీసా ఇంటిగ్రిటీ ఫీజు (Integrity Fee) కింద 250 డాలర్లు తప్పనిసరిగా చెల్లించాల్సి ఉంటుంది.

భవిష్యత్తులో ఈ రుసుమును పెంచే అధికారం డీహెచ్‌ఎస్‌ (DHS) కు కల్పించారు. వినియోగదారుల ధరల సూచీ (సీపీఐ ) ఆధారంగా 2026 నుంచి ఏటా దీన్ని పెంచే అవకాశం ఉంది. ఎట్టి పరిస్థితుల్లోనూ ఈ ఫీజును తగ్గించడం కానీ, రద్దు చేయడం కానీ ఉండదు. అయితే కొన్ని పరిమితులకు లోబడి డీహెచ్‌ఎస్ మినహాయింపు ఇవ్వనుంది. వీసాదారుడు వీసా నిబంధనలన్నీ కచ్చితంగా పాటించాలి. ఐ 94 గడువు ముగిసే ఐదు రోజుల కంటే ముందు (కొనసాగింపునకు లేదా స్టేటస్ మార్పు కోసం దరఖాస్తు చేసుకోకుండా ) అమెరికాను వీడే వారికి,  ఐ94 గడువు కంటే ముందే చట్టపరంగా కొనసాగింపు. శాశ్వత నివాస అనుమతి లభించిన వారికి మాత్రమే వీసా ఇంటిగ్రిటీ ఫీజు రీఫండ్ అవకాశం ఉంటుంది.