Amazon : తెలంగాణ యువకుడికి అమెజాన్‌లో.. రూ.2 కోట్ల ప్యాకేజీతో

తెలంగాణలోని వికారబాద్‌ జిల్లా బొంరాస్‌పేట మండలం తుంకిమెట్ల గ్రామానికి చెందిన యువకుడికి అరుదైన అవకాశం దక్కింది. అర్బాజ్‌ ఖురేషి (Arbaaz Qureshi ) అనే యువకుడు ప్రఖ్యాత  ఐటీ కంపెనీ అమెజాన్‌ (Amazon) లో రూ.2 కోట్ల వార్షిక వేతనంతో అప్లైడ్‌ సైంటిస్ట్‌ ఉద్యోగానికి ఎంపికయ్యారు. ఈ ఉద్యోగంలో ఆయన నేడు చేరనున్నారు. 2019లో ఐఐటీ పట్నా నుంచి  కంప్యూటర్‌ సైన్స్‌లో బీటెక్‌ పూర్తి చేసిన ఆయన మూడో సంవత్సరంలో ఫ్రాన్స్‌కు చెందిన మెషీన్‌ లెర్నింగ్‌ కోవిదుడు గేల్‌ డయాస్‌ వద్ద మూడు నెలలు ఇంటర్న్‌షిప్‌ చేశారు. అనంతరం బెంగళూరులోని మైక్రోసాఫ్ట్‌ రీరెస్చ్‌లో రెండు సంవత్సరాలు పనిచేశారు. 2023లో అమెరికా (America) లోని యూనివర్సిటీ ఆఫ్‌ మసాచుసెట్స్‌ నుంచి ఏఐ, మెషీన్‌ లెర్నింగ్‌లో ఎంఎస్‌ పట్టా  పొందారు. ప్రముఖ ఐటీ గూగూల్‌లోనూ ఇంటర్న్‌షిప్‌ చేసే అవకాశం దక్కింది.  అర్బాజ్‌ ఖురేషి అమెజాన్‌లో శాస్త్రవేత్తగా ఉద్యోగం పొందడం పట్ల గ్రామస్థులు హర్షం వ్యక్తం చేశారు. యువకుడి తండ్రి యాసిన్‌ ఖురేషి ప్రస్తుతం ఎక్సైజ్‌ జాయింట్‌ కమిషనర్‌గా పని చేస్తున్నారు.