Laura Williams: అమెరికా కాన్సుల్‌ జనరల్‌ గా లారా విలియమ్స్‌ బాధ్యతల స్వీకరణ

హైదరాబాద్‌లోని యూఎస్‌ కాన్సులెట్‌ కార్యాలయంలో అమెరికా కాన్సుల్‌ జనరల్‌గా లారా విలియమ్స్‌ (Laura Williams)  బాధ్యతలు స్వీకరించారు. ఈ సందర్భంగా ఆమె మాట్లాడుతూ భారత్‌ – అమెరికా సంబంధాల బలోపేతం కోసం కృషి చేస్తానని చెప్పారు. యూఎస్‌ కాన్సులేట్‌ కార్యాలయంలో మరింత నాణ్యమైన సాంకేతిక సేవలు అందిస్తామన్నారు. తెలంగాణ (Telangana) , ఏపీతో పాటు ఒడిశా రాష్ట్రాల పరిధిలో హైదరాబాద్‌ యూఎస్‌ కాన్సులేట్‌ జనరల్‌ కార్యాలయం సేవలందిస్తోంది.

జెన్నిఫర్‌ లార్సన్‌ (Jennifer Larson ) ఇటీవల బదిలీ కావడంతో ఆమె స్థానంలో లారాను నియమించారు. యూఎస్‌ ఫారిన్‌ సర్వీసెస్‌ సీనియర్‌ అధికారి అయిన లారా విలియన్స్‌కు విదేశీ వ్యవహారాల్లో అపార అనుభవం  ఉంది. గతంలో ఆమె అమెరికా విదేశాంగశాఖలో ఎంటర్‌ప్రైజ్‌ సర్వీసెస్‌కు డిప్యూటీ చీఫ్‌ ఇన్ఫర్మేషన్‌ అధికారిగా పనిచేశారు. అంతేకాకుండా వాషింగ్టన్‌ (Washington)  డీసీలోని యూఎస్‌ విదేశాంగశాఖ ప్రధాన కార్యాలయంతోపాటు నికోసియా, అల్జీర్స్‌, రోమ్‌, మెక్సికో (Mexico)  తదితర రాయబార కార్యాలయాల్లో పనిచేశారు.