TG Politics: మేడారం జాతరలో మంత్రి కొండా సురేఖ సైలెంట్.. దేవాదాయ శాఖ మంత్రిని పక్కన పెట్టారా?

మేడారం/హైదరాబాద్: ఆసియాలోనే అతిపెద్ద గిరిజన జాతరగా గుర్తింపు పొందిన మేడారం సమ్మక్క-సారలక్క జాతర ప్రస్తుతం తెలంగాణలో కోలాహలంగా సాగుతోంది. అయితే, ఈ మహా జాతరలో కీలకమైన దేవాదాయ శాఖ మంత్రి కొండా సురేఖ ఆశించిన స్థాయిలో కనిపించకపోవడం ఇప్పుడు చర్చనీయాంశంగా మారింది. సాధారణంగా దేవాదాయ శాఖ ఆధ్వర్యంలో జరిగే ఇటువంటి భారీ ఉత్సవాల్లో ఆ శాఖ మంత్రి సర్వస్వమై వ్యవహరించాల్సి ఉంటుంది. కానీ మేడారంలో మాత్రం సీన్ రివర్స్‌లో కనిపిస్తోంది.

సీతక్క హడావిడి – సురేఖ నిశ్శబ్దం
జాతర ఏర్పాట్లు ప్రారంభమైనప్పటి నుండి ములుగు ఎమ్మెల్యే, మంత్రి సీతక్క అన్ని తానై వ్యవహరిస్తున్నారు. ఉమ్మడి వరంగల్ జిల్లా ఇన్‌చార్జ్ మంత్రి పొంగులేటి శ్రీనివాస్ రెడ్డి, మంత్రి అడ్లూరి లక్ష్మణ్ జాతర పనులను ఎప్పటికప్పుడు పర్యవేక్షిస్తున్నారు. కానీ, ఉమ్మడి వరంగల్ జిల్లాకే చెందిన మంత్రి కొండా సురేఖ మాత్రం ఎక్కడా హడావిడి చేయడం లేదు. దేవాదాయ శాఖ మంత్రిగా జాతర ప్రారంభానికి ముందే మేడారంలో ఉండి ఏర్పాట్లు చూడాల్సిన ఆమె, కేవలం నామమాత్రపు పర్యటనలకే పరిమితం కావడం వెనుక బలమైన కారణాలు ఉన్నాయని ప్రచారం జరుగుతోంది.

బాధ్యతల అప్పగింతపై అసహనం?
ముఖ్యమంత్రి రేవంత్ రెడ్డి మేడారం జాతర పూర్తి బాధ్యతలను మంత్రి సీతక్కకు, ఇన్‌చార్జ్ మంత్రి పొంగులేటికి అప్పగించడం సురేఖకు మింగుడు పడటం లేదని తెలుస్తోంది. తన శాఖ పరిధిలోని జాతరలో తనకు కాకుండా ఇతర మంత్రులకు ప్రాధాన్యత ఇవ్వడం పట్ల ఆమె తీవ్ర అసహనంతో ఉన్నట్లు సమాచారం.

పాసుల వివాదం, అంతర్గత విభేదాలు
మరోవైపు, వీఐపీ (VIP), వీవీఐపీ (VVIP) పాసుల పంపిణీలో కూడా తనను సంప్రదించడం లేదని, తన సిఫార్సులకు విలువ దక్కడం లేదని కొండా సురేఖ భావిస్తున్నట్లు పార్టీ వర్గాల్లో చర్చ నడుస్తోంది. మేడారం అభివృద్ధి పనుల నిధుల కేటాయింపులో కూడా గతంలోనే అంతర్గత విభేదాలు బయటపడ్డాయి. జాతరలో ప్రోటోకాల్ విషయంలో ఆమెను పక్కన పెడుతున్నారన్న భావనతోనే, ఆమె మేడారం విషయంలో అంటీముట్టనట్లు వ్యవహరిస్తున్నారని రాజకీయ విశ్లేషకులు అభిప్రాయపడుతున్నారు. ప్రభుత్వపరంగా అంతా సవ్యంగానే ఉందని నాయకులు చెబుతున్నా, కొండా సురేఖ దూరం పాటించడం మాత్రం ప్రతిపక్షాలకు విమర్శనాస్త్రంగా మారింది. వనదేవతల జాతరలో పాలక పక్ష మంత్రుల మధ్య ఉన్న ఈ సమన్వయ లోపం చర్చనీయాంశంగా మారింది.