Arnab Goswami: అతి ఉద్రిక్తత తర్వాత శాంతి.. టీడీపీ, ఆర్నాబ్ వివాదం సద్దుమణిగినట్లేనా..
- Published By: Bhuvana
- December 12, 2025 / 10:40 AM IST
ఇండిగో (IndiGo) విమాన ఘటనను కేంద్రంగా చేసుకుని గత మూడు రోజులుగా జాతీయ స్థాయిలో టీడీపీ(TDP)–ఆర్నాబ్ గొడవ పెద్ద చర్చగా మారింది. ప్రముఖ జాతీయ మీడియా యాంకర్ ఆర్నాబ్ గోస్వామి (Arnab Goswami) తన కార్యక్రమంలో టీడీపీని లక్ష్యంగా చేసుకొని చేసిన కఠిన వ్యాఖ్యలు వైరల్ కావడంతో ఈ వివాదం ఊహించని రీతిలో పెరిగిపోయింది. అసలు ఘర్షణ ఎందుకు పెరిగిందన్నదాని చుట్టూ పలురకాల అభిప్రాయాలు గట్టిగా వినిపిస్తున్నాయి.
వివాదం మొదలయ్యింది టీడీపీ ఎమ్మెల్సీ దీపక్ రెడ్డి (Deepak Reddy) చేసిన అతి స్పందనతోనే అని పార్టీ నాయకుల మధ్యే చర్చ నడుస్తోంది. మంత్రి రామ్మోహన్ నాయుడు (Ram Mohan Naidu) విషయాన్ని ప్రస్తావిస్తూ ఆర్నాబ్ చేసిన విమర్శలను ఎదుర్కొనే ప్రయత్నంలో, ఆయన వ్యాఖ్యలు టీడీపీ కేడర్లో మరింత ఆగ్రహానికి దారితీశాయి. ఆ ఉత్సాహంలోనే దీపక్ రెడ్డి చేసిన వ్యాఖ్యలు జాతీయంగా టీడపీపై వ్యతిరేక వాతావరణాన్ని సృష్టించాయనే అభిప్రాయం పార్టీ వర్గాల్లో ఉంది.
అసలు రామ్మోహన్ నాయుడు కేంద్రంలో క్లీన్ ఇమేజ్ ఉన్న యువ మంత్రి. కానీ బీజేపీని కాపాడాలనే ఉద్దేశంతోనే ఆర్నాబ్ అతన్ని టార్గెట్ చేశారని పార్టీ నాయకులు భావిస్తున్నారు. ఈ అంశంలో లోకేష్ (Nara Lokesh) పేరు అనవసరంగా లాగబడటం టీడీపీకి మరొక ఇబ్బందిగా మారింది. లోకేష్ అప్పటికే అమెరికా పర్యటనలో ఉండగా, ఈ గొడవతో ఆయన పేరు జాతీయ చర్చలోకి రావడం హైకమాండ్ను అసంతృప్తికి గురిచేసిందని అంటున్నారు.
వివాదం పెద్దది కావడంతో, టీడీపీ లోపల డ్యామేజ్ కంట్రోల్ ప్రయత్నాలు కూడా సాగాయి. లోకల్ యూట్యూబ్ ఛానళ్లలో ఆర్నాబ్పై వచ్చిన విమర్శల వల్లే ఆయన మరింత రెచ్చిపోయి తన డిబేట్లో టీడీపీని తీవ్రంగా విమర్శించినట్లు తెలుస్తోంది. దీనితో, నేపథ్యంలో ఉన్న కొందరు టీడీపీ అనుకూల మీడియా ప్రతినిధులు ఢిల్లీ (Delhi) వెళ్లి ఆర్నాబ్కు అసలు పరిస్థితేంటో వివరించినట్టు సమాచారం. ఈ చర్చల తర్వాత ఆర్నాబ్ కూడా కొంతమేర చల్లబడినట్లు టాక్ వినిపిస్తోంది.
2023లో చంద్రబాబు నాయుడు (N. Chandrababu Naidu) అరెస్టు అనంతరం లోకేష్ను జాతీయ మీడియాలో తొలి అవకాశం తానే ఇచ్చినట్లు ఆర్నాబ్ గుర్తుచేసుకున్నాడని కూడా ప్రచారం ఉంది. అప్పట్లో లోకేష్ చేసిన ప్రదర్శనపై ఆయన సానుకూల అభిప్రాయం వ్యక్తం చేసినట్లు చెబుతున్నారు. ఈ నేపథ్యంలో, తాజా వివాదం అనవసరంగా పెద్దదైందన్న భావన ఆర్నాబ్కూ వచ్చినట్టుంది. మొత్తం సందర్భాన్ని పరిశీలిస్తే, ఇండిగో ఘటన అసలు విషయం కాకపోయినా టీడీపీ–ఆర్నాబ్ వివాదం జాతీయ చర్చగా మారింది. కొందరు టీడీపీ నేతల అతి ఉత్సాహం కారణంగా పార్టీ అనవసర ఒత్తిడిని ఎదుర్కొన్నట్టే కనిపిస్తోంది. అయినా, డ్యామేజ్ కంట్రోల్ చర్చల తర్వాత పరిస్థితి కొంత సద్దుమణిగినట్టే కనబడుతోంది.
