Chandrababu: ఆధారాలు లేవని తెలిపిన సీఐడీ..ఫైబర్ నెట్ కేసులో చంద్రబాబుకు క్లీన్ చిట్..

ఆంధ్రప్రదేశ్ ముఖ్యమంత్రి నారా చంద్రబాబు నాయుడు ( Chandrababu Naidu)పై నమోదైన ఏపీ ఫైబర్ నెట్ కేసుకు సంబంధించిన దర్యాప్తులో కీలక పరిణామం చోటుచేసుకుంది. సీఐడీ (CID) అధికారులు కోర్టుకు సమర్పించిన తాజా నివేదిక ప్రకారం, ఆయనపై ఆరోపణలను బలపర్చే ఎలాంటి విశ్వసనీయ ఆధారాలు లేవని తేల్చారు. అందువల్ల కేసును అధికారికంగా ఉపసంహరించుకుంటున్నట్లు న్యాయస్థానానికి తెలియజేశారు. ఈ వివాదం గతంలో రాజకీయ రంగంలో తీవ్ర చర్చకు దారితీసింది. అప్పటి వైఎస్సార్ కాంగ్రెస్ పార్టీ (YSR Congress) ప్రభుత్వం ప్రతిపక్ష నేతగా ఉన్న చంద్రబాబుపై తీవ్రమైన ఆరోపణలు చేస్తూ కేసు నమోదుచేయడం పెద్ద వార్త అయింది.

గత ప్రభుత్వ కాలంలో ఈ కేసులో మొత్తం 16 మందిపై నేరాలు మోపారు. ప్రభుత్వ సంస్థకు భారీ ఆర్థిక నష్టం కలిగించారని ఆరోపించారు. అయితే తాజా విచారణలో సీఐడీ అధికారులు ఆ ఆరోపణల్లో వాస్తవం లేదని స్పష్టం చేశారు. సంస్థకు ఒక్క రూపాయి కూడా నష్టం జరగలేదని, అక్రమ లావాదేవీలు జరిగినట్లు ఎలాంటి గుర్తింపూ లేదని నివేదికలో పేర్కొన్నారు. ఈ నివేదికతో ఫైబర్ నెట్ పూర్వ ఎండీ మధుసూదన రెడ్డి (M. Madhusudhan Reddy), ప్రస్తుత ఎండీ గీతాంజలి శర్మ (Geethanjali Sharma) కూడా ఏకీభవిస్తూ కోర్టులో రాత పూర్వకంగా తెలియజేయడం గుర్తించదగ్గ విషయం.

2019లో వైఎస్సార్ కాంగ్రెస్ పార్టీ అధికారంలోకి వచ్చిన కొద్ది కాలానికే ఫైబర్ నెట్ ప్రాజెక్ట్‌లో అవినీతి జరిగిందని ఆరోపణలు వెలువడ్డాయి. టెర్రాసాఫ్ట్ సంస్థకు అన్యాయం చేసి రూ.321 కోట్ల లాభం చేకూర్చినట్లు పేర్కొన్నారు. ఆ తరువాత 2023లో చంద్రబాబు పేరును కూడా కేసులో చేర్చారు. భారత్ నెట్ పథకం కింద వచ్చిన నిధులను టెర్రాసాఫ్ట్‌కు మళ్లించారన్న ఆరోపణను సీఐడీ పరిశీలించినప్పటికీ, నిజమని నిర్థారించలేకపోయింది.

ఎన్నికల అనంతరం కొత్త కూటమి ప్రభుత్వం ఏర్పడిన తర్వాత ఈ కేసు మళ్లీ వేగం తీసుకుంది. దర్యాప్తు పూర్తి చేసిన సీఐడీ కేసును మూసివేస్తున్నట్లు ప్రకటించడంతో రాజకీయ వాదోపవాదాలు మళ్లీ వేడెక్కాయి. టీడీపీ నాయకులు ఈ కేసు వైసీపీ నేతలు రాజకీయ కక్షతో పెట్టారని, ఆధారాలు లేనందుకే చివరకు వెనక్కి తీసుకున్నారని ఆరోపిస్తున్నారు. అదే సమయంలో వైఎస్సార్ కాంగ్రెస్ పార్టీ సీనియర్ నేతలు మరోసారి తమ ప్రభుత్వం వస్తే ఇలాంటి కేసులను కొనసాగిస్తామని ప్రకటించడం కూడా చర్చనీయాంశంగా మారింది. మొత్తం మీద, ఏపీ ఫైబర్ నెట్ కేసు రాజకీయ ఆరోపణలు, ప్రతిఆరోపణల మధ్య తిరిగి కీలక దశకు చేరుకుంది. కోర్టులో సీఐడీ సమర్పించిన తాజా నివేదికతో ఈ వివాదం కొత్త మలుపు తిరిగిందని చెప్పాలి.