Annamayya District: అన్నమయ్య జిల్లా అడ్రస్ గల్లంతు? ఏపీలో 28 జిల్లాలకే పరిమితం!

ఆంధ్రప్రదేశ్ భౌగోళిక ముఖచిత్రం మరోసారి మారనుంది. కూటమి ప్రభుత్వం అధికారంలోకి వచ్చిన తర్వాత జిల్లాల పునర్విభజనపై ప్రత్యేక దృష్టి సారించిన విషయం తెలిసిందే. గత ప్రభుత్వం అశాస్త్రీయంగా జిల్లాలను విభజించిందన్న విమర్శల నేపథ్యంలో, ప్రజాభీష్టం, పాలనా సౌలభ్యం ప్రాతిపదికన సరికొత్త మార్పులకు శ్రీకారం చుట్టింది. అయితే, ఈ ప్రక్రియలో అత్యంత కీలకమైన, అనూహ్యమైన పరిణామం చోటుచేసుకుంది. అదే అన్నమయ్య జిల్లా రద్దు ప్రతిపాదన. తాజాగా ముఖ్యమంత్రి చంద్రబాబు నిర్వహించిన ఉన్నత స్థాయి సమీక్షలో ఈ మేరకు కీలక చర్చ జరిగింది.

గత ప్రభుత్వం రాయచోటి కేంద్రంగా ఏర్పాటు చేసిన అన్నమయ్య జిల్లా భవిష్యత్తు ఇప్పుడు ప్రశ్నార్థకంలో పడింది. తాజా ప్రతిపాదనల ప్రకారం, అన్నమయ్య జిల్లాను మూడు ముక్కలు చేసి పొరుగు జిల్లాల్లో విలీనం చేసే దిశగా ప్రభుత్వం అడుగులు వేస్తోంది. రాజంపేటను వైఎస్ఆర్ కడప జిల్లాలో కలపాలని ప్రతిపాదన సిద్ధమైంది. అలాగే అన్నమయ్య జిల్లా కేంద్రంగా ఉన్న రాయచోటిని కొత్తగా ఏర్పాటు కాబోయే మదనపల్లె జిల్లాలో విలీనం చేయనున్నారు. రైల్వే కోడూరును తిరుపతి జిల్లా పరిధిలోకి మార్చనున్నారు.

ఈ మూడు ప్రధాన నియోజకవర్గాలను వేరే జిల్లాలకు తరలిస్తే, భౌగోళికంగా అన్నమయ్య జిల్లా ఉనికిని కోల్పోతుంది. రాయచోటి కేంద్రంగా పాలన సాగించడంపై గతంలోనే అనేక అభ్యంతరాలు వ్యక్తమయ్యాయి. మదనపల్లె వంటి పెద్ద పట్టణాన్ని కాదని, రాయచోటిని జిల్లా కేంద్రం చేయడంపై ప్రజల్లో అసంతృప్తి ఉంది. అదే సమయంలో రాజంపేట పార్లమెంటు కేంద్రంగా ఉన్నా కూడా దాన్ని కాదని రాయచోటిని జిల్లా కేంద్రం చేయడంపై ఆ ప్రాంతవాసులు భగ్గుమంటున్నారు. పునర్విభజన నేపథ్యంలో వాళ్లంతా ఆందోళన చేస్తున్నారు. ఈ నేపథ్యంలోనే ప్రభుత్వం తాజా నిర్ణయం దిశగా వెళ్తున్నట్లు తెలుస్తోంది.

రాష్ట్రంలో కొత్తగా మదనపల్లె, పోలవరం, మార్కాపురం జిల్లాలను ఏర్పాటు చేస్తామని కూటమి ప్రభుత్వం ఇప్పటికే ప్రకటించింది. ప్రస్తుతం ఉన్న 26 జిల్లాలకు ఈ మూడు కలిపితే మొత్తం సంఖ్య 29కి చేరాలి. కానీ, తాజా సమీక్షలో అన్నమయ్య జిల్లా రద్దు ప్రతిపాదన తెరపైకి రావడంతో, మొత్తం జిల్లాల సంఖ్య 28కే పరిమితం కానుంది. అంటే ఒక జిల్లా రద్దయి (అన్నమయ్య), మూడు కొత్త జిల్లాలు (మదనపల్లె, పోలవరం, మార్కాపురం) ఏర్పడితే నికరంగా పెరిగేది రెండు జిల్లాలు మాత్రమే. ఈ గణాంకాలతోనే ప్రభుత్వం ముందుకు వెళ్తున్నట్లు సమాచారం.

జిల్లాల పునర్విభజన కేవలం కొత్త జిల్లాల ఏర్పాటుకే పరిమితం కాలేదు. గత విభజనలో తలెత్తిన సరిహద్దు వివాదాలు, రెవెన్యూ డివిజన్ల సమస్యలను కూడా ఈసారి పరిష్కరించే ప్రయత్నం జరుగుతోంది. నెల్లూరు జిల్లాకు ఆనుకుని ఉన్న గూడూరును, గతంలో తిరుపతి జిల్లాలో కలిపారు. అయితే గూడూరు వాసులు నెల్లూరుతోనే తమకు ఎక్కువ అనుబంధం ఉందని, అక్కడికే మార్చాలని పెద్ద ఎత్తున డిమాండ్ చేస్తున్నారు. స్థానిక నేతల విజ్ఞప్తి మేరకు గూడూరును తిరిగి నెల్లూరు జిల్లాలో కలిపేందుకు ప్రభుత్వం సుముఖత వ్యక్తం చేసింది. కొత్తగా ఏర్పడబోయే మార్కాపురం జిల్లా సరిహద్దులపైనా స్పష్టత వస్తోంది. దొనకొండ, కురిచేడు మండలాలను మార్కాపురం జిల్లాలో కలపాలని, అదే సమయంలో పొదిలిని ప్రకాశం జిల్లాలోనే ఉంచాలని చర్చ జరిగింది.

ఈ తాజా పరిణామాలను విశ్లేషిస్తే రెండు ప్రధాన అంశాలు కనిపిస్తున్నాయి. రాయచోటి కంటే మదనపల్లె అన్ని విధాలా అభివృద్ధి చెందిన ప్రాంతం. చిత్తూరు జిల్లాలో మదనపల్లెకు ప్రత్యేక స్థానం ఉంది. దానిని జిల్లా కేంద్రం చేయడం ద్వారా ఆ ప్రాంత అభివృద్ధికి బాటలు వేయొచ్చని ప్రభుత్వం భావిస్తోంది. అలాగే, రాజంపేట వాసులకు కడప జిల్లా కేంద్రం దగ్గరగా ఉండటం, రైల్వే కోడూరుకు తిరుపతితో ఉన్న సామీప్యతను పరిగణనలోకి తీసుకున్నారు. గత ప్రభుత్వం హడావుడిగా చేసిన విభజన వల్ల ప్రజల్లో గూడుకట్టుకున్న అసంతృప్తిని చల్లార్చడం, తద్వారా ఆయా ప్రాంతాల్లో రాజకీయంగా పట్టు సాధించడం కూటమి ప్రభుత్వ వ్యూహంగా కనిపిస్తోంది.

ముఖ్యమంత్రి చంద్రబాబు నిర్వహించిన ఈ సమీక్షలో మంత్రులు అనగాని సత్యప్రసాద్, వంగలపూడి అనిత, నారాయణ పాల్గొన్నారు. ఆదివారం మరోసారి సమావేశమై ఈ మార్పులపై సుదీర్ఘంగా చర్చించనున్నారు. సోమవారం కేబినెట్ ఉపసంఘం తన తుది ప్రతిపాదనలను సిద్ధం చేయనుంది. అనంతరం మంత్రివర్గ ఆమోదం పొంది, డిసెంబర్ 31 నాటికి తుది నోటిఫికేషన్ విడుదల చేసే అవకాశం ఉంది.

మొత్తానికి, ఏపీ జిల్లాల పునర్విభజన ప్రక్రియ క్లైమాక్స్ కు చేరుకుంది. అన్నమయ్య జిల్లా రద్దు నిర్ణయం ఆ ప్రాంత వాసుల్లో ఎలాంటి స్పందన రేకెత్తిస్తుందో, విపక్షాలు దీనిపై ఎలా స్పందిస్తాయో వేచి చూడాలి. కానీ, ఈ మార్పులు జరిగితే మాత్రం ఆంధ్రప్రదేశ్ మ్యాప్ లో మరోసారి భారీ మార్పులు చోటుచేసుకోవడం ఖాయం.