Amaravathi: గ్రీన్ సిటీగా అమరావతి.. ఆధునిక నిర్మాణాలు, భారీ పెట్టుబడులతో రాజధానికి కొత్త దశ
- Published By: Bhuvana
- December 12, 2025 / 10:00 AM IST
ఆంధ్రప్రదేశ్ రాజధాని అమరావతి (Amaravati) ప్రస్తుతం వేగంగా రూపుదిద్దుకుంటోంది. గత కొన్నాళ్లుగా నిలిచిపోయిన పనులు పునరుద్ధరించబడడంతో, ప్రభుత్వం చేపట్టిన పలు నిర్మాణాలు మరోసారి జోరందుకున్నాయి. ముఖ్యంగా ప్రభుత్వ శాఖల కోసం నిర్మిస్తున్న కార్యాలయాలతో పాటు, ప్రైవేట్ సంస్థలు నిర్మించే ఆఫీస్ బిల్డింగ్లు కూడా సమాంతరంగా ముందుకు సాగుతున్నాయి. ఆర్థిక రంగానికి సంబంధించి ముఖ్యమైన బ్యాంకుల రీజినల్ కార్యాలయాలు కూడా అమరావతిలో స్థిరపడే దిశగా పనులను వేగవంతం చేస్తున్నాయి.
ప్రత్యేకంగా కేంద్రం మంజూరు చేసిన రైల్వే (Railways), రవాణా ,రోడ్డు రవాణా ప్రాజెక్టులు ప్రారంభానికి చేరువయ్యాయి. ఈ ప్రాజెక్టులు ప్రారంభమైతే అమరావతి ప్రాంతానికి కనెక్టివిటీ మరింత మెరుగవుతుంది. దీంతో రాజధాని ప్రాంతం ఆర్థికపరంగా పెద్ద కేంద్రంగా ఎదుగుతుందని అధికార యంత్రాంగం అంచనా వేస్తోంది.
అమరావతి నిర్మాణంలో ముఖ్యమైన అంశం పచ్చదనానికి ఇచ్చిన ప్రాధాన్యం. మొత్తం ప్రాంతంలో 30 శాతం భూభాగాన్ని గ్రీన్ జోన్గా అభివృద్ధి చేయాలని ప్రభుత్వం నిర్ణయించింది. ఇందులో పార్కులు, విస్తారమైన చెట్లు, నడక మార్గాలు, వాటర్ బాడీలు ఉండేలా డిజైన్ చేస్తున్నారు. రాజధాని ప్రాంతం చూసేందుకు వచ్చే వారికి ప్రకృతి అందాలను కూడా అందించాలనే ఉద్దేశంతో పచ్చదనాన్ని ప్రణాళికలో కీలక భాగంగా చేశారు. ఒక నగరాన్ని ముందుగానే ప్లాన్ చేసి నిర్మించడంలో ఇది అరుదైన అవకాశం అని నగర ప్రణాళిక నిపుణులు చెప్తున్నారు.
పర్యాటక రంగం అభివృద్ధి కూడా అమరావతిలో ప్రధాన లక్ష్యంగా మారింది. హైదరాబాద్ (Hyderabad)లో ఉన్న రామోజీ ఫిల్మ్ సిటీ (Ramoji Film City), చార్మినార్ (Charminar) వంటి ప్రదేశాలను చూసేందుకు దేశం నలుమూలల నుంచి ప్రజలు వస్తున్నట్లు, అమరావతిని కూడా పర్యాటకులకు ఆకర్షణీయ స్థలంగా తీర్చిదిద్దేందుకు చర్యలు జరుగుతున్నాయి. పచ్చదనం, నదీతీర సౌందర్యం, ఆధునిక నిర్మాణాలు ఇలాంటి వాటితో అమరావతిని ప్రత్యేక నగరంగా మార్చే అవకాశం కనిపిస్తోంది.
ఇదిలా ఉండగా ఆతిథ్యరంగంలో కూడా అమరావతి భారీ పెట్టుబడులను ఆకర్షిస్తోంది. దేశవ్యాప్తంగా పేరుగాంచిన స్టార్ హోటల్ సంస్థలు ఇక్కడ హోటళ్లను నిర్మించడానికి ముందుకు వచ్చాయి. దస్పల్లా (Daspalla), నోవాటెల్ (Novotel), తాజ్ వివంతా (Taj Vivanta) వంటి బ్రాండ్లు వందల కోట్ల రూపాయలతో తమ హోటల్ ప్రాజెక్టుల శంకుస్థాపన పూర్తిచేశాయి. వీటి నిర్మాణం 2028 నాటికి పూర్తి చేయాలని లక్ష్యంగా పెట్టుకున్నారు. ఈ హోటళ్లు ప్రారంభమైతే వేలాది ఉద్యోగాలు సృష్టించబడతాయని అంచనా.
పర్యాటకం, ఆతిథ్యరంగం, గ్రీన్ డెవలప్మెంట్, ఆధునిక కనెక్టివిటీ—ఈ నాలుగు రంగాలు ఒకేసారి అభివృద్ధి చెందుతున్న నగరం దేశంలో అరుదు. అమరావతి ప్రస్తుతం అదే దిశగా ముందుకు సాగుతోంది. నిర్మాణాలు పూర్తయ్యే కొద్దీ, ఈ రాజధాని దేశంలోనే అత్యంత ప్రణాళికబద్ధంగా ఎదిగిన నగరాల్లో ఒకటిగా నిలిచే అవకాశాలు కనిపిస్తున్నాయి.
