Turkey: టర్కీకి వ్యతిరేకంగా ఉద్యమం.. ఆ దేశానికి దిమ్మ తిరిగినట్లే..!!

భారత్-పాకిస్తాన్ (India Pakistan) మధ్య ఉద్రిక్తతలు తీవ్రమైన నేపథ్యంలో టర్కీ (Turkey).. పాకిస్తాన్‌కు బహిరంగ మద్దతు ప్రకటించడం భారత్‌లో తీవ్ర ఆగ్రహానికి కారణమవుతోంది. ఈ సందర్భంలో ‘బాయ్‌కాట్ టర్కీ’ (Boycott Turkey) నినాదం దేశవ్యాప్తంగా సోషల్ మీడియాలో ట్రెండింగ్‌గా మారింది. టర్కీ ఆయుధ సాయం, డ్రోన్ల సరఫరాతో పాటు భారత్‌పై విమర్శలు చేస్తూ పాకిస్తాన్‌కు అండగా నిలవడం ఈ ఉద్యమానికి కారణమైంది. ఈ నేపథ్యంలో భారతీయ పర్యాటకులు, వ్యాపారులు టర్కీ ఉత్పత్తులు, టూరిజంను (tourism) బహిష్కరిస్తూ నిరసన తెలియజేస్తున్నారు.

గత నెల 22న జమ్ము కశ్మీర్‌లోని పహల్గాం (Pahalgam Terror Attack) సమీపంలో ఉగ్రవాదులు పర్యాటకులపై దాడి చేశారు. ఈ ఘాతుకంలో 26 మంది ప్రాణాలు కోల్పోయారు. ఈ దాడికి పాకిస్తాన్ ప్రేరేపిత ఉగ్రవాదులే కారణమని భారత సైన్యం నిర్ధారించింది. దీంతో భారత్ ‘ఆపరేషన్ సిందూర్’ (Operation Sindoor) పేరుతో పాకిస్తాన్, పాక్ ఆక్రమిత కశ్మీర్‌లోని 9 ఉగ్రవాద స్థావరాలపై దాడులు చేపట్టింది. ఈ ఆపరేషన్ విజయవంతం కావడంతో పాకిస్తాన్ సైన్యం సరిహద్దుల్లో మిస్సైల్ దాడులకు పాల్పడింది, వీటిని భారత సైన్యం సమర్థవంతంగా తిప్పికొట్టింది.

ఈ ఉద్రిక్త సమయంలో పాకిస్తాన్‌కు టర్కీ బహిరంగ మద్దతు తెలిపింది. టర్కీ విదేశాంగ మంత్రి మే 7న భారత్ సైనిక చర్యలు విస్తృత యుద్ధానికి దారితీస్తాయని హెచ్చరించారు. అంతేకాదు, భారత్‌పై పాకిస్తాన్ ఉపయోగించిన డ్రోన్లు టర్కీ నుంచి సరఫరా అయినవని భారత అధికారులు ధృవీకరించారు. టర్కీ యుద్ధ విమానాలు, నౌకలు కరాచీలో దిగినట్లు కూడా వార్తలు వచ్చాయి. ఈ చర్యలు భారత్‌లో ఆగ్రహాన్ని రేకెత్తించాయి, ముఖ్యంగా 2023 టర్కీ భూకంప సమయంలో భారత్ అందించిన సాయాన్ని మరచి టర్కీ ఈ వైఖరి అవలంబించడం విమర్శలకు దారితీసింది.

‘బాయ్‌కాట్ టర్కీ’ హ్యాష్‌ట్యాగ్ సోషల్ మీడియాలో వైరల్ అవుతోంది. భారతీయ పర్యాటకులు టర్కీ పర్యటనలను రద్దు చేసుకుంటున్నారు. 2024లో 3.3 లక్షల మంది భారతీయులు టర్కీని సందర్శించిన నేపథ్యంలో, ఈ బహిష్కరణ టర్కీ టూరిజం రంగంపై తీవ్ర ప్రభావం చూపనుంది. 80 శాతానికి పైగా బుకింగ్‌లు రద్దయినట్లు సమాచారం. పలు ఆన్‌లైన్ ట్రావెల్ ప్లాట్‌ఫామ్‌లు టర్కీకి కొత్త బుకింగ్‌లను నిలిపివేశాయి. వ్యాపార రంగంలోనూ ఈ ఉద్యమం బలంగా కనిపిస్తోంది. పుణెలోని ఆపిల్ వ్యాపారులు టర్కీ ఆపిల్‌లను (Turkey Apples) బహిష్కరించారు, దీంతో ఇరాన్, అమెరికా, న్యూజిలాండ్ ఆపిల్‌ల ధరలు పెరిగాయి. ఉదయపూర్‌లో మార్బుల్ వ్యాపారులు టర్కీతో వ్యాపారాన్ని నిలిపివేశారు. టర్కీ ఆపిల్ దిగుమతులు సీజన్‌కు వెయ్యికోట్ల వరకూ ఉండొచ్చని అంచనా. ఈ బహిష్కరణ ఆ దేశ ఆర్థిక వ్యవస్థకు గట్టి దెబ్బ తీస్తోంది. గోవాలోని హోటళ్లు టర్కీ పర్యాటకులకు సేవలు నిరాకరిస్తున్నాయి, టర్కిష్ ఎయిర్‌లైన్స్ బహిష్కరణకు కూడా పిలుపునిచ్చారు.

టర్కీ, పాకిస్తాన్ మధ్య రక్షణ, వాణిజ్య రంగాల్లో బలమైన సంబంధాలు ఉన్నాయి. రెండు దేశాలు 5 బిలియన్ డాలర్ల వాణిజ్య లక్ష్యాన్ని నిర్దేశించుకున్నాయి. కశ్మీర్ సమస్యపై టర్కీ ఎప్పటినుంచో పాకిస్తాన్‌కు మద్దతు ఇస్తోంది. టర్కీ అధ్యక్షుడు ఎర్డోగాన్ అంతర్జాతీయ వేదికలపై భారత్‌పై విమర్శలు చేసిన సందర్భాలు ఉన్నాయి. ఈ నేపథ్యంలో టర్కీ సైనిక సాయం భారత్‌లో విమర్శలకు దారితీసింది. ఈ బహిష్కరణ ప్రభావం టర్కీ గుర్తించింది. టర్కీ పర్యాటక శాఖ భారతీయ పర్యాటకులకు భద్రత, సౌకర్యాలకు హామీ ఇస్తూ బుకింగ్‌లు రద్దు చేయవద్దని అభ్యర్థించింది. అయితే, భారతీయుల ఆగ్రహం తగ్గే సూచనలు కనిపించడం లేదు. అజర్‌బైజాన్ కూడా పాకిస్తాన్‌కు మద్దతు ఇవ్వడంతో ఆ దేశంపై కూడా బహిష్కరణ డిమాండ్ ఉన్నది.