Donald Trump: రష్యా చమురును భారత్ కొనదా? ట్రంప్‌కు హామీ ఇవ్వలేదన్న భారత్!

రష్యా నుంచి చమురు కొనుగోళ్లను నిలిపివేస్తానని ప్రధాని నరేంద్ర మోడీ (PM Modi) తనకు హామీ ఇచ్చారంటూ అమెరికా అధ్యక్షుడు డొనాల్డ్ ట్రంప్ (Donald Trump) చేసిన ప్రకటనను భారత్ ఖండించింది. ట్రంప్-మోదీల మధ్య అటువంటి సంభాషణ ఏదీ జరగలేదని విదేశాంగ శాఖ అధికార ప్రతినిధి రణధీర్ జైశ్వాల్ స్పష్టం చేశారు. బుధవారం నాడు వైట్‌హౌస్‌లో మీడియా సమావేశంలో మాట్లాడిన ట్రంప్.. రష్యా నుంచి భారత్ చమురు కొనుగోలు చేయడంపై తీవ్ర అసంతృప్తి వ్యక్తం చేశారు. ఈ క్రమంలోనే తాను మోడీతో ఫోన్‌లో మాట్లాడానని, దీంతో రష్యా చమురు కొనుగోళ్లు నిలిపివేస్తానని మోడీ హామీ ఇచ్చారని ట్రంప్ (Donald Trump) వెల్లడించారు. ఉక్రెయిన్ యుద్ధంలో రష్యాను ఒంటరి చేసే ప్రయత్నాల్లో ఇదో కీలక అడుగు అని ఆయన పేర్కొన్నారు.

అయితే ఈ అంశంపై భారత్ విదేశాంగ శాఖ స్పందిస్తూ ఒక ప్రకటన విడుదల చేసింది. చమురు విషయంలో దేశ ప్రజల ప్రయోజనాలను కాపాడటమే తమకు ముఖ్యమని, వీటి ఆధారంగానే తమ దిగుమతి విధానాలు ఉంటాయని స్పష్టం చేసింది. అమెరికాతో సంబంధాలపై మాట్లాడుతూ.. చమురు దిగుమతి పెంచడానికి ఎన్నో ఏళ్లుగా ప్రయత్నాలు జరుగుతున్నాయని, గత దశాబ్ద కాలంలో చాలా పురోగతి కనిపించిందని భారత్ పేర్కొంది. దీంతో ట్రంప్ (Donald Trump) చేసిన వ్యాఖ్యలు నిజమా? అబద్దమా? అనే గందరగోళం నెలకొంది.