Jai Shankar: తెర వెనుక కూడా ఆపరేషన్ సింధూర్.. జై శంకర్ కీలక వ్యాఖ్యలు

భారత విదేశాంగ మంత్రి ఎస్. జైశంకర్ (Jai Shankar) ఉగ్రవాదంపై (Terrorism) భారత దృఢ వైఖరిని మరోసారి స్పష్టం చేశారు. ఆపరేషన్ సింధూర్ (Operation Sindoor) ద్వారా ఉగ్రవాదులపై దాడులు కొనసాగుతాయని, వాళ్లు పాకిస్థాన్‌లో (Pakistan) ఉన్నా లేదా మరే ఇతర ప్రాంతాల్లో ఉన్నా వదిలిపెట్టే ప్రసక్తే లేదని ఆయన తేల్చి చెప్పారు. ఢిల్లీలో జరిగిన ఒక మీడియా సమావేశంలో జై శంకర్ కీలక వ్యాఖ్యలు చేశారు. “ఉగ్రవాదులు ఎక్కడ ఉన్నా, వారిని వెంబడించి తుదముట్టిస్తాం. ఆపరేషన్ సింధూర్ కేవలం కాల్పుల రూపంలోనే జరగాలని లేదు. ఇది ఒక సమగ్ర వ్యూహం. దీనిలో దౌత్యపరమైన ఒత్తిళ్లు, గూఢచర్యం, సైనిక చర్యలు అన్నీ కలిసి ఉంటాయి.” అని పేర్కొన్నారు. పాకిస్థాన్‌లోని తొమ్మిది ఉగ్రవాద శిబిరాలను ధ్వంసం చేసిన ఆపరేషన్ సింధూర్ విజయవంతమైన నేపథ్యంలో, ఈ చర్యలు ఇంకా కొనసాగుతాయని ఆయన స్పష్టం చేశారు.

ఇటీవల జాతినుద్దేశించి ప్రసంగించిన ప్రధాని నరేంద్ర మోదీ (PM Modi).. ఆపరేషన్ సింధూర్ తో భారత సైన్యం సామర్థ్యం ఏంటో ప్రపంచానికి తెలిసిందన్నారు. “ఉగ్రవాదంపై పోరాటంలో భారత్ రాజీపడదు. ఆపరేషన్ సింధూర్ ఇంకా ముగియలేదు,” అని మోదీ ప్రకటించారు. దీనిని జైశంకర్ మరింత బలపరిచారు. “పాకిస్థాన్ ఉగ్రవాదులకు ఆశ్రయం కల్పిస్తే, దాని పరిణామాలను ఎదుర్కోవాల్సి ఉంటుంది. సింధూ జలాల విషయంలో కూడా, ఉగ్రవాదం సమూలంగా అంతమైతేనే ఏదైనా చర్చ జరుగుతుంది” అని ఆయన గట్టిగా చెప్పారు. ఈ వ్యాఖ్యలు భారత్ దౌత్యపరమైన వైఖరిని మరింత బలోపేతం చేశాయి.

ప్రస్తుతం కాల్పుల విరమణ (cease fire) కొనసాగుతోందని, అయితే ఆపరేషన్ సింధూర్ ఆగదని జైశంకర్ స్పష్టంచేశారు. ఉగ్రవాదులను అంతమొందించడమే మా లక్ష్యం అని తేల్చిచెప్పారు. ఈ ఆపరేషన్‌లో భారత సైన్యం, గూఢచర్య విభాగాలు, శాస్త్రవేత్తలు కలిసి పనిచేశారని, దీనిని ప్రధాని మోదీ ప్రశంసించారని ఆయన తెలిపారు. అయితే ఆపరేషన్ సింధూర్‌కు ముందు పాకిస్థాన్‌కు సమాచారం ఇచ్చినట్లు Xలో వచ్చిన ఆరోపణలను జైశంకర్ ఖండించారు.

మరోవైపు.. ఆపరేషన్ సిందూర్ ద్వారా భారత్ పాకిస్థాన్‌పై దౌత్యపరమైన ఒత్తిడిని కూడా పెంచింది. విదేశాంగ మంత్రి, ఇతర ఉన్నతాధికారులు పలు దేశాల ప్రతినిధులతో సమావేశాలు నిర్వహించి, ఆపరేషన్ సింధూర్ వివరాలను పంచుకున్నారు. ఈ చర్యలు భారత్ ఉగ్రవాద వ్యతిరేక వైఖరిని అంతర్జాతీయ సమాజానికి స్పష్టం చేశాయి. రక్షణ మంత్రి రాజ్‌నాథ్ సింగ్ ఈ ఆపరేషన్‌ను చారిత్రాత్మకమైనదిగా అభివర్ణించారు. ఇది భారత చరిత్రలో సువర్ణాక్షరాలతో లిఖించబడుతుందని పేర్కొన్నారు. అంతర్జాతీయంగా ఈ ఉద్రిక్తతలపై అమెరికా, చైనా, ఇతర దేశాలు దృష్టి సారించాయి. అమెరికా విదేశాంగ కార్యదర్శి మార్కో రూబియో జైశంకర్‌తో పాటు పాకిస్థాన్ ఆర్మీ చీఫ్ జనరల్ ఆసిమ్ మునీర్‌తో మాట్లాడి, ఉద్రిక్తతలను తగ్గించాలని సూచించారు. అమెరికా మధ్యవర్తిత్వం వహించడానికి నిరాకరించినప్పటికీ, ఉగ్రవాద గ్రూపులకు మద్దతును అంతం చేయాలని పాకిస్థాన్‌ను కోరింది. చైనా కూడా పరిస్థితిని గమనిస్తున్నట్లు ప్రకటించింది.

మొత్తంగా ఆపరేషన్ సింధూర్ భారత ఉగ్రవాద వ్యతిరేక యుద్ధంలో ఒక మైలురాయిగా నిలిచింది. జైశంకర్ వ్యాఖ్యలు మనదేశనిర్ణయాత్మక వైఖరిని, అంతర్జాతీయ సమాజంలో దాని స్థానాన్ని మరింత బలపరిచాయి. ఉగ్రవాదంపై ఈ పోరాటం కొనసాగుతుందని, అవసరమైతే మరింత తీవ్రమవుతుందని ఆయన స్పష్టం చేశారు.