Whitehouse: గ్రీన్ కార్డు దరఖాస్తు చేస్తున్నారా..? అయితే ఈ తప్పు అస్సలు చేయొద్దు..!

గ్రీన్ కార్డు దారులకు అప్ డేట్.. దరఖాస్తు చేసుకునే సమయంలో అభ్యర్థులు చిన్న చిన్న పొరపాట్లతో అవకాశాల్ని చేజార్చుకుంటున్నారు. ఇలాంటి వారికి అగ్రరాజ్యం వలస సేవల విభాగం (U.S. Citizenship and Immigration Services) ఓ సూచన లాంటి హెచ్చరిక చేసింది.

అమెరికాలో శాశ్వత నివాసానికి ఉద్దేశించిన గ్రీన్‌కార్డు కోసం ఐ-485 దరఖాస్తును పూర్తిచేయాల్సి ఉంటుంది. అయితే అందులోని పార్ట్‌-9లో అడిగిన ప్రశ్నలకు చాలామంది సమాధానాలు ఇవ్వడం లేదని వలసల విభాగం (USCIS) వెల్లడించింది. దానివల్ల దరఖాస్తు తిరస్కరణకు గురికావొచ్చని లేదా ఆ ప్రక్రియ ఆలస్యం కావొచ్చని హెచ్చరించింది. ఇమిగ్రేషన్ చట్టాల ప్రకారం అమెరికా (US Immigration) ఏటా.. 2,26,000 ఫ్యామిలీ ప్రిఫరెన్స్‌, 1,40,000 ఉపాధి ఆధారిత గ్రీన్‌ కార్డు (Green Card)లను జారీ చేసేందుకు వీలుంటుంది.

గ్రీన్‌కార్డు (Green Card) పొందే ప్రక్రియలో ఐ-485 దరఖాస్తుకు ఆమోదం లభించడం అత్యంత కీలకమైనదిగా భావిస్తారు. ఒక కుటుంబంలోని ప్రతి ఒక్కరూ ప్రత్యేక దరఖాస్తును సమర్పించాల్సి ఉంటుంది. ఈ ప్రక్రియ సమయంలో వారంతా యూఎస్‌లోనే ఉండాల్సి ఉంటుంది. అలాగే చట్టపరంగా అమెరికాకు వచ్చామని నిరూపించే పత్రాలు, జనన ధ్రువీకరణపత్రం, వైద్య పరీక్షల రికార్డులు సమర్పించాల్సి ఉంటుంది.

అక్టోబర్ 20 నుంచి గ్రీన్‌కార్డు టెస్టింగ్‌లో మార్పులు..

ట్రంప్ అధికారంలోకి వచ్చిన దగ్గరి నుంచి వలసలకు సంబంధించిన విధానాల్లో మార్పులు చేస్తున్నారు. ఈక్రమంలో గ్రీన్‌కార్డులు పొందాలనుకునేవారిని పరీక్షించే ప్రక్రియలో మార్పులు ఉంటాయని, అక్టోబర్ 20 నుంచి అవి అమల్లోకి వస్తాయని అమెరికా ప్రభుత్వం తాజాగా నోటిఫై చేసింది. కొన్ని అదనపు అంశాలను పరిగణనలోకి తీసుకోనుంది. ‘‘అమెరికా విలువలను పూర్తిగా స్వీకరించేవారికి మాత్రమే గ్రీన్‌కార్డును కేటాయించాలన్నదే మా విధానం. దానిని నిర్దరించేందుకే ఈ మార్పులు’’ అని యూఎస్‌సీఐఎస్‌ ప్రతినిధి వెల్లడించారు. యూఎస్ చరిత్ర, ప్రభుత్వం గురించి దరఖాస్తుదారుడి అవగాహనను పరీక్షిస్తారు. సరైన నైతిక ప్రవర్తన కలిగిఉన్నారా..? అని టెస్ట్ చేయనున్నారు. మొత్తం 20 ప్రశ్నల్లో 12 వాటికి సరైన సమాధానం ఇవ్వాల్సి ఉంటుందని సమాచారం.