Delhi: బ్రహ్మోస్ కా బాప్.. ధ్వని వచ్చేస్తోంది. పాక్, చైనాలకు డేంజర్ బెల్స్…!

ఆపరేషన్ సిందూర్ తర్వాత భారత రక్షణ పరాక్రమాన్ని ప్రపంచం ప్రత్యక్షంగా చూసింది. నిన్నటివరకూ ఓ లెక్క.. ఇక నుంచి ఓలెక్క అన్నట్లుగా మోడీ సర్కార్ ప్రవర్తించిన తీరు.. భారత రక్షణదళ సన్నద్ధత, పరాక్రమం ఎలా ఉంటుందో అందరికీ తెలిసొచ్చింది.మరీ ముఖ్యంగా పాకిస్తాన్ కు. అయితే అక్కడితో ఆగిపోవడం కాదు.. మరింతవేగంగా అడుగులేస్తోంది భారత్. సిందూర్ లో దుమ్మురేపిన, శత్రు భయంకరం బ్రహ్మోస్ కు బాప్ ను ఇప్పుడు తయారు చేస్తోంది. ఈ హెచ్ జీవీ.. రక్షణ రంగం చేతికి వస్తే .. ఇక భారత్ వైపు చూడాలంటే శత్రువులు భయపడాల్సిందే…!

రక్షణ రంగంలో స్వయంసమృద్ధి సాధిస్తున్న భారత్‌.. అధునాతన క్షిపణి వ్యవస్థలు, ఫైటర్‌ జెట్లు, డ్రోన్ల ప్రాజెక్టులపై దృష్టి సారిస్తోంది. ఈ క్రమంలో హైపర్‌సోనిక్‌ (Hypersonic Missile) క్షిపణి ప్రయోగాలను ముమ్మరం చేస్తోంది. ఇందులో భాగంగా హైపర్‌సోనిక్‌ గ్లైడ్‌ వెహికల్‌ (HGV) ‘ధ్వని’ పరీక్షలను ఈ ఏడాది చివరి నాటికి పూర్తి చేయాలని డీఆర్‌డీఓ ప్రయత్నిస్తున్నట్లు తెలుస్తోంది. ఆపరేషన్‌ సిందూర్‌లో దడ పుట్టించిన బ్రహ్మోస్‌ (BrahMos) కంటే ఈ క్షిపణులు భీకరంగా పనిచేస్తాయని సమాచారం..

అత్యంత వేగంగా ప్రయాణిస్తూ సుదూర లక్ష్యాలను నిమిషాల్లో ఛేదించగల సామర్థ్యం హెచ్‌జీవీల సొంతం. శబ్ద వేగానికి ఐదారు రెట్ల కంటే అధిక వేగంతో ఈ క్షిపణులు ప్రయాణించగలవు. డీఆర్‌డీఓ సిద్ధం చేస్తోన్న హెచ్‌జీవీ (Dhvani) సుమారు గంటకు 7వేలకుపైగా కిలోమీటర్ల వేగంతో దూసుకెళ్లేలా రూపొందిస్తున్నట్లు తెలుస్తోంది. 1500 నుంచి 2వేల కిలోమీటర్ల దూరంలో ఉన్న లక్ష్యాలను ఛేదించగలదని అంచనా. వేగంతో పాటు దిశను మార్చుకునే సామర్థ్యం ఉండడంతో శత్రుదేశాల గగనతల రక్షణ వ్యవస్థలకు స్పందించే సమయం కూడా ఇవ్వదని రక్షణ రంగ నిపుణులు చెబుతున్నారు.

హైపర్‌సోనిక్‌ క్రూజ్‌ క్షిపణులకు భిన్నంగా ఈ నూతన గ్లైడ్‌ వెహికల్‌ ఉంటుంది. రాకెట్‌ సాయంతో అత్యంత ఎత్తుకు వెళ్లి.. అక్కడ నుంచి విడిపోయి హైపర్‌సోనిక్‌ వేగంతో లక్ష్యంవైపు దూసుకెళ్తుంది. శత్రువుల గగనతల నిరోధక వ్యవస్థలకు చిక్కకుండా లక్ష్యాలను ఛేదించే సామర్థ్యమున్న ఈ హెచ్‌జీవీ పరీక్షలను డీఆర్‌డీఓ ముమ్మరం చేసింది. ఇప్పటికే ఎయిర్‌ఫ్రేమ్‌ ఏరోడైనమిక్స్‌, థర్మల్‌ మేనేజిమెంట్‌, స్క్రామ్‌జెట్‌ ఇంజిన్‌ పనితీరు, గైడెన్స్‌ వ్యవస్థకు సంబంధించి క్షేత్రస్థాయి, వైమానిక పరీక్షలు చేసింది. ఈ ఏడాది చివరి నాటికి ‘ధ్వని’ పూర్తి స్థాయి పరీక్షలు జరిపేందుకు సిద్ధమవుతున్నట్లు సమాచారం.