Delhi: ఎస్-500పై భారత్ ఫోకస్…పుతిన్ పర్యటనలో చర్చలు..!
- Published By: techteam
- December 3, 2025 / 04:10 PM IST
రష్యా ఎయిర్ డిఫెన్స్ సిస్టమ్ ఎస్ -400 గొప్ప తనం ప్రపంచానికి తెలిసింది ఆపరేషన్ సిందూర్ తర్వాతే. ఎందుకంటే చైనా మేడ్ క్షిపణులు , యుద్ధవిమానాలతో పాక్ విరుచుకు పడగా.. వాటన్నింటినీ ఎస్-400 తుత్తునియలు చేసింది. భారత్ లోని ఒక్క వ్యవస్థ దెబ్బతినకుండా అద్భుత విజయాన్ని చవిచూసింది కూడా. దీంతో ఎస్ -400 ఎంత ప్రభావవంతంగా పనిచేస్తుందన్నది భారత్ తో పాటు ప్రపంచానికి తెలిసి వచ్చింది. ఇదే ఇలా ఉంటే.. దీని తర్వాతి వెర్షన్ ఎస్-500 ఎలా పనిచేస్తుందన్నది అత్యంత ఆసక్తికరంగా మారింది.
గురు, శుక్రవారాల్లో రష్యా అధ్యక్షుడు పుతిన్.. భారత పర్యటనకు వస్తున్నారు. ఈయన పర్యటనలో కీలక ఒప్పందాలపై ఇరుదేశాలు సంతకాలుచేయనున్నాయి. అయితే ఇందులో ఎస్ -500 డిఫెన్స్ వ్యవస్థ కూడా ఉందని సమాచారం.రష్యాతో ఎస్-400 దిగుమతి చేసుకునేందుకు చేసుకున్న ఒప్పందంలో భాగంగా ఇప్పటికే 3 ఎస్-400లు భారత్ దిగుమతి చేసుకోగా.. మరో రెండింటిని వచ్చే 2 ఏళ్లలో అందించనుంది.
అయితే ఎస్-400 తర్వాత రష్యా అభివృద్ధి చేసిన ఎస్-500 పై ఇప్పుడు భారత్ కన్ను పడింది. వాటిని కొనుగోలు చేయాలని.. భారత్ దృష్టి పెట్టింది. పుతిన పర్యటన సందర్భంగా ఈ ఎస్-500 అంశం ప్రధానంగా చర్చకు రానున్నట్లు తెలుస్తోంది. ఎస్-400 కంటే అత్యంత అధునాతనమైన ఎస్-500 ప్రొమెథియస్ వ్యవస్థను కొనుగోలు చేసేందుకు భారత్ ఆసక్తి చూపిస్తోంది.
ఈ ఎస్-500 వ్యవస్థ 500-600 కిలోమీటర్ల పరిధి.. 180-200 కిలోమీటర్ల ఎత్తులో ఉన్న లక్ష్యాలను కూడా ఛేదించగలదు. ఇది విమానాలు, డ్రోన్లతో పాటు బాలిస్టిక్ క్షిపణులు, హైపర్సోనిక్ గ్లైడ్ వాహనాలను కూడా ఎదుర్కోగలదని రక్షణ వర్గాలు చెబుతున్నాయి.దీనివల్ల భారత్కు వాయు రక్షణతో పాటు క్షిపణి, నియర్ స్పేస్ ఆధిపత్యాన్ని అందిస్తుందని భారత రక్షణ వర్గాలు పేర్కొంటున్నాయి. మరీ ముఖ్యంగా ఎస్-400 ఒప్పందంలా కాకుండా.. ఈ ఎస్-500 ను భారత్లోనే విడిభాగాలను తయారు చేసేందుకు కో ప్రొడక్షన్ ఒప్పందంగా రష్యా ప్రతిపాదనలు చేస్తోంది. ఎస్-400 పనితీరు చూసిన భారత్.. ప్రస్తుతం కొనుగోలు చేసిన 5 రెజిమెంట్లకు అదనంగా మరో 5 ఎస్-400 రెజిమెంట్లను కోరుతోంది.
23వ భారత్-రష్యా వార్షిక శిఖరాగ్ర సమావేశం కోసం పుతిన్.. ఈనెల 4వ తేదీన భారత్ రానున్నారు. రెండు దేశాల మధ్య ఇంధన సహకారం.. రక్షణ సంబంధాలు, వాణిజ్య విస్తరణ, ఉక్రెయిన్తో యుద్ధం, ఇండో-పసిఫిక్ వంటి అంశాలపై ప్రధాని మోడీ, పుతిన్ చర్చించనున్నారు. రష్యా నుంచి భారత్ కొనుగోలు చేసిన ఎస్-400 ఎయిర్ డిఫెన్స్ వ్యవస్థలను వేగంగా డెలివరీ చేయడంపై చర్చలు జరపనున్నారు.
