Trump: దక్షిణకొరియా మాటకు ట్రంప్ అంత విలువిస్తారా..? విదేశీ ఉద్యోగులను నియమించుకోవచ్చని భరోసా…

ట్రంప్.. ఎవరి మాట వినడు. అవును ఈ మాట ఇప్పుడుప్రపంచ దేశాలన్నీ ఏకగ్రీవంగా ఒప్పుకుంటాయి. మిత్రుడు, శత్రువు తేడాలేదు.. బిజినెస్..బిజినెస్ .. ఇదీ ట్రంప్ స్ట్రాటజీ. అలాంటి ట్రంప్… ఓ మిత్రదేశం ఒక్క ప్రకటన చేయగానే అలాగే.. అలాగే అంటు బుర్రూపారు. ఎందుకిలా.. ? ట్రంప్ లాంటి వ్యక్తిని ఎలా దారికి తేగలిగింది సౌత్ కొరియా. ఇందులో చిదంబర రహస్యమేంటి..?

ట్రంప్ అధికారంలోకి వచ్చిన దగ్గరి నుంచి అక్రమ వలసల విషయంలో కఠినవైఖరి అవలంబిస్తున్నారు (Trump Immigration Policy). వారిని గుర్తించి, వెనక్కి పంపిస్తున్నారు. ఇందులోభాగంగానే ఇటీవల జార్జియాలో 475 మంది అక్రమ వలసదార్లను నిర్బంధించినట్లు హోంల్యాండ్‌ సెక్యూరిటీ ప్రకటించింది. జార్జియాలో దక్షిణ కొరియాకు చెందిన హ్యుందాయ్‌ కంపెనీ ప్లాంట్‌లో దక్షిణకొరియా వాసులు అక్రమంగా పనిచేస్తున్నారన్న సమాచారం ఆధారంగా ఈ రైడ్ జరిగింది. ఇక్కడ అదుపులోకి తీసుకున్నవారిలో ఆ దేశవాసులే ఎక్కువగా ఉన్నారు (South Korean Workers Detention). ఇది రెండు దేశాల మధ్య దౌత్యపరమైన ఉద్రిక్తతలకు దారితీసింది. దీనిపై దక్షిణకొరియా అధ్యక్షుడు లీ జే మ్యూంగ్ స్పందించారు. ‘‘ప్రస్తుత పరిస్థితుల దృష్ట్యా మా వ్యాపార సంస్థలు యూఎస్‌లో పెట్టుబడులు పెట్టడానికి వెనకాడతాయి’’ అని హెచ్చరించారు.

ఈనేపథ్యంలో డొనాల్డ్ ట్రంప్ (Donald Trump) ఎక్స్ వేదికగా పోస్టు పెట్టారు. ‘‘సంక్లిష్టమైన ఉత్పత్తులను తయారుచేస్తోన్న విదేశీ కంపెనీలు అమెరికాలో భారీ పెట్టుబడులు పెట్టిన సమయంలో నైపుణ్యం కలిగిన కార్మికులు అవసరం అవుతుంటారు. కొంతకాలం నిపుణులైన కార్మికులను వారు మా దేశానికి తీసుకురావాలని నేను కోరుకుంటున్నాను. వారి నుంచి మన కార్మికులు శిక్షణ పొందాలి. లేకపోతే ఆ భారీ పెట్టుబడుల వల్ల ఎలాంటి ప్రయోజనం ఉండదు. మేం ఆ విదేశీ సంస్థల ఉద్యోగులను స్వాగతిస్తున్నాం. మేం వారినుంచి నేర్చుకొని, వారికంటే మెరుగ్గా రాణిస్తాం’’ అని ట్రంప్ రాసుకొచ్చారు.