వైరస్ గుట్టు తెలిసింది!
- Published By: techteam
- August 12, 2020 / 10:50 PM IST
ఒకవైపు కరోనా వైరస్ నిరోధానికి టీకా ప్రయోగాలు ముమ్మరంగా సాగుతుంటే ఇంకోవైపు ఈ మహమ్మారి బలహీనతలేమిటో గుర్తించేందుకూ శాస్త్రవేత్తలు పరిశోధనలు కొనసాగిస్తున్నారు. ఈ క్రమంలోనే అమెరికాలోని నార్త్వెస్టర్న్ యూనివర్సిటీ శాస్త్రవేత్తలు చేసిన పరిశోధనల్లో ఈ వైరస్ కొమ్ములో ఉండే లోటును గుర్తించారు. దీని ఆధారంగా కోవిడ్ 19కు మెరుగైన చికిత్స కల్పించవచ్చునని అంచనా. మనిషి శరీర కణాల్లోకి ప్రవేశించేందుకు కరోనా వైరస్ స్పైక్ ప్రొటీన్ లేదా కొమ్మును వాడుతుందని మనకు తెలుసు. అయితే ఈ ప్రొటీన్ కణానికి అంటుకునే ప్రాంతానికి కొన్ని నానో మీటర్ల దూరంలో ఓ చీలిక లాంటిది ఉందని, ధనావేశం కలిగి ఉండే ఈ చీలికకు రుణావేశపు పరమాణువును జోడిస్తే వైరస్ కణానికి అతుక్కోవడం నిలిచిపోతుందని తాము గుర్తించినట్లు ఈ పరిశోధనల్లో పాల్గొన్న శాస్త్రవేత్త మోనికా ఒలివేరా డిలా క్రజ్ తెలిపారు. వైరస్ జన్యుక్రమంలో వచ్చిన మార్పుల కారణంగా వైరస్ వ్యాప్తి వేగం తగ్గిందని కూడా తమ పరిశోధనలు చెబుతున్నాయని వివరించారు.
