ఈ వైన్ ఖరీదు 7.38 కోట్లు.. అంత ధర ఎందుకో?

అంతర్జాతీయ అంతరిక్ష కేంద్రంలో ఏడాదికి పైగా ఉండి ఇటీవలే భూమి మీదకు వచ్చిన ఓ ఫ్రెంచ్‍ వైన్‍ ధరను రూ.7.38 కోట్లుగా (10 లక్షల డాలర్లు) నిర్ణయించారు. 2019 నవంబరులో అంతరిక్షంలోకి పంపిన 12 వైన్‍ సీసాల్లో ఇది ఒకటి.  భూమికి వెలుపల సేద్యానికి అవకాశాలపై పరిశోధనలో భాగంగా ప్రైవేటు అంకుర పరిశ్రమ స్పేస్‍ కార్గో అన్‍లిమిటెడ్‍ వీటిని అక్కడికి పంపింది. 14 నెలల తర్వాత వాటిని భూమికి రప్పించింది.  ది ప్రెటస్‍ 2000 అనే ఈ వైన్‍ బాటిల్‍ను అమ్మకానికి పెడుతున్నట్టు నిర్వాహక సంస్థ క్రిస్టీస్‍ వైన్‍ అండ్‍ స్పిరిట్‍ డిపార్ట్మెంట్‍ ప్రకటించింది. ఎక్కువమంది పోటీ పడితే వేలం వేస్తామని వివరించింది.

ఫ్రాన్స్ లోని బోర్డోలో ఉన్న ఇన్‍స్టిట్యూట్‍ ఫర్‍ వైన్‍ అండ్‍ వైన్‍ రీసెర్చ్లో పరిశోధకులు ఈ బాటిల్‍ పై రుచి పరీక్షలు కూడా నిర్వహించారు. భూమిపై అంతేకాలం పాటు పులియబెట్టిన వైన్‍తో దీన్ని పోల్చి చూడగా రుచిలో రెండింటి మధ్య వైరుధ్యం ఉందని చెప్పారు. రోదసిలోకి వెళ్లొచ్చిన పానీయం మృదువుగా, సువాసనభరితంగా ఉందన్నారు. అంతరిక్షంలో కొన్నాళ్లు ప్రత్యేక వాతావరణంలో ఉన్న ఈ వైన్‍ పరిపక్వానికి వచ్చిందని క్రిస్టీస్‍ వైన్‍ అండ్‍ స్పిరిట్స్ విభాగం టిమ్‍ టిప్‍ట్రీ తెలిపారు. ప్రస్తుతం ఈ సీసా ధర పెరిగిపోయిందని తెలిపారు.